Nu ta sigi kuzê ki Bíblia ta fla sobri kazamentu i divórsiu. Deus faze kazamentu pa ser un union pa tudu ténpu entri un ómi i un mudjer. Bíblia ta fla ma un algen pode divôrsia sô si kontise konportamentu seksual mariadu. — Mateus 19:5, 6, 9.

Tistimunhas di Jeová ta djuda kes kazal ki tene prublémas na kazamentu?

 Sin, di alguns manera:

•   Publikasons. Nos revista, livru i vídiu sénpri ten asuntus ki ta djuda kazamentu, ti kes ki ta parse ma ka ta da pa konpo. Pur izénplu, odja artigus “Manter o compromisso com o seu casamento”, “Aprenda a perdoar” i “Recuperar a confiança no casamento”.

•   Runions. Na nos runion, asenbleia i kongrésu sénpri ta dadu bons konsedju di Bíblia ki ta djuda kazamentu.

•   Ansions. Ansions pode djuda kes algen ki é kazadu ku konsedjus di Bíblia sima kel di Efézius 5:22-25.

Tistimunhas di Jeová meste autorizason di ansions pa es divôrsia?

 Nau. Mésmu óras ki un kazal pidi ansions ajuda pa es lida ku prublémas, ansions ka pode fla-s kuzê ki es debe faze. (Gálatas 6:5) Má di akordu ku Bíblia, kes algen ki ta disidi divôrsia sen kel razon ki Bíblia ta da ka sta livri pa kaza otu bês. — 1 Timótiu 3:1, 5, 12.

Kuzê ki Tistimunhas di Jeová ta atxa di siparason?

 Bíblia ta insentiva kazal pa es kontinua djuntu sikrê ku prublémas na kazamentu. (1 Koríntius 7:10-16) Es pode rezolve txeu di kes prubléma si es faze orason di korason, aplika kes konsedju di Bíblia i mostra amor pa kunpanheru. — 1 Koríntius 13:4-8; Gálatas 5:22.

 Má alguns Tistimunha di Jeová ta disidi sipara di ses maridu ô di ses mudjer pamodi alguns situason gravi, sima pur izénplu:

•   Óras ki un maridu ta nega sustenta se família. — 1 Timótiu 5:8.

•   Óras ki un maridu ô un mudjer ta maltrata kel otu. — Salmo 11:5.

•   Óras ki un maridu ô un mudjer ka ta dexa kel otu sirbi Deus. Pur izénplu, un maridu ô un mudjer pode obriga kel otu ki é Tistimunha di Jeová ka obi ku kes lei di Deus. Na un situason sima kel-li, kel Tistimunha di Jeová pode atxa ma siparason é úniku manera di “obi ku [Deus] envês di ómis.” — Atus 5:29.