Li Jesus yook chi aatinak rikʼin ebʼ li kokʼal

CHIXJUNIL li tz'iib'anb'il sa' li tasal hu a'in, kik'ulmank ut isinb'il chaq sa' li Santil Hu. Sa'eb' li tzolom naxch'olob' chanru kixyoob'tesi li Yos chixjunil li k'a'aq re ru ut chanru li qayu'am anaqwan. Naxch'olob' ajwi' k'aru tixb'aanu li Yos sa' li kutan chaalel.

Li tasal hu naxye k'aru chaab'il na'leb' wank sa' li Santil Hu. Naxye k'aru xe'xb'aanu chaq eb' li poyanam. Naxye ajwi' naq eb' li poyanam naru te'wanq xyu'am chi junelik sa' li Sahilal Na'ajej arin sa' Ruuchich'och'.

Chisa' li tasal hu a'in wank 116 chi tzolom ut tusb'il sa' waqxaqib' tasal. Sa' xtiklajik li junjunq chi tasal naxye b'ayaq chirix k'aru na'aatinak li tasal a'in. Eb' li tzolom tustuukeb' ru jo' chanru kik'ulmank chaq. Chi jo'kan taatzol joq'e kik'ulmank chixjunil a'in.

Moko ch'a'aj ta xtawb'al ru eb' li junjunq chi tzolom. Eb' li kok'al te'ruuq rilb'al li hu a'in. Eb' li na'b'ej yuwa'b'ej te'xk'e reetal naq eb' li xkok'al sahaqeb' sa' xch'ool chi rab'inkil naab'al sut eb' li tzolom a'in. Sa' li tasal hu a'in wank naab'al chaab'il na'leb', jo'kan naq yiib'anb'il cho'q re chixjunileb' li qas qiitz'in.

Eb' li junjunq chi tzolom isinb'il chaq sa' li Santil Hu. Jo'kan naq, tento naq taasik' eb' li raqal li Santil Hu li wank sa'eb' li tzolom. Naq taachoy rilb'al jun li tzolom chaawil eb' li patz'om re naq taanaw xsumenkil. Chixjunil li patz'om taataw chirix li tzolom 116.

Chixjunil li raqal li Santil Hu, li wank sa' li tasal hu a'in moko tz'iib'anb'il ta jo' chanru natawmank sa' li Santil Hu. Ut moko ch'a'aj ta tz'iib'anb'il, re naq eb' li kok'al te'xtaw ru. Sa' li raqik li junjunq chi tzolom taataw naq isinb'il chaq sa' li Santil Hu.