Rilb'al li na'leb'

Rilb'al li xk'ab' tusulal na'leb'

Rilb'al li xtusulal naʼlebʼ

Testiiw re li Jehobʼa

Q’eqchi’

Resil Xyuʼamebʼ li Winq ut Ixq saʼ li Santil Hu

Tzolom 9: Laj Noe ut li Jukubʼ Kabʼl

Tzolom 9: Laj Noe ut li Jukubʼ Kabʼl
Ebʼ li poyanam yookebʼ xse'enkil laj Noe

LAJ Noe kiwank rixaqil ut oxib' ralal. Li xk'ab'a'eb' li ralal a'an aj Sem, aj Cam ut aj Jafet. Eb' li ralal wankeb' rixaqil. Jo'kan naq waqxaqib'eb' sa' li xjunkab'al laj Noe.

Li Yos kixk'e jun xk'anjel laj Noe. Kixye re, naq tixyiib' jun nimla jukub' kab'l chanchan jun nimla kaax ut najt roq. Li Yos kixye: ‹Oxib' tasal ru taab'aanu›. Kixye ajwi' re, naq tixyiib' xna'aj li xjunkab'al, xna'ajeb' li xul ut xna'aj li tzakahemq.

Li Yos kixye re laj Noe naq tixyiib' chi'us li jukub' kab'l re naq ink'a' t-oq ha' chisa'. Kixye li Yos: ‹Tintaqla chaq jun nimla b'ut'iha' ut tinsach chixjunil li wank sa' Ruuchich'och'. Li maa'anihaq chisa' li jukub' kab'l tkamq›.

Laj Noe ut eb' li ralal ke'xpaab' li Yos ut ke'ok chi kab'lak. Ab'an, eb' li poyanam ke'ok xse'enkil ut moko ke'xkanab' ta xb'aanunkil li maa'usilal. Maa'ani kipaab'ank re laj Noe.

Laj Noe ut li xjunkabʼal yookebʼ xkʼambʼal li tzakahemq ut ebʼ li xul saʼ li jukubʼ kabʼl

Naab'al chihab' ki'ajmank re xyiib'ankil li jukub' kab'l xb'aan naq k'ajo' xnimal. Naq ak xaqli li jukub' kab'l, li Yos kixye re laj Noe naq troksiheb' li xul, teelom ut ixq. Wankeb' kixch'ikeb' sa' wuqutk. Jo'kan ajwi', troksiheb' jalan jalanq xpaayil li xul li neke'rupupik. Laj Noe kixb'aanu chixjunil jo' kiyehe'k re xb'aan li Yos.

Chirix chik a'an, laj Noe ut li xjunkab'al ke'ok ajwi' sa' li jukub' kab'l. Ut li Yos kixtz'ap li okeb'aal. Laj Noe ut li xjunkab'al ke'oyb'eenink sa' li jukub' kab'l. Wi wankat raj ajwi' sa' li jukub' kab'l, maare xaaye raj: Ma tchalq tawi' li b'ut'iha'?

Génesis 6:9-22; 7:1-9.



Ebʼ li patzʼom

  • Jarub’eb’ sa’ xjunkab’al laj Noe? Ani xk’ab’a’eb’ li ralal laj Noe?
  • K’aru kixye li Yos naq tixb’aanu laj Noe ut k’a’ut?
  • K’aru ke’xye li poyanam naq laj Noe ki’aatinak chirix li jukub’ kab’l?
  • K’aru kixye li Yos naq tixb’aanu laj Noe rik’ineb’ li xul?
  • Naq li Yos kixtz’ap rokeb’aal li jukub’ kab’l, k’aru kixb’aanu laj Noe ut li xjunkab’al?

Chaasume ajwiʼ ebʼ li patzʼom aʼin

  • Chaawil li naxye Génesis 6:9-22.

    K’a’ut naq laj Noe chaab’il xna’leb’? (Gén. 6:9, 22.)

    K’aru naxk’oxla li Jehob’a chirix li raaxiik’? K’a’ut us naq tqatz’il rix k’aru yooko rilb’al ut xb’aanunkil naq ink’a’ yooko chi k’anjelak? (Gén. 6:11, 12; Sal. 11:5.)

    Chanru tqak’am qe rik’in laj Noe naq li Jehob’a naxye qe k’aru tento tqab’aanu? (Gén. 6:22; 1 Juan 5:3.)

  • Chaawil li naxye Génesis 7:1-9.

    Li Jehob’a kixye naq laj Noe tiik xch’ool usta aj maak, chanru naxkawresi qach’ool a’in? (Gén. 7:1; Pro. 10:16; Isa. 26:7.)