Kel aplikativu li (“Aplikativu” ô “App”) tene txeu informason ki fazedu pa djuda-u prende más sobri Deus, Bíblia i Tistimunhas di Jeová. Lé, odja i diskarega kes kuza ki ta interesa-u. Nu krê pa otus algen tra pruvetu di kel Aplikativu li tanbê, má favor ka bu poi kuzas di kel Aplikativu li na otus site ô Aplikativus. Si bu krê mostra otus algen kel ki bu prende li, fla-s pa es diskarega kel Aplikativu li.

Kes Régra di Uzu li (kel “Kontratu” li) é un Kontratu legal entri bo ku Watchtower Bible and Tract Society of New York, Inc., ki é un organizason na Nova Iórki ki ka ta faze nogósiu (“Watchtower”, “nu”, “nos” ô “di nos”) i bo, ki ta uza es Aplikativu (“bo” ô “di bo”).

Kalker atualizason, mudansa pa midjór, kuzas novu i/ô kalker propriadadi novu di kel Aplikativu li ki podu ta sta di akordu ku kel Kontratu li. É sô nos ki pode koriji, faze mudansas ô kaba ku kel Kontratu li i nu pode faze-l kalker óra ki nu krê. Bu ta konkorda ma kes kuza ki nu koriji, muda ô kaba ku el pode afeta txeu bu kapasidadi di uza es Aplikativu. Si dipôs di kes mudansa bu kontinua ta uza i/ô bu entra na kel Aplikativu li, kel-li krê fla ma bu ta seta kes mudansa ki fazedu.

Ka kunpri tudu ô párti di kel Kontratu li (ki fazedu di akordu ku kel ki nu disidi) é un violason di kes régra li i bu pode inpididu lógu di entra i/ô di ten lisénsa pa uza es Aplikativu. Bu ta konkorda ma nu pode ka dexa-u entra más i/ô tra bu lisénsa pa uza es Aplikativu, pamodi kalker motivu ô sen ninhun motivu, di akordu ku kel ki nu disidi.

BU TA KONKORDA KU KES RÉGRA DI KEL KONTRATU LI ÓRAS KI BU KLIKA NA BOTON “SETA” KI STA NA ES KONTRATU Ô ÓRAS KI BU DISKAREGA, INSTALA, KÔPIA Ô UZA ES APLIKATIVU DI KALKER OTU MANERA. PA BU TEN LISÉNSA DI UZA KEL APLIKATIVU LI, PRIMERU BU MESTE SETA ES KONTRATU. SI BU KA TA KONKORDA KU KES RÉGRA LI, BU KA DEBE INSTALA, KÔPIA Ô UZA ES APLIKATIVU, I BU DEBE PAGA LÓGU TUDU KÓPIA DI KEL APLIKATIVU LI DI BU APARELHU ILETRÓNIKU.

1. LISÉNSA PA UZA APLIKATIVU. Es Aplikativu ten un lisénsa, ki ka ta bendedu, pa bu uza sô di akordu ku kes régra di es Kontratu. Désdi ki bu kunpri i bu kontinua ta kunpri tudu kes régra di es Kontratu, Watchtower ta da-u un direitu, ki nu pode tra, ki ten limiti, ki ka pode pasadu pa otu algen, ki bu ka pode da otu algen i ki é ka sô pa bo. Ku kel direitu li bu pode entra, uza, instala, abri, guarda, mostra i poi Aplikativu ta funsiona na bus aparelhus iletróniku ô na aparelhus ki bu ta toma kónta di es, i uza-s pa faze kes kuza ki sta na es Kontratu ô ki sta di akordu ku novus instruson ô splikason ki Watchtower skrebe. Kalker atualizason ki Watchtower faze pa troka i/ô pa poi es Aplikativu ta fika más konplétu, ta sta di akordu ku régras di es Kontratu, má kel-li ka ta aplika si kel atualizason ben ku se própi lisénsa. Na kel kazu li, el ta sta di akordu ku Kontratu di se lisénsa. Alguns párti di es Aplikativu tanbê pode sta dibaxu di otus lisénsa di kódigu abértu (open-source) ô otus lisénsa di otus Aplikativu ki pode aplika na algun situason. Kazu kes régra di es Kontratu i régras di kes otu lisénsa ka ta konkorda ku kunpanheru, nton kes otu lisénsa ta ten más forsa sobri ses párti na es Aplikativu.

2. REZÉRVA DI DIREITUS I PROPRIADADI; KONTIÚDU DI OTUS PROPRIETÁRIU, MARKAS REJISTADU. Watchtower ta rezerva tudu direitus di kel Aplikativu li ki ka sta klaru ma bu dadu na kel Kontratu li. Es Aplikativu é protejedu pa direitus di autor i otus lei i tratadus sobri propriadadi intelektual. Entri bo i Watchtower, é Watchtower ki é donu di tudu direitu, titlu i interesi na i pa es Aplikativu. Si ka fladu otu kuza, (i) tudu kontiúdu di es Aplikativu i (ii) tudu markas rejistadu ki ten aver ku es Aplikativu é propriadadi di Watch Tower Bible and Tract Society of Pennsylvania (“Watch Tower”). Pa ivita dúvidas, tudu kuza ki é propriadadi intelektual di un otu algen i ki kel algen da Watchtower ô Watch Tower lisénsa pa uza-l i ki ta faze párti di kel Aplikativu li, kel kuza ta kontinua ta ser di kel algen. Bu ta konkorda na ka paga, sukundi ô faze otus mudansa na kalker direitu di autor (copyright), marka rejistadu ô otus avizu di propriadadi ô ki ta mostra kal ki é fonti ki sta déntu di es Aplikativu ô ki sta ligadu ku el (ki ta inklui, má ka sô kes ki sta na lista di atributus di lisénsa di kódigu abértu) (“Atributus”). Nu ka pode garanti i nu ka ta garanti ma bu ta konsigi odja kes informason ô otus kontiúdu, ki é di kalker otu proprietáriu, ki bu ta konsigi odja através di es Aplikativu (si ten).

Adobe i se logotipu, tanbê Acrobat i se logotipu, es é marka rejistadu di Adobe Systems Incorporated. Apple, iTunes i iPod é markas rejistadu di Apple Inc. Microsoft i se logotipu i tanbê kalker software i produtus di Microsoft, ki ta inklui Microsoft Office i Microsoft Office 365, é markas rejistadu di Microsoft Inc. Android é un marka rejistadu di Google LLC. É trabadju ki Google ta faze i ta partilha ki ta poi robô Android ta funsiona ô ta mudadu i el ta uzadu di akordu ku kes régra skrebedu na Creative Commons 3.0 Attribution License (https://creativecommons.org/licenses/by/3.0/us/). Tudu kes otu marka i markas rejistadu é di ses proprietáriu.

3. LIMITIS NA MANERA DI UZA. Kel Aplikativu li é pa bu uza sô bo i sima sta na es Kontratu ô di akordu ku novus splikason ô instruson ki Watchtower skrebe. Bu ta seta ma bu ka ta faze kes kuza ki sta na lista ki nu ta ben fla i nen bu ka ta dexa otus algen faze, diretamenti ô indiretamenti: (a) luga, renda, inprista, bende, torna bende, transfiri, dizigina, reproduzi, kôpia, publika, transmiti, da lisénsa pa otu algen, distribui, kria trabadjus ku bazi na Aplikativu ô di otu manera, spadja, splora, poi disponível kalker párti ô tudu kel Aplikativu li, (b) aplika injinharia kontráriu, diskonpila, muda, adapta, traduzi ô sipara kalker párti ô tudu párti di kel Aplikativu li, ki ta inklui, má ka sô kel-li, kalker ideia ki sta sukundidu, algoritmos ô strutura, ô uza kel Aplikativu li pa kria novus aplikativu, prugramas, produtus ô sirvisus (sô si ô sô óras ki kel lei ki ta aplika na kel kódigu ta proíbi kalker limiti ki dja nu poba ô óras ki kes régra di lisénsa di kes párti di kódigu abértu (open-source) ki sta déntu di es Aplikativu ta permiti alguns di kes pontu), (c) tra ô muda kalker marka rejistadu, nómi di marka, nómi di sirvisu, ilustrasons, dizenhus, logotipus, informason ki ta parse di riba na pájina, sinblu di boton, instrusons pa prugrama, markas ki ta identifika komérsius, imajen di produtu ô kalker otu direitu di propriadadi ki ta parse na es Aplikativu (ki ta inklui markas rejistadu “JW” i “JW.ORG” sen ninhun limitason) ô kalker otu marka, (d) mostra nómi, logotipu, marka rejistadu ô otu identifikason di kalker algen ô entidadi di manera ki ta da ideia ma é kel algen ô kel entidadi ki ta publika ô distribui kel Aplikativu li, ô (e) uza, publika, transmiti, ô poi kalker dispozitivu, software ô rotina ki ta afeta ô ki ten intenson di afeta algun manera ki Aplikativu ta funsiona, (f) rejista, tenta rejista, ô djuda kalker otu algen rejista kalker marka rejistadu, logotipu, nómis di domíniu, i otus kuza ki ta distingi nos marka, copyright, ô otus direitu di propriadadi ki sta ligadu ku Watchtower, Watch Tower, ô kalker un di kes entidadi ki ta kolabora ku es; (g) tra, sukundi ô muda kalker notifikason di copyright, marka rejistadu, ô otu direitu di propriadadi ki ta parse na Aplikativu ô na kalker otu párti déntu di Aplikativu, (h) transmiti, guarda ô prosesa informason di saúdi ki sta di akordu ku HIPAA di Mérka, ô (i) uza Aplikativu di manera diferenti di kel ki fladu na lisénsa ki dadu na es Kontratu. Bu debe sigi orientason (i ka viola di propózitu) kes Régra di Uzu di Google API.

Enbóra bu seta kunpri kes régra di limitis na manera di uza ki sta di riba, bu pode pidi autorizason pa aplika injinharia kontráriu, diskonpila, muda, adapta, traduzi ô sipara kalker párti ô tudu párti di kel Aplikativu li, ki ta inklui (má ka sô kel-li) kalker ideia ki sta sukundidu, algoritmos ô strutura ô uza kel Aplikativu li pa kria novus Aplikativu, prugramas, produtus ô sirvisus. Watchtower ten direitu di da-u autorizason ô nau. Pa bu pidi kel autorizason li favor pâpia ku Watchtower através di kel email li: DeveloperSupport@jw.org.

Si bo ô Watchtower fadja na insisti na kunpri kalker kuza ki sta na kel Kontratu li ô si bo ô Watchtower fadja na poi na prátika kalker direitu ô medida di es Kontratu, ki bu ten direitu di akordu ku es Kontratu, ka krê fla ma régras ô direitus na es Kontratu ka meste sigidu ô ma ten ménus obrigason di kunpri es Kontratu. Si Watchtower disidi ka puni un algen ki ka kunpri algun régra di kel Kontratu li, kel-li ka krê fla ma Watchtower ta dexa pasa si el ka kunpri otu régra. Ten ki splikadu klaru, skrebedu, i mandadu pa Watchtower ô pa ken ki ta uza Aplikativu óras ki algen disidi dizisti di algun direitu ki ten aver ku algun párti di es Kontratu, pa pode setadu.

4. MANERA DI UZA APLIKATIVU I/Ô KONTIÚDU DI APLIKATIVU KI TA DEXADU I KES KI É PROIBIDU.

Si bu sigi kes régra ki sta dibaxu li, bu pode:

• Odja, diskarega i inprimi kes imajen, publikason iletróniku, múzika, fotus, testu ô vídius di Watch Tower ki ten direitu di autor (copyright), di kel Aplikativu li pa bu uza sô pa bo i pa kuzas ki ka ten aver ku nogósiu.

• Manda links ô kópias iletróniku di publikasons, vídius ô prugramas di audiu ki pode diskaregadu na kel Aplikativu li.

Bu ka pode i nen bu ka debe dexa otus algen faze kes kuza li:

• Poi dizenhus, publikasons iletróniku, markas rejistadu, múzikas, fotus, vídius ô artigus di kel Aplikativu li na internet (kalker site, site di manda kunpanheru arkivus, site di manda kunpanheru vídius ô redi sosial).

• Distribui imajens, publikasons iletróniku, markas rejistadu, múzikas, fotus, testus ô vídius di kel Aplikativu li ku un párti di kalker software ô sima un párti di kalker software (ki ta inklui manda kes material li pa un servidor pa el uzadu na un software).

• Reproduzi, duplika, kôpia, distribui ô splora kalker imajen, logotipu, publikason iletróniku, marka rejistadu, múzika, fotu, testu, vídiu ô kalker otu material di kel Aplikativu li pa faze nogósiu ô pa dinheru (sikrê es ka ganha ninhun dinheru ku el).

• Kria ku obijetivu di distribui kalker software, feraménta ô téknika ki ta uzadu pa panha, kôpia, diskarega, tra, panha ô konsigi dadus, HTML, imajens ô testu di kel Aplikativu li. (Kel-li ka ta proíbi distribui aplikativus ki é di grasa i ki é ka pa nogósiu ki fazedu pa diskarega arkivus iletróniku, sima arkivus EPUB, PDF, MP3, i MP4, di kes párti públiku di kel site li.)

• Uza kel Aplikativu li mariadu, sima interfiri na Aplikativu ô na se sirvisus ô entra na es di otu manera ki é ka di kel manera ki ta mostradu klaru.

• Uza kel Aplikativu li di un manera ki ta traze ô ki pode traze prubléma na kel Aplikativu li ô ki pode ka dexa kel Aplikativu li fika disponível ô di manera ki otus algen pode entra na el, ô uza-l di kalker manera ki é ka dretu, ilegal, pa furta, ingana ô prujudika algen ô ligadu ku kalker obijetivu ô atividadi ki é ka dretu, ilegal, pa furta, ingana ô prujudika algen.

• Uza kel Aplikativu li ô kalker imajen, publikason iletróniku, marka rejistadu, múzika, fotu, testu ô vídiu di kel Aplikativu li pa kalker obijetivu ki ten aver ku marketing.

• Uza kel Aplikativu li ô kes kuza ki ta sta na el pa obijetivus di nogósiu ô pa oferese pa bende kalker produtu di nogósiu ô kes-li: kuzas kontroladu; drógas ilegal i bénda ilegal di drógas; armas; kuzas ilegal; instrusons pa konstrui, monta ô ranja kuzas ilegal ô armas pa ataka otus; informasons ki ta uzadu pa viola direitus di autor (copyright(s)), viola marka(s) rejistadu ô distrui propriadadi intelektual ô informason di otus; informasons ki ta uzadu di manera ilegal pa prujudika kalker algen ô animal; ô pornografia, algen nu, kes trabadju di kunpanha algen ô otu kontiúdu ki é sô pa adultu.

• Uza Aplikativu ô kes kuza ki ten na el pa viola direitus legal di otus ô insentiva algen pa faze kel-li (pur izénplu, kel-li pode inklui viola direitus di propriadadi intelektual ô uza kel propriadadi ki é ka di bo pa uzu pesoal, pamodi ta viola kel Lei de Direitos Autorais Digitais do Milênio [Digital Millennium Copyright Act]).

• Uza Aplikativu pa manda ô distribui vírus, worms, kabalus di Troia, arkivus ki sta ku fadja, fraudes (hoaxes), ô otus kuza ki fazedu ku obijetivu di distrui prugramas ô ingana algen.

• Uza Aplikativu pa involve na kalker atividadi ki pa nos é ilegal, di akordu ku nos própi régras.

• Uza Aplikativu pa partilha, transmiti, mostra ô di kalker otu forma torna-l disponível pa palavras suju, ki ka ta mostra ruspetu pa asuntus relijiozu, palavrons, mintiras pa difama algen, fla kuzas pa ofende ô xatia algen, faze abuzu ku palavras ô faze amiasas.

• Uza Aplikativu ô kes kuza ki sta na el pa kalker obijetivu ilegal, ki ta invadi direitus di otus, ki ta viola, ki ta difama ô ki ta furta i ingana algen (pur izénplu, kel-li ta inklui phishing, kria esquema de pirâmide, ô kria un kópia di un site).

• Uza Aplikativu pa kria, distribui, publika ô fasilita, promosons, publisidadis i emails pa txeu algen ki es ka pidi ô otus pididu (“spam”).

• Involve na kalker atividadi ki di akordu ku nos própi opinion ta para, mexe, ingana ô prujudika (ô amiasa di para, mexe, ingana ô prujudika) kel Aplikativu li, nos operasons, ô kapasidadi di otus uza kel Aplikativu dretu.

Watchtower é ka responsável di ninhun manera si bu uza kel Aplikativu li di manera ki nu fla pa ka uza ô si bu resebe algun kuza ô un mensajen ki ta ofende ô xatia algen, amiasas, mintiras pa difama ô kuzas ilegal pamodi bu uza kel Aplikativu li.

Si bu ta uza kel Aplikativu li, bu debe (i) ruspeta tudu lei ki govérnu faze na país, stadu ô lokalidadi, i (ii) sigi tudu lei di copyright ki ta aplika, sima leis sobri múzika, vídius, jogus, imajens, testus i otus meiu di kumunikason, ki ta inklui kes ki bu ta uza i kes ki ta uzadu pa produzi informasons iletróniku.

5. TIRMINA KONTRATU. Kel Kontratu li ta sirbi ti ki bo ô Watchtower disidi finda-l. Bus direitu ki sta na kel Kontratu li ta kaba lógu, si bu para di kunpri kalker párti di kel Kontratu li. Watchtower pode kaba ku kel Kontratu li ku bo i/ô bu lisénsa di uza kel Aplikativu li kalker óra, pa kalker motivu ô sen motivu, sen ninhun obrigason ku bo i sen ten ninhun kulpa legal. Óras ki nu kaba ku kel Kontratu li, bu debe para di uza kel Aplikativu li di kalker manera i tra-l i dizinstala-l di bus dispozitivu i di tudu dispozitivu ki bu ten ô na lugaris di guarda kuzas. Na ninhun situason Watchtower ka ta fika responsável pamodi kel Kontratu li kaba ô pamodi nu tra asésu pa kel Aplikativu li.

6. INFORMASONS PA MÉDIKUS

Kes párti di kel Aplikativu li ki ten informasons i referénsias pa médikus (“Informasons pa médikus”) ta sirbi sô pa da informason i ka ta sirbi pa da konsedjus sobri saúdi, nen el ka priparadu pa toma lugar di konsulta, diskubri kuzê ki bu ten ô faze tratamentu ku un profisional. Kes Informason pa médikus, ka ta rekumenda nen ka ta difende di manera dirétu ninhun izami, médiku, produtu, manera di trata saúdi, opinions, nen kes otu informason ki ta parse na kes párti sobri Informasons pa médikus.

Informasons pa médikus ka fazedu, nen autorizadu i nen é ka nos intenson pa es uzadu pa toma kalker disizon, sistéma ô manera ki médikus ta uza pa trata saúdi ki é pa salva vidas ô ki ta poi algen ta vive más txeu ô pa kalker otu manera i obijetivu. Sénpri bu debe fala ku un médiku ô ku un algen kualifikadu na ária di saúdi sobri kalker dúvida ki bu pode ten di tratamentus ô prublémas di saúdi. Kel Aplikativu li ka ta seta ninhun responsabilidadi nen obrigason pa kalker éru di informason ô falta di informason na kontiúdu di Informasons pa médikus. É kada algen ki ta disidi si el ta kunfia na kalker informason ki sta na Informasons pa médikus, i risku é di sel.

7. AVIZUS SOBRI GARANTIA. É BO KI É RESPONSÁVEL PA KES RISKU DI UZA KEL APLIKATIVU LI I KALKER KUZA KI TEN NA EL. KEL APLIKATIVU LI TA PODU “SIMA STA”, “SIMA STA DISPONÍVEL” I KU TUDU FADJAS. TI UNDI LEI TA PERMITI, WATCHTOWER TA NEGA TUDU GARANTIA, REPRIZENTASONS I KONDISONS, KI STA KLARU, KI KA STA KLARU Ô KI É LEGAL, KI TA INKLUI KA SÔ KALKER GARANTIA KI KA STA KLARU, KUZAS KI DEBE SER FETU, Ô KONDISONS DI NOGÓSIU, SEN VIOLA, FAZE MUDANSA NA APLIKATIVU PA PODE UZA-L NA UN SÉRTU SITUASON, SER DI KUNFIANSA Ô STA DISPONÍVEL, STA SÉRTU Ô KONPLÉTU, KUALIDADI, SUGURANSA, MEXE NA APLIKATIVU, TRABADJUS KI STA LIGADU KU EL, SEN VÍRUS, SEN KUIDADU Ô PA APLIKATIVU FUNSIONA DI UN SÉRTU MANERA Ô KI TA DA UN SÉRTU REZULTADU Ô DI OTU MANERA KI TA BEN DI Ô KI STA LIGADU KU UZU DI APLIKATIVU PA BO Ô PA KALKER OTU ALGEN. WATCHTOWER KA TA GARANTI MA KA TA TEN NADA KI TA INTERFIRI ÓRAS KI BU TA UZA APLIKATIVU, MA FUNSONS KI EL TEN Ô SIRVISUS KI EL TA FAZE Ô KI APLIKATIVU TA POI DISPONÍVEL TA KUNPRI OBIJETIVUS DI KENHA KI TA UZA APLIKATIVU, MA APLIKATIVU TA FUNSIONA SEN PARA Ô MA EL KA TA PARSE KU ÉRU Ô MA SUGURANSA DI APLIKATIVU KA TA ATRAZA, PERDE KUZAS, KA TA SER ATAKADU PA HACKING Ô OTUS KUZA KI PODE AMIASA-L. TANBÊ WATCHTOWER É KA RESPONSÁVEL PA DA KALKER APOIU Ô KALKER OTU SIRVISU Ô PA FALTA DI APOIU Ô KALKER OTU SIRVISU KI TEN AVER KU APLIKATIVU. NU TA KÓRE RISKUS ÓRAS KI NU TA DISKAREGA I UZA KALKER SOFTWARE. WATCHTOWER TA KONSEDJA KENHA KI TA UZA APLIKATIVU PA SERTIFIKA MA EL TA INTENDE DRETU KES RISKU KI TEN ANTIS DI DISKAREGA, INSTALA Ô UZA APLIKATIVU DI KALKER MANERA. NEN WATCHTOWER NEN KALKER OTU ENTIDADI KI STA LIGADU KU WATCHTOWER NEN NINHUN DI SE DIRETORIS, AJENTIS, VOLUNTÁRIUS, MÉNBRUS, KES KI TEN LISÉNSAS, FORNESIDORIS, KONTRATADUS Ô KES KI TA REPRIZENTA (KI TA REPRIZENTA DJUNTU, “PÁRTIS DI WATCHTOWER”) KA TA FIKA RESPONSÁVEL PA KALKER STRAGU KI BO Ô OTUS ALGEN PODE SUFRI PAMODI DISKAREGA, INSTALA, DIZINSTALA, MUDA Ô KALKER OTU MANERA DI UZA APLIKATIVU Ô DI KALKER KUZA KI STA NA APLIKATIVU.

8. LIMITIS DI RESPONSABILIDADI. TI UNDI LEI TA PERMITI, NA NINHUN SITUASON WATCHTOWER Ô KALKER OTU DI KES ENTIDADI DI WATCHTOWER KA TA FIKA KU NINHUN RESPONSABILIDADI PA KALKER STRAGU SPESIAL, KI PODE KONTISE SEN KRÊ, KI É KA DIRÉTU, KI KONTISE PAMODI ALGUN KUZA Ô PAMODI ALGUN KASTIGU (KI TA INKLUI, MÁ KA SÔ KEL-LI, PÉRDA DI LUKRU, DADUS KI PERDE, NOGÓSIUS Ô GOODWILL Ô PA KALKER PÉRDA DI LUKRU KI PODE KONTISE ANTIS, NOGÓSIUS Ô GOODWILL, PA PÉRDA DI INFORMASON KI É SEGREDU Ô DI OTU TIPU, PAMODI ATIVIDADI DI KOMÉRSIU KI PARA, PAMODI KA KUNPRIDU KUZÊ KI DEBE FAZEDU, KI TA INKLUI KES KI TA FAZEDU KU BON INTENSON Ô PA KUIDADU, PA FALTA DI KUIDADU Ô PAMODI KALKER PÉRDA DI DINHERU Ô OTU) KI KONTISE Ô KI TEN AVER KU UZA APLIKATIVU I/Ô KONTIÚDU DI APLIKATIVU (Ô PAMODI KEN KI STA UZA KA SABE UZA APLIKATIVU I/Ô KALKER KONTIÚDU DI APLIKATIVU) Ô DI ALGUN MANERA, KI TEN AVER KU KEL KONTRATU LI. KES KUZA KI NU FLA DI RIBA DEBE APLIKA NA KES SITUASON KI RESPONSABILIDADI TA BEN DI REKLAMASON KU BAZI NA KONTRATU, GARANTIA, RESPONSABILIDADI DI LEI (KI TA INKLUI, MÁ KA SÔ KEL-LI, FALTA DI KUIDADU), RESPONSABILIDADI KI TA BEN DI PRODUTU KU DIFEITU, RESPONSABILIDADI DIRÉTU, DIFEITU, VIOLASON DI GARANTIA, KA KUNPRI KONTRATU Ô OTU, MÉSMU SI WATCHTOWER Ô KALKER OTU ALGEN DI WATCHTOWER DADU INFORMASON SOBRI KES STRAGU KI TALVÊS PODE KONTISE. MÁ KALKER STRAGU KI BEN PAMODI KALKER MOTIVU KI TEN AVER KU APLIKATIVU (KI TA INKLUI, MÁ KA SÔ KEL-LI, KALKER STRAGU KI DJA NU PÂPIA DI EL LI), TUDU RESPONSABILIDADI DI TUDU KES ALGEN DI WATCHTOWER I REKONPÉNSA KI É SÔ KEL ALGEN KI TA UZA APLIKATIVU KI TEN DIREITU, TA TEN LIMITI DI 10 DÓLA DI MÉRKA ($10). KEL DISPOZISON DI LIMITIS DI RESPONSABILIDADI LI DEBE APLIKADU KA TA INPORTA SI OTUS KUZA DI KEL KONTRATU LI PODE KA SIRBI.

9. INDIMINIZASON. Kel algen ki ta uza Aplikativu debe indiminiza, difende i garanti ma Watchtower i kada un di kes algen di Watchtower ta ser protejedu di i kóntra kalker reklamason ô amiasa di reklamasons, kuzas ki ta fazedu, prosésus i buskas i tudu i kalker pérdas, responsabilidadis, stragus, dispézas i okupasons, ki ta inklui, má ka sô kel-li, pagamentus i dispézas ikilibradu di adivogadus, ki ta ben di, ô ki ten aver ku manera ki kel algen ki ta uza Aplikativu ta faze i/ô kalker kontiúdu di Aplikativu, ki ta inklui, má ka sô kel-li (a) violason ki kel algen ki ta uza Aplikativu pode faze di Kontratu, ki ta inklui uza Aplikativu di algun manera ki ka sta klaru na kel dukumentu li ma pode faze ô nau, (b) falta di kuidadu ô konportamentu mariadu di kel algen ki ta uza Aplikativu, (c) violason di kalker lei ô regulamentu, (d) kalker di kes diklarason i garantias, di kel algen ki ta uza Aplikativu, ki ten aver ku kalker kuza di Aplikativu i/ô kontiúdu di Aplikativu, (e) kalker reklamasons ki ten aver ku kuzas ki ta fazedu ô ki otus algen ta sukundi sobri Aplikativu i/ô kontiúdu di Aplikativu, ô (f) kalker reklamasons di ô na nómi di otus algen ki sta ligadu dirétu ô indirétu ku uzu di Aplikativu i/ô kontiúdu di Aplikativu.

10. LISÉNSA DI KONTIÚDU I INDIMINIZASON. Ken ki ta uza kel Aplikativu li ta diklara i ta garanti di manera klaru ma el ten direitu i/ô lisénsa pa publika kalker kontiúdu (sima sta dibaxu) ki ken ki ta uza-l ta publika através di uzu di Aplikativu. “Kontiúdu” ta siginifika kalker informason ki ken ki ta uza Aplikativu ta da sobri uzu di Aplikativu, ki ta inklui, má ka sô kel-li, informasons, kontiúdus, dadus, mensajens, testus, fixerus, imajens, vídius, sons, otus material i kalker di kes kuza ki ken ki ta uza Aplikativu dja daba antis. Ken ki ta uza Aplikativu ta diklara i ta garanti ma informasons ki el ta da i ma manera ki nu ta uza kes informason ka ta viola nen uza mariadu kalker patente, direitu di autor, marka, segredu di nogósiu ô otus direitu di propriadadi intelektual di otus algen.

Através di kel Kontratu li, ken ki ta uza kel Aplikativu li ta da-nu direitus i lisénsa ki ka ta kaba, ki ka pode tradu, ki ta sirbi na mundu interu, ki ka é sô di nos i ki nu ka meste paga, lisénsa pa nu uza, armazena, guarda, mexe, kôpia, distribui, kumunika, publika, transmiti, mostra na públiku, bira-l disponível pa públiku, reproduzi, idita, traduzi, i torna formata kel kontiúdu li i pripara trabadjus ki ta ben di kel kontiúdu li. Bu ta konkorda ma bu ta difende-nu i ma bu ta difende kalker párti di Watchtower, ma bu ta paga kes kustu i kes dispéza, kóntra tudu kes ason, prusésu i otus kuza di un párti kóntra kalker un di kes párti di Watchtower ki ta fla ma tevi violason di kalker párti, direitu di autor, marka rejistadu, segredu di nogósiu ô otu direitu ô violason di kalker lisénsa ô otus direitu di propriadadi intelektual ku bazi na kel kontiúdu ki bu da-nu; i ma bu ta konkorda na indiminiza kes párti di Watchtower i faze algun kuza pa proteje-s di i kóntra tudu julgamentu, pérda, responsabilidadis, stragus, kustus i dispézas (ki ta inklui, má ka sô kel-li, dinheru pa paga adivogadu i tudu kes dispéza ki bu pode ten ku adivogadu) ki ta ben di kel violason ô ki sta ligadu ku el. Bu ta intende ma bo é úniku responsável pa tudu kontiúdu ki bu ta publika, transmiti através di Aplikativu ô ligadu ku Aplikativu. Bu ta rekonhese ma nu ka ta skodje kes kontiúdu antis i nen nu ka ta disidi kal ki é pa poi na Aplikativu, má nu ten direitu (má nos é ka obrigadu) di disidi di akordu ku kel ki nu ta atxa, si nu ka ta seta, paga, tra di lugar kalker kontiúdu ki ta viola kel Kontratu li ô pamodi kalker otu motivu.

11. ISPORTASON. Bu ka pode uza, nen di algun manera bu ka pode isporta ô torna isporta Aplikativu ô kalker un di se kontiúdus, si é ka di akordu ku kel ki lei di Mérka i lei di kel lugar ki uzadu pa faze kel Aplikativu li. Aplikativu ka pode isportadu nen torna isportadu prinsipalmenti, má ka sô kel-li, (a) pa ninhun país ki Mérka inpidi ô (b) pa kalker algen ki sta na Lista di sidadons ki Dipartamentu di Tizoru di Mérka skodje ô na Lista di pesoas ô Lista di entidadis ki Dipartamentu di nogósiu di Mérka nega. Tanbê bu ta konkorda ma bu ka ta uza Aplikativu pa faze kalker otu kuza ki lei ta proíbi.

12. PRIVASIDADI. Kes régra ki ta sigidu pa orienta manera ki nu ta uza bus informason i otus informason ki bu manda-nu sobri Aplikativu sta splikadu na párti di Régra di Privasidadi di kel Aplikativu li.

13. LEI KI TA APLIKA; TÉNPU PA FAZE REKLAMASON. Kel Kontratu li orientadu i interpretadu di akordu ku leis di stadu di Nova Iórki, ménus kes prinsípiu ki jurisdison di Nova Iórki ta skodje, i tudu kes reklamason di Kontratu ô ki ten aver ku el, ô si violadu Kontratu, pamodi forsa di Kontratu, algun kuza ilegal ô di otu manera, tanbê ta ser orientadu di akordu ku lei di stadu di Nova Iórki, ménus kes prinsípiu ki lei di Nova Iórki ta skodje pa aplika. Ki ka meste aplika kel Kontratu li é kel lei ki konxedu pa Convenção das Nações Unidas pa Bénda Internasional di Produtus. BU TA KONKORDA MA SIKRÊ KU KALKER LEI, STATUTU KI É KONTRÁRIU, KALKER REKLAMASON, PROSÉSU Ô ASON DI BU PÁRTI KÓNTRA KALKER PÁRTI DI WATCHTOWER, KI TA BEN DI KEL KONTRATU LI Ô KI TEN AVER KU EL, DEBE APRIZENTADU NA PRAZU DI 6 MÊS DIPÔS DI DATA KI KONTISE Ô KI TALVÊS KONTISE KEL KUZA KI PÔ-U TA REKLAMA.

14. Otus kuza. Kel Kontratu li, Régras di privasidadi di kel Aplikativu li i responsabilidadi i kalker otus instruson, skrebedu, ki ten aver ku Aplikativu, ki Watchtower ta da, ta faze párti di Kontratu konplétu entri bo i Watchtower sobri kel Aplikativu li i es ten forsa sobri tudu kumunikason, propóstas i reprizentason, fladu ô skrebedu, di antis i di gósi, ki ten aver ku kel Aplikativu li ô ku kalker otu asuntu ki kel Kontratu li ta pâpia di el. Watchtower ta fika livri di kunpri kel Kontratu li si kontise kuzas ki el ka ta pode kontrola ki pode pô-l ka ta kunpri Kontratu, da-l atrazu ô blokia-l. Si atxadu ma kalker párti di kel Kontratu li é nulu, ka ta sirbi, ka ta da pa aplika ô ilegal, tribunal pode mexe na kel párti, pa el fika más pértu posível di intenson di Watchtower i tudu kes otu párti di kel Kontratu li ta kontinua ta aplika i ku mésmu forsa. Watchtower pode da ô transfiri kel Kontratu li pa kalker un di kes entidadi ki ta trabadja ku el. Si Watchtower fadja na algun momentu pa iziji-u kunpri kalker párti di kel Kontratu li, kel-li ka ta afeta di ninhun manera direitu di Watchtower di poi algen ta kunpri kel Kontratu li, nen si Watchtower dizisti di aplika kes rezultadu si algen viola kalker párti di kel Kontratu li ka krê fla ma el dizisti di aplika kes rezultadu pa kenha ki viola kel mésmu párti.