Bai pa asuntu

Bai pa sugundu menu

Tistimunhas di Jeová

Kabuverdianu

Pamodi ki Tistimunhas di Jeová ka ta toma sangi?

Pamodi ki Tistimunhas di Jeová ka ta toma sangi?

Kuzas ki ta fladu sobri nos

Ta fladu: Tistimunhas di Jeová ka ta toma ramedi i nen es ka ta seta tratamentu di saúdi.

Verdadi: Nu ta djobe midjór tratamentu di saúdi pa nos i pa nos família. Óras ki nu sta duenti, nu ta djobe un bon dotor ki ta faze tratamentu i operason sen uza sangi. Nu sabe ma medisina midjora txeu. Si nu repara, nu ta odja ma gósi, kes fórma di tratamentu sen sangi ki kriadu pa djuda Tistimunhas di Jeová, sta ta uzadu pa djuda tudu algen. Na txeu país, un algen ki sta duenti pode skodje ka toma sangi pa libra di alguns prigu sima duénsa, prublémas pamodi reason di korpu ô pamodi algun fadja.

Ta fladu: Tistimunhas di Jeová ta kridita ma fé pode kura duénsas.

Verdadi: Nu ka ta faze kura através di fé.

Ta fladu: Si bu ka toma sangi, bu ten ki paga más txeu pa faze otu tipu di tratamentu.

Verdadi: Kes tratamentu di saúdi sen uza sangi é ka karu. *

Ta fladu: Txeu Tistimunha di Jeová i kriansas ta móre tudu anu pamodi es ka ta toma sangi.

Verdadi: Kel ideia li ka ten fundamentu. É normal médikus faze tratamentu difísil, sima operason na korason, na osu i transplanti di orgons, sen uza sangi. * Un algen grandi ô un kriansa ki sta duenti ki ka toma sangi, ta kustuma rekupera faxi i ti midjór ki kes algen ki toma sangi. * Di tudu manera, ningen ka pode fla ku sertéza ma un algen ta móre si el ka toma sangi ô ma el ta skapa si el toma sangi.

Pamodi ki Tistimunhas di Jeová ka ta toma sangi?

Kel-li é un asuntu ki ten más aver ku relijion di ki medisina. Bíblia ta fla klaru ma nu ka debe toma sangi. (Génesis 9:4; Levítico 17:10; Deuteronômio 12:23; Atos 15:28, 29) Tanbê, pa Deus, sangi ta reprizenta vida. (Levítico 17:14) Pur isu, nu ka ta toma sangi pamodi nu ta obi ku Deus i tanbê nu ta ruspeta-l, pamodi é el ki da-nu vida.

Mudansa na manera di pensa

Operasons ki é konplikadu tanbê pode fazedu sen transfuzon di sangi i ta kóre dretu

Un bês, médikus ta atxaba ma faze tratamentu sen sangi éra mésmu kuza ki ser radikal ô mata kabésa. Má, oji kel ideia li sta ta muda. Pur izénplu, na 2004 un artigu ki publikadu na un revista, fla ma ‘txeu tipu di tratamentu ki kriadu pa djuda Tistimunhas di Jeová, ka ta dura, dipôs ta fika uzadu na tudu algen.” * Na anu 2010, un artigu na revista Heart, Lung and Circulation fla ma “tratamentu sen sangi, ka debe uzadu sô pa Tistimunhas di Jeová, má el debe uzadu ku tudu algen i na tudu tipu di operason.”

Monti médiku na mundu interu ta uza tékinikas pa faze operason difísil sen uza sangi. Kes tipu di tratamentu li sta ta uzadu ti mésmu na kes país póbri i txeu algen ki ka é Tistimunha di Jeová ta pidi kes tipu di tratamentu li.

^ par. 8 Djobe Transfusion and Apheresis Science, Volumi 33, Nu 3, p. 349.

^ par. 10 Djobe The Journal of Thoracic and Cardiovascular Surgery, Volumi 134, Nu 2, pp. 287-288; Texas Heart Institute Journal, Volumi 38, Nu 5, p. 563; Basics of Blood Management, p. 2; i Continuing Education in Anaesthesia, Critical Care & Pain, Volumi 4, Nu 2, p. 39.

^ par. 10 Djobe The Journal of Thoracic i Cardiovascular Surgery, Volumi 89, Nu. 6, p. 918; i Heart, Lung and Circulation, Volumi 19, p. 658.

^ par. 14 Continuing Education in Anaesthesia, Critical Care & Pain, Volumi 4, Nu 2, pájina 39.