Bai pa asuntu

Bai pa sugundu menu

Bai pa lista di asuntu

Tistimunhas di Jeová

Kabuverdianu

Kuzê ki nu pode prende na Bíblia?

 KAPÍTLU 13

Ruspeta vida ki Deus da-u

Ruspeta vida ki Deus da-u

1. Ken ki da-nu vida?

JEOVÁ ‘é un Deus bibu.’ (Jeremias 10:10) El é nos Kriador. É el ki da-nu vida. Bíblia ta fla: ‘Bu kria tudu kuza i pa bu vontadi es pasa ta izisti i es kriadu’. (Apocalipse 4:11) Vida é un prezenti ki Jeová da-nu ku txeu amor. — Salmo 36:9.

2. Kuzê ki nu meste faze pa nu ten un vida filís?

2 Jeová da-nu tudu kuza ki nu meste pa nu vive, sima kumida i agu. (Atos 17:28) Má el ka krê sô pa nu sta bibu. El krê pa nu ser filís. (Atos 14:15-17) Pa nu ten un vida filís, nu meste obi ku leis di Deus. — Isaías 48:17, 18.

VIDA TEN TXEU VALOR PA JEOVÁ

3. Kuzê ki Jeová faze kantu Kain mata Abel?

3 Bíblia ta fla-nu ma nos vida ku vida di otus algen ten txeu valor pa Jeová. Pur izénplu, odja kuzê ki kontise ku Kain ku Abel. Kain fika ku raiba di se irmon Abel. Jeová aviza Kain pa kontrola se raiba, má el ka sigi konsedju di Jeová. Bíblia ta fla ma Kain ‘ataka se irmon Abel, i el mata-l’. (Génesis 4:3-8) Jeová kastiga Kain pamodi kuza ki el faze. (Génesis 4:9-11) Óras ki un algen dexa raiba i ódiu kria na se korason, el pode bira violéntu i mau. Kes tipu di algen li ka ta ganha vida itérnu. (Lé 1 João 3:15.) Jeová krê pa nu ama tudu tipu di algen. — 1 João 3:11, 12.

4. Kal ki é kel mandamentu ki ta mostra ma Jeová ta da vida valor?

 4 Txeu ténpu dipôs, Jeová da Muizes 10 mandamentu. Un di kes mandamentu ta flaba: ‘Ka bu mata algen.’ (Deuteronómio 5:17) Nton, si un algen mataba otu algen di propózitu el ta sérba mortu tanbê.

5. Kuzê ki Deus ta atxa di algen ki ta tra mininu?

5 Otu lei ki Jeová da israelitas mostra ma vida di un mininu é inportanti pa Jeová mésmu antis di nase. Jeová flaba ma si un algen prujudikaba un mudjer grávida i kel mininu moreba, kel algen tinha ki matadu tanbê. (Lé Êxodo 21:22, 23; Salmo 127:3.) Kel-li ta mostra ma pa Deus tra mininu é un kuza mariadu. — Djobe párti PRENDE MÁS n28.

6, 7. Modi ki nu ta mostra ma nu ta da vida valor?

6 Si nu ta da valor pa vida sima Deus ta da, nu ka ta faze nada ki ta poi nos vida ô vida di otus algen na prigu. Pur isu nu ka debe fuma, txera tabaku i nen uza dróga. Kes kuza li ta prujudika nos saúdi i ti pode mata-nu.

7 Nos vida i nos korpu é un prezenti di Jeová. Nton, nu debe uza-s sima el krê. Nu meste faze kel-li pa nu kontínua linpu dianti di Deus. (Romanos 6:19; 12:1; 2 Coríntios 7:1) Pa Jeová seta nos adorason nu ten ki dexa tudu vísiu. Faze kel-li pode ka ser faxi, má Jeová ta djuda-nu si nu faze nos párti.

8. Kuzê más ki nu debe faze pa nu ka poi vida di otus algen na prigu?

8 Kuzê más ki Jeová krê pa nu faze pa nunka nu ka poi vida di otus algen na prigu? Nu debe konduzi nos karu, móta ô kalker otu tipu di transpórti ku  txeu kuidadu i atenson. Tanbê nu debe faze di tudu pa nos kaza ser un lugar suguru. Jeová mostra ma kes tipu di kuidadu li é inportanti kantu el da kel órdi pa israelitas: ‘Si bu faze un kaza novu, tanbê bu debe faze un parapetu riba di kaza, asi si un algen kai di la, pa kulpa di sangi ka fika riba algen di bu kaza.’ (Deuteronómio 22:8) Tanbê si nu ta da valor pa nos vida, nunka nu ka ta partisipa na kes disportu violéntu, ki ta poi nos vida na prigu. — Salmo 11:5.

9. Modi ki nu debe trata animal?

9 Má é ka sô ku vida di otus algen ki nu debe preokupa. Tanbê Jeová krê pa nu trata animal dretu. Pa Jeová é ka mariadu mata un animal pa kume, pa faze ropa ô pa difende di prigu. (Génesis 3:21; 9:3; Êxodo 21:28) Má, nunka nu ka debe mata ô maltrata animal sô pa divirtimentu. — Provérbios 12:10.

SANGI TA REPRIZENTA VIDA

10. Modi ki nu sabe ma sangi ta reprizenta vida?

10 Pa Jeová sangi é sagradu pamodi el ta reprizenta vida. Dipôs ki Kain mata Abel, Jeová fla-l: ‘Sangi di bu irmon sta ta txoma-m la di txon.’ (Génesis 4:10) Sangi di Abel ta reprizentaba se vida. Dipôs di Dilúviu, Jeová dexa Nué ku se família kume karni di animal. Má el dexa klaru ma es ka debe kumeba sangi. El fla-s: ‘Tudu animal ki ta mexe i ki sta bibu nhos pode kume. Sima N da nhos plantas, N ta da nhos es tudu. Má sô ka nhos kume karni di un animal ku se sangi, ki é se vida.’ (Génesis 1:29; 9:3, 4) Asi Jeová mostra más un bês ma sangi ta reprizenta vida.

11. Kuzê ki Jeová fla nason di Israel sobri sangi?

 11 Uns 800 anu dipôs, Jeová fla nason di Israel: ‘Si un israelita ô un stranjeru ki ta mora na nhos meiu, bai kasa i el pega un animal brabu ô un pasu ki ta da pa kume, el debe tra-l sangi i kubri-l ku téra.’ El fla-s tanbê: ‘Ka nhos kume sangi’. (Levítico 17:13, 14) Jeová ka mudaba di opinion. El kreba pa se povu lenbraba ma sangi é sagradu. Óras ki es ta mataba un animal pa kume es tinha ki traba sangi di animal i kubri-l ku téra.

12. Kuzê ki Jeová krê pa nu lenbra?

12 Ku ténpu, Jeová muda di opinion? Alguns anu dipôs di mórti di Jizus, kes apóstlu i ansion di kongregason di Jiruzalen faze un runion. Di kes lei ki israelitas dadu es tinha ki disidiba ki párti inda ta aplikaba pa kristons. (Lé Atos 15:28, 29; 21:25.) Jeová djuda kes kriston ntende ma es ka debe skeseba ma sangi inda éra sagradu i inportanti. Kristons ki ta viveba na mésmu ténpu ki apóstlus, ka ta kumeba nen ka ta bebeba sangi. Tanbê es ka ta kumeba karni di kes animal ki ka tradu sangi. Kume karni ki ka tradu sangi éra un pekadu gravi, sima adora imaji ô ten konportamentu seksual mariadu. I mésmu oji, kristons verdaderu ka ta kume nen ka ta bebe sangi. Jeová inda krê pa nu lenbra ma sangi é sagradu.

13. Pamodi ki kristons verdaderu ka ta toma sangi?

13 Má kel-li krê fla ma kristons verdaderu ka debe toma sangi? É kel-li própi. Jeová fla ma nu ka debe kume nen bebe sangi. Imajina ma dotor fla-u pa  bu ka bebe grogu ô vinhu. Bu ta poba el na veia? Klaru ki nau. Poi grogu ô vinhu na veia ta sérba mésmu kuza ki bebeba es. Asi tanbê, poi sangi na veia é sima kume ô bebe sangi. — Djobe párti PRENDE MÁS n29.

14, 15. Kuzê ki é más inportanti pa nos?

14 Má, i si un dotor fla-nu ma si nu ka toma sangi nu ta móre? Kada un di nos ten ki disidi si nu ta obi ku lei di Deus sobri sangi. Má kes ki é kriston verdaderu ten txeu ruspetu pa vida ki Deus da-s i es ka krê móre. Pur isu, sénpri es ta djobe otus tratamentu pa es kontínua bibu, má sen toma sangi.

15 Nu krê ten bon saúdi. Má, obi ku Jeová debe ser un kuza más inportanti ki nos vida ô nos saúdi. Jizus fla: ‘Ken ki krê salva se vida ta perde-l, má ken ki perde se vida pamodi mi el ta atxa-l.’ (Mateus 16:25) Nu ta ama Jeová pur isu nu krê obi ku el. Jeová sabe kuzê ki é midjór pa nos i el ta rekonpensa kes algen ki sénpri ta obi ku el. Nos tanbê nu ta ruspeta vida sima Jeová, i pa nos tanbê sangi é un kuza sagradu. — Hebreus 11:6.

16. Pamodi ki kristons verdaderu ta obi ku Deus?

16 Sima dja nu odja, kristons verdaderu ka ta kume i nen es ka ta bebe sangi. Tanbê es ka ta toma sangi pa faze tratamentu di saúdi. * Má es ta seta otus tipu di tratamentu pa es salva ses vida. Pamodi ki  kristons verdaderu sta disididu na obi ku lei di Deus sobri sangi? Pamodi es ta kridita ma Deus ki kria vida i ki faze sangi, sabe kuzê ki é midjór pa es. I bo? Bu ta kridita ma Deus sabe kuzê ki é midjór pa bo?

SANGI PA PÚRDUA PEKADUS

17. Kal ki éra úniku manera ki Jeová ta dexaba povu di Israel uzaba sangi?

17 Na nason di Israel, sangi di animal éra uzadu pa pidi Jeová perdon. Na lei ki Jeová da Muizes, el fla: ‘Vida di un kriatura sta na se sangi, é mi própi ki da nhos el pa nhos faze spiason [ô, pidi perdon] pa nhos kabésa na altar. Pamodi é sangi ki ta faze spiason [ô, ki ta da perdon], pamodi vida ki sta na el.’ (Levítico 17:11) Óras ki israelitas ta pekaba es ta pidiba Jeová perdon. Es tinha ki ofereseba un animal i pidi saserdóti pa poba un bokadinhu di sangi di animal na altar di faze sakrifisiu, na ténplu. Kel-li éra úniku manera ki Jeová ta dexaba povu di Israel uzaba sangi.

18. Ki xansi ki nu ten pamodi Jizus da se vida pa nos?

18 Oji dja nu ka meste faze sakrifisiu di animal pa pidi perdon di nos pekadu. Jizus sakrifika se vida ô el da se sangi pa nos pekadu pode ser purduadu. (Mateus 20:28; Hebreus 10:1) Alén di kel-li, pamodi vida ki Jizus da, Jeová da-nu xansi di vive pa tudu ténpu. — João 3:16; Hebreus 9:11, 12; 1 Pedro 1:18, 19.

Modi ki nu ta mostra ma nu ta ruspeta vida i sangi?

19. Pamodi ki nu debe faze tudu sforsu pa aviza pesoas ma es meste ten fé na Jizus?

19 Vida é un grandi prezenti ki Jeová da-nu!  Nu ten amor pa pesoas i nu krê pa es vive pa tudu ténpu. Pur isu, nu ta faze tudu kel ki nu pode pa nu aviza pesoas ma es meste ten fé na Jizus. Si nu ka aviza-s i es móre pamodi es faze kuza mariadu, nu pode fika ku kulpa. (Ezequiel 3:17-21) Má si nu aviza-s nu pode fla mésmu kuza ki apóstlu Polu fla: ‘N sta linpu di sangi di tudu ómi, pamodi N ka dexa di fla-s kal ki é vontadi di Deus.’ (Atus 20:26, 27, BPK) Óras ki nu ta pâpia ku pesoas ma Jeová ta da vida valor i ma sangi é sagradu, nu sta ta mostra ma nu ta ruspeta vida sima Jeová.

^ par. 16 Pa bu sabe más sobri sangi djobe pájinas 77-79 di livru “Mantenha-se no amor de Deus”, na purtugês, fazedu pa Tistimunhas di Jeová.