Bai pa asuntu

Bai pa sugundu menu

Bai pa lista di asuntu

Tistimunhas di Jeová

Kabuverdianu

Kuzê ki nu pode prende na Bíblia?

 KAPÍTLU 3

Kuzê ki Deus krê pa nos?

Kuzê ki Deus krê pa nos?

1. Kuzê ki Deus krê pa nos?

DEUS krê pa nu ten un vida rei di sábi. El kria primeru ómi ku primeru mudjer, Adon ku Eva, pa vive na un jardin rei di bunitu. Kel ki el kreba éra pa es tinha fidju, faze Téra interu bira un paraízu i toma kónta di tudu animal. — Génesis 1:28; 2:8, 9, 15; djobe párti PRENDE MÁS n6.

2. (a) Modi ki nu sabe ma Deus ta ben faze se vontadi? (b) Ki tipu di algen Deus krê pa vive na Téra i pa kantu ténpu?

2 Bu ta atxa ma algun dia nu ta ben vive na un paraízu? Jeová ta fla-nu: ‘N disidi kuzê ki N krê faze i N ta faze-l.’ (Isaías 46:9-11; 55:11) Sin, el ta ben faze se vontadi i nada ka pode tadja-l. Jeová fla ma el kria Téra ku un obijetivu. El ‘ka kria-l pa sisí’. (Isaías 45:18) El krê pa pesoas vive na Téra interu. Ki tipu di algen Deus krê pa vive na Téra i pa kantu ténpu? Bíblia ta fla: ‘Téra ta ben ser di kes algen justu [ô ki ta obi ku Deus] i es ta ben vive na el pa tudu ténpu.’ — Salmo 37:29; Apocalipse 21:3, 4.

3. Óras ki bu ta odja algen ta fika duenti i ta móre, kuzê ki talvês bu ta pergunta?

3 Má oji algen ta fika duenti i ta móre. Na txeu lugar es ta briga i es ta mata kunpanheru. É klaru ki é ka kel-li ki Deus kreba. Nton, kuzê ki kontise i pamodi ki Téra ka é un paraízu? É sô Bíblia ki pode splika.

 UN INIMIGU DI DEUS

4, 5. (a) Ken ki uza un kóbra pa pâpia ku Eva na jardin di Éden? (b) Modi ki un algen onéstu pode bira un ladron?

4 Bíblia ta fla-nu ma Deus ten un inimigu. Es inimigu ‘ta txomadu Diabu i Satanás.’ Satanás uza un kóbra pa pâpia ku Eva na jardin di Éden. (Apocalipse 12:9; Génesis 3:1) Ta parseba ma éra kel kóbra ki staba ta pâpia, má na verdadi éra Satanás. — Djobe párti PRENDE MÁS nu  7.

5 Nton, é Deus ki faze Satanás, ki tanbê ta txomadu Diabu? Nau! Un anju ki ta staba na Séu kantu Deus pripara Téra pa Adon ku Eva, ba ta muda ti ki el bira Diabu. (38:4, 7) Modi ki kel-li é posível? Pensa: modi ki un algen onéstu pode muda ti bira un ladron? Ningen ka ta nase ladron. Má si el dizeja un kuza ki ka é di sel i el kontínua ta pensa na el, kel dizeju mariadu ta ba ta bira más fórti. Nton, sô parse un xansi, el ta furta kel kuza. Asi, el ta bira se kabésa un ladron. — Lé Tiago 1:13-15; djobe párti PRENDE MÁS n8.

6. Modi ki un anju bira un inimigu di Deus?

6 É kel-li ki kontise ku kel anju. Dipôs ki Jeová kria Adon ku Eva, el fla-s pa es ten fidju i pa es ‘intxi Téra.’ (Génesis 1:27, 28) Talvês kel anju pensa: ‘Tudu kes algen li pode adora-m envês di adora Jeová!’ Kantu más el pensa na kel-li, más el bira ta krê kel ki é di Jeová. Kel anju kreba pa algen adora-l. Nton, el konta Eva mintira i el ngana-l. (Lé Génesis 3:1-5.) Asi, el bira Satanás ki tanbê ta txomadu Diabu, un inimigu di Deus.

7. (a) Pamodi ki Adon ku Eva móre? (b) Pamodi ki nu ta bira bédju i nu ta móre?

 7 Adon ku Eva ka obi ku Deus i es kume kel fruta. (Génesis 2:17; 3:6) Es peka kóntra Jeová i ku ténpu es móre, sima Jeová dja flaba es. (Génesis 3:17-19) Fidjus di Adon ku Eva éra pekadoris, nton es móre tanbê. (Lé Romanos 5:12.) Pa djuda-nu ntende pamodi ki fidjus di Adon ku Eva éra pekador tanbê, nu ben odja es izénplu. Imajina ma bu sta ta faze pon na un fórma ki sta mopidu. Kel pon ta fika ku kel mésmu difetu ki kel fórma ten. Kantu Adon ka obi ku Deus, el bira pekador. Pamodi nos é fidjus di Adon, nos tudu é pekador ô nu ten kel mésmu ‘difetu’ ki el tinha. I pamodi nos tudu é pekador, nu ta bira bédju i nu ta móre. — Romanos 3:23; djobe párti PRENDE MÁS n9.

8, 9. (a) Na kuzê ki Satanás kreba pa Adon ku Eva kriditaba? (b) Pamodi ki Jeová ka mata kes rebéldi lógu kel óra?

8 Kantu Satanás poi Adon ku Eva ka obi ku Deus, el kumesa un revólta kóntra Jeová. El kreba pa Adon ku Eva kriditaba ma Jeová éra un mintirozu i un mau governanti ki ka kreba kel ki éra midjór pa es. Satanás fla ma umanus ka meste pa Deus fla-s kuzê ki es debe faze i ma éra midjór pa Adon ku Eva disidiba pa es mê kuzê ki éra dretu i kuzê ki éra mariadu. Nton, kuzê ki Jeová faze? Si el mataba kes rebéldi el ta kababa ku kel revólta. Má kel-la ta provaba ma Satanás é un mintirozu? Klaru ki nau.

9 Nton, Jeová ka mata kes rebéldi lógu kel óra. El da un ténpu pa umanus governa ses kabésa. Asi, ta fikaba klaru ma Satanás é un mintirozu i ma é Jeová  ki sabe kuzê ki é midjór pa nos. Nu ta ben sabe más sobri kel-li na kapítlu 11. Má kuzê ki bu ta atxa di kel disizon ki Adon ku Eva toma? Bu ta atxa ma es faze dretu kantu es kridita na Satanás i es ka obi ku Deus? Tudu kuza ki es tinha éra Jeová ki da-s. El da-s un vida perfetu, un lugar bunitu pa es mora i un  trabadju ki es ta gostaba txeu. Má Satanás nunka ka fazeba nada di bon pa es. Si bu staba na ses lugar, kuzê ki bu ta fazeba?

10. Ki disizon inportanti kada un di nos nu ten ki toma?

10 Oji, kada un di nos tanbê nu ten ki toma un disizon. Nos vida ta dipende di kuzê ki nu skodje. Nu pode skodje obi ku Jeová kómu nos governanti i djuda prova ma Satanás é un mintirozu. Ô nu pode skodje Satanás pa ser nos governanti. (Salmo 73:28; Provérbios 27:11.) Na mundu di oji é poku algen ki ta obi ku Deus. Na verdadi, é ka Deus ki sta ta manda na mundu. Má, si é ka el, nton é kenha?

KEN KI STA TA MANDA NA MUNDU?

Si tudu reinu di mundu ka éra di Satanás, el ta ofereseba Jizus es?

11, 12. (a) Kuzê ki nu ta prende di oférta ki Satanás faze Jizus? (b) Ki testus di Bíblia ta mostra ma é Satanás ki sta manda na mundu?

11 Jizus sabeba ken ki sta manda na mundu. Un bês Satanás ‘mostra-l tudu reinu di mundu i ses glória.’ Nton, Satanás promete Jizus: ‘N ta da-u tudu kes kuza li si bu nbaxa i bu adora-m.’ (Mateus 4:8, 9; Lúkas 4:5, 6, BPK) Pergunta bu kabésa: ‘Si kes reinu ka éra di Satanás, el ta ofereseba Jizus es?’ Nau. Tudu govérnus di mundu é di Satanás.

12 Talvês bu ta pensa: ‘Modi ki é Satanás ki sta ta manda na mundu? É ka Jeová ki é Deus Tudu-Poderozu ki kria Séu ku Téra?’ (Apocalipse 4:11) Sin, é el. Má Jizus txoma Satanás di ‘governanti di es mundu.’ (João 12:31; 14:30; 16:11) Apóstlu Polu txoma Satanás, ki é Diabu, di ‘deus di es sistéma’. (2 Coríntios 4:3, 4) I apóstlu Juan skrebe ma ‘mundu interu sta na puder di Malvadu.’ — 1 João 5:19.

 MODI KI MUNDU DI SATANÁS TA BEN SER DISTRUÍDU?

13. Pamodi ki nu meste di un mundu novu?

13 Es mundu di Satanás sta bira kada bês más prigozu. Na tudu lugar nu ta odja géra, korupson, finjimentu i violénsia. Mésmu ku tudu sforsu ki ómis ta faze, es ka ta pode rezolve kes prubléma li. Má ka ta dura Deus ta ben distrui es mundu mau na se géra ki ta txomadu Armajedon, i el ta ben traze un mundu novu i justu. — Apocalipse 16:14-16; djobe párti PRENDE MÁS n10.

14. Ken ki Deus skodje pa ser Rei di Se Reinu? Kuzê ki Bíblia dja flaba sobri Jizus?

14 Jeová skodje Jizus Kristu pa ser Rei di Se Reinu ô govérnu ki sta na Séu. Dja faze milharis di anu ki Bíblia dja flaba ma Jizus ta sérba ‘Prínsipi di Pas’ i ma se govérnu nunka ka ta ten fin. (Isaías 9:6, 7) Jizus inxina se sigidoris ora pa es govérnu kantu el fla: ‘Faze bu Reinu ben. Pa bu vontadi fazedu na Séu, asi tanbê na Téra.’ (Mateus 6:10) Na kapítlu 8, nu ta ben sabe modi ki Reinu di Deus ta ben fika na lugar di tudu govérnu di mundu. (Lé Daniel 2:44.) Nton, Reinu di Deus ta ben faze Téra bira un paraízu rei di bunitu. — Djobe párti PRENDE MÁS n11.

UN MUNDU NOVU STA PÉRTU!

15. Kuzê ki é kel ‘téra novu’?

15 Bíblia ta promete: ‘Ta ben ten séu novu ku un téra novu, ki nu sta ta spéra’ i ‘na es ta ben ten justisa.’ (2 Pedro 3:13; Isaías 65:17) Alvês óras ki Bíblia ta uza palavra ‘téra’, el sta ta fala di pesoas ki ta vive na Téra. (Génesis 11:1) Nton, kel ‘téra novu’ di justisa krê fla kes algen ki ta obi ku Deus i ki é abensuadu pa el.

16. Ki prezenti maravilhozu Deus ta ben da pa kes ki ta ben vive na se mundu novu? Kuzê ki nu meste faze pa nu ganha es prezenti?

 16 Jizus promete ma kes algen ki ta ben vive na mundu novu di Deus ta ben dadu ‘vida itérnu’. (Marcos 10:30) Kuzê ki nu meste faze pa nu ganha es prezenti? Favor João 3:16 i 17:3 pa bu atxa respósta. Modi ki vida ta ben ser na Paraízu na Téra? Nu ben odja kuzê ki Bíblia ta fla.

17, 18. Modi ki nu sabe ma sta ben ten pas na Téra interu i ma nu ta ben xinti suguru?

17 Maldadi, géra, krimi i violénsia ka ta ben ten más. Ka ta ben ten más ninhun algen mau na Téra. (Salmo 37:10, 11) Deus ‘ta kaba ku géra na Téra interu’. (Salmo 46:9; Isaías 2:4) Téra ta ben sta xeiu di algen ki ta ama Deus i ki ta obi ku el. Ta ben ten pas pa tudu ténpu. — Salmo 72:7.

18 Povu di Jeová ta ben vive sen medu. Na pasadu, kantu israelitas ta obiba ku Deus, es ta xintiba suguru pamodi Deus ta protejeba es. (Levítico 25:18, 19) Na Paraízu nu ka ta ben ten medu di nada nen di ningen. Nu ta ben xinti sénpri suguru! — Lé Isaías 32:18; Miqueias 4:4.

19. Pamodi ki nu pode ten sertéza ma ta ben ten kumida avontádi na mundu novu di Deus?

19 Ta ben ten kumida avontádi. ‘Ta ben ten kumida avontádi na Téra, i riba monti ta ben ten un monti kumida.’ (Salmo 72:16) Jeová, ‘nos Deus, ta ben abensua-nu’, i ‘Téra ta ben da se produson’. — Salmo 67:6.

20. Modi ki nu sabe ma Téra ta ben bira un paraízu?

20 Téra interu ta ben bira un paraízu. Pesoas ta ben ten kazas bunitu ku ses jardin. (Lé Isaías 65:21-24;  Apocalipse 11:18.) Téra interu ta ben bira bunitu sima éra na jardin di Éden. Jeová sénpri ta ben da-nu tudu kel ki nu meste pamodi Bíblia ta fla: ‘Bu ta abri bu mô i bu ta faze vontadi di tudu kuza bibu.’ — Salmo 145:16.

21. Modi ki nu sabe ma algen ta ben vive na pas ku animal?

21 Algen ta ben vive na pas ku tudu tipu di animal. Animal ka ta ben ataka ningen. Nen minís pikinoti ka ta ben xinti medu di kes animal ki oji é prigozu. — Lé Isaías 11:6-9; 65:25.

22. Kuzê ki Jizus ta ben faze pa kes algen ki sta duenti?

22 Ningen ka ta ben fika duenti. Kantu Jizus staba na Téra, el kura monti algen. (Mateus 9:35; Marcos 1:40-42; João 5:5-9) Má, kómu Rei di Reinu di Deus, Jizus ta ben kura tudu algen. Ningen ka ta ben fla: ‘N sta duenti.’ — Isaías 33:24; 35:5, 6.

23. Kuzê ki Deus ta ben faze pa kes algen ki dja móre?

23 Mortus ta ben vive otu bês. Deus promete ma el ta ben resusita milhons di algen ki dja móre. ‘Ta ben ten resureison di justu i di injustu.’ — Lé João 5:28, 29; Atos 24:15.

24. Kuzê ki bu ta atxa di vive na Paraízu na Téra?

24 Nos tudu nu ten un disizon pa toma. Nu pode skodje prende sobri Jeová i sirbi-l ô nu pode skodje faze kel ki nu krê. Si nu skodje sirbi Jeová nu pode ten un futuru rei di sábi. Un ómi, antis di móre pidi Jizus pa lenbra di el na se Reinu. Jizus promete-l: ‘Bu ta ben sta ku mi na Paraízu’. (Lucas 23:43) Nu ta ben prende más sobri Jizus Kristu i modi ki el ta ben kunpri promésas maravilhozu di Deus.