Bai pa asuntu

BÍBLIA TA MUDA VIDA DI ALGEN

“N ta xatiaba faxi”

“N ta xatiaba faxi”
  • Anu ki N nase: 1975

  • País ki N nase: Méxiku

  • Pasadu: Violéntu; prézu

NHA PASADU

N nase na un sidadi pikinoti na stadu di Xiapas, na Méxiku, ki txoma San Juan Chancalaito. Nha família ta faze párti di povu Chol, ki é un grupu ki ben di povu Maia. Nha mai ku nha pai ten 12 fidju, ami é kintu fidju. Kantu N staba pikinoti, nu ta studaba Bíblia ku Tistimunhas di Jeová mi ku nhas irmon. Infilismenti, N ka sigi kes konsedju di Bíblia kantu N staba jóven.

Kantu N tinha 13 anu N kumesa ta uza dróga i ta furta. Tanbê N sai di kaza i N fika ta mora na rua. Kantu N tinha 16 anu N kumesa ta trabadja na plantason di padjinha. Más ô ménus un anu dipôs, un noti timenti nu sta lebaba un karga grandi di padjinha na boti, un grupu di ómis ki staba ben armadu di otu grupu di dróga rival ataka-nu. N skapa di ses tiru pamodi N murgudja na riu i N ba sai lonji, na otu ladu. Dipôs N fuji pa Mérka.

Na Mérka N kontinua ta kunpra i ta bende dróga i kel-la pô-m na más prubléma. Kantu N tinha 19 anu, N podu prézu pamodi N furta i N tenta mata algen. Na kadia N bira ta faze párti di un grupu violéntu i N faze más violénsia inda. Pur isu, autoridadis muda-m pa un kadia di grandi suguransa na Lewisburg, Pennsylvania.

Na kadia di Lewisburg, nha manera di konporta bira piór. Dja ki N tinha tatuaji sima di kes algen ki fazeba párti di grupu violéntu, N konsigi faze párti di kel mésmu grupu violéntu na kel kadia. N bira más violéntu inda, pur isu sénpri N ta brigaba. Un bês N entra na un géra di un grupu violéntu na pátiu di kadia. Foi un géra ku txeu violénsia, nu uza taku di beisebol i pézu di faze izersísiu. Guardas di kadia uza gás pa para géra. Dipôs di kel-li, autoridadis di kadia pô-m na un lugar spesial pa kes prézu prigozu. N ta xatiaba faxi i N ta uzaba palavras ki ta ofendeba otus algen. Pa mi éra faxi sotaba algen. Na verdadi, N ta atxaba el sábi. N ka ta xintiba tristi pamodi nha manera di konporta.

MODI KI BÍBLIA MUDA NHA VIDA

Na kel lugar spesial pa kes prézu prigozu, es ka ta dexaba mi sai di nha séla kuazi dia interu. Nton N kumesa ta lé Bíblia pa pasa ténpu. Dipôs un guarda da-m livru Poderá Viver Para Sempre na Terra. * Sima N ba ta lé kel livru, ki é un ajuda pa studa Bíblia, N lenbra txeu kuza ki N prendeba kantu N staba pikinoti i N ta studaba Bíblia ku Tistimunhas di Jeová. Dipôs di kel-li, N fika ta pensa modi ki N txiga na fundu di posu pamodi nha manera di ser violéntu. Tanbê N fika ta pensa na nha família. Kómu N tinha dôs irman ki bira Tistimunhas di Jeová, N fika ta pensa: ‘Es ta ba vive pa tudu ténpu.’ Nton N pergunta nha kabésa: ‘Pamodi ki ami N ka pode vive pa tudu ténpu?’ Foi kel-la ki pô-m disidi muda nha vida.

Má, N sabia ma N mesteba ajuda pa N mudaba nha vida. Nton primeru, N faze un orason pa Jeová i N inplora-l pa el djuda-m. Dipôs, N skrebe pa Betel di Tistimunhas di Jeová na Mérka i N pidi un studu di Bíblia. Betel pidi un kongregason ki ta fikaba pértu di undi ki N staba prézu pa pâpia ku mi. Na kel ténpu, es ka ta dexaba mi resebe vizita di un algen ki ka éra nha família. Nton kel Tistimunha di Jeová di kel kongregason kumesa ta manda-m kartas i publikasons pa da-m koraji. Kel-li pô-m ku más vontadi di muda nha vida.

N da un grandi pasu pa N muda nha vida kantu N disidi sai di kel grupu violéntu, ki dja N tinha txeu anu ta fazeba párti di el. Xéfi di kel grupu tanbê staba na kel lugar spesial pa prézus prigozu. Nton, N txiga na el i N fla-l ma N krê biraba Tistimunha di Jeová. Foi un surpréza kantu el fla-m: “Si bu sta pâpia asériu, bira Tistimunha di Jeová. N ka pode bai kóntra vontadi di Deus. Má si bu krê sô sai di grupu, bu sabe kal ki é rezultadu.”

Duránti dôs anu, kes algen ki ta trabadjaba na kadia repara ma N muda nha manera di ser. Pur isu, es kumesa ta trata-m midjór. Pur izénplu, guardas para di pô-m aljéma óras ki es ta lebaba mi pa N ba tomaba banhu. Un di kes guarda txiga na mi i el da-m koraji pa N ka dizisti di muda. Autoridadis di kadia muda-m pa un kanpu ki tinha ménus suguransa i ki ta fazeba párti di kel kadia ki N staba. É la ki N pasa nha últimu anu di kadia. Na 2004, dipôs ki N pasa 10 anu na kadia, N dexadu sai i N mandadu pa Méxiku na un otokaru di kadia.

Lógu dipôs ki N txiga Méxiku, N atxa un Salon di Reinu di Tistimunhas di Jeová. N sisti nha primeru runion ku unifórmi di kadia, ki éra úniku ropa dretu ki N tinha. Má simé, Tistimunhas di Jeová resebe-m ku amor. Kantu N odja ses bondadi, N xinti ma N staba na meiu di kristons verdaderu. (João 13:35) Na kel runion, ansions faze manera pa N ten un studu di Bíblia. N batiza kómu Tistimunha di Jeová un anu dipôs, na dia 3 di setenbru di 2005.

Na janeru di 2007, N kumesa nha trabadju pa ténpu interu, ta gasta 70 óra pa mês ta inxina Bíblia pa otus algen. Na 2011, N kursa Skóla di Bíblia pa Irmons Solteru (ki gósi ta txomadu Skóla pa Pregadoris di Reinu). Kel skóla li da-m grandi ajuda pa N kuida di nhas responsabilidadi na kongregason.

Gósi N ta inxina otus algen pa vive na pas

Na 2013, N kaza ku Pilar, ki é nha mudjer ki N krê txeu. El ta fla na trósa, ma pa el é difísil kridita na kes kuza ki N ta fla-l ma N ta fazeba. Nunka más N ka faze kes kuza ki N dexa pa tras. Mi ku nha mudjer nu ta kridita ma kel algen ki mi é oji ta prova ma Bíblia ten puder di muda vida di algen. — Romanos 12:2.

BENSONS KI N RESEBE

N ta xinti ma kel ki Jizus fla na Lucas 19:10 ta aplika na mi. La el fla: ‘[N] ben djobe i salva kuzê ki staba perdedu.’ N ka ta xinti ma N sta perdedu más. Nen N ka ta prujudika algen más. Pamodi Bíblia, N ten midjór obijetivu na vida. N ta sta na pas ku otus algen i más inportanti inda, N ten amizadi fórti ku Jeová, ki é nha Kriador.

[NÓTA DI RODAPÉ]

^ par. 13 Publikadu pa Tistimunhas di Jeová, má gósi el ka sta inprimidu más. Gósi livru prinsipal ki es ta uza pa studa Bíblia é Kuzê ki nu pode prende na Bíblia?