Bai pa asuntu

Bai pa sugundu menu

Bai pa lista di asuntu

Tistimunhas di Jeová

Kabuverdianu

Kuzê ki nu pode prende na Bíblia?

 KAPÍTLU 11

Pamodi ki ten txeu sufrimentu?

Pamodi ki ten txeu sufrimentu?

1, 2. Kuzê ki txeu algen ta pergunta?

UN TENPORAL ta distrui un sidadi, un ómi ta entra na un igreja ku un pistóla i el ta mata un monti algen. Un mai ta móre di un duénsa ki ka ten kura i el ta dexa sinku fidju.

2 Óras ki ta kontise disgrasas sima kes li, monti algen ta pergunta: “Pamodi?” Txeu algen ta pergunta pamodi ki mundu sta xeiu di ódiu i sufrimentu. I bo? Dja bu kustuma faze es pergunta?

3, 4. (a) Kuzê ki Habacuque pergunta Jeová? (b) Modi ki Jeová responde-l?

3 Bíblia ta pâpia di pesoas ki tinha fé na Deus i ki tanbê fazeba es pergunta. Pur izénplu, proféta Habacuque pergunta Jeová: ‘Pamodi ki bu sta dexa-m odja maldadi? I pamodi ki bu sta seta abuzu di puder? Pamodi ki N sta odja distruison i violénsia? I pamodi ki ten txeu géra i konfuzon?’ — Habacuque 1:3.

4 Modi ki Jeová responde-l? Na Habacuque 2:2, 3, Jeová promete ma el ta rezolveba kes prubléma. Jeová ten txeu amor pa pesoas. Bíblia ta fla ma el ta preokupa ku nos. (1 Pedro 5:7) Nu pode ten sertéza ma ódiu ki Deus ten pa sufrimentu é más txeu ki di nos. (Isaías 55:8, 9) Nton, pamodi ki ten txeu sufrimentu na mundu? Nu ben odja kuzê ki Bíblia ta fla.

 PAMODI KI TEN TXEU SUFRIMENTU?

5. (a) Kuzê ki txeu relijion ta fla sobri sufrimentu? (b) Kuzê ki Bíblia ta fla sobri kel-li?

5 Txeu bês pastoris di igrejas, padris i xéfis di relijion ta fla ma tudu kuza ki ta kontise é di vontadi di Deus. Alguns ta fla ma tudu kuza ki ta kontise ku un algen, ti mésmu disgrasa, dja staba skrebedu pa Deus i ma nunka nu ka ta pode ntende pamodi. Otus ta fla ma óras ki un kriansa móre é Deus ki toma-l, pamodi el sta ta mesteba más un anjinhu na Séu. Má ninhun di kes kuza li é ka verdadi. Deus nunka ka ta faze kuzas mariadu kontise. Bíblia ta fla: ‘Deus verdaderu nunka ka ta faze kel ki é mau, Tudu-Poderozu nunka ka ta faze kel ki é mariadu!’ — 34:10.

6. Pamodi ki monti algen ta kulpa Deus pa tudu sufrimentu ki ten na mundu?

6 Monti algen ta kulpa Deus pa tudu sufrimentu ki ten na mundu, pamodi es ta atxa ma é Deus ki sta ta governa mundu. Má nu prende na kapítlu 3, ma é Satanás ki sta ta manda na mundu.

7, 8. Kal ki é alguns di kes motivu di ten txeu sufrimentu?

7 Un di kes motivu di ten txeu sufrimentu é pamodi sima Bíblia ta fla-nu, ‘mundu interu sta na puder di Malvadu.’ (1 João 5:19) Satanás é un governanti violéntu i mau. El ‘sta ta ngana mundu interu’. (Apocalipse 12:9) Monti algen sta ta faze sima el. Pur isu, es mundu sta xeiu di mintira, ódiu i maldadi.

8 Otu motivu di ten txeu sufrimentu na mundu é pamodi pekadu. Adon ku Eva pasa pekadu pa tudu ses fidjus. Pamodi pekadu, pesoas ta poi otus algen ta  sufri. Es ta atxa ma es é más inportanti ki otus algen. Kel-li ta pô-s ta briga, ta ba pa géra i ta maltrata otus. (Eclesiastes 4:1; 8:9) Inda un otu motivu di ten txeu sufrimentu é pamodi ‘ténpu i inprevistu’ ô kuzas ki nu ka ta pode kontrola. (Eclesiastes 9:11) Asidentis i otus kuza mariadu ta kontise ku un algen pamodi el ta sta na mau lugar i na mau óra.

9. Pamodi ki nu pode ten sertéza ma Deus ten un bon motivu pa dexa sufrimentu kontise?

9 Sufrimentu nunka ka ta ben di Jeová. El é ka kulpadu, óras ki algen ta maltrata otus, ta géra i ta faze krimi. É ka Deus ki ta poi disgrasas kontise, sima tremor di téra, tenporal i txuba ki ta faze txeu stragu. Má talvês bu ta pergunta: ‘Si Jeová é Tudu-Poderozu pamodi ki el ta dexa kes kuza li kontise?’ Nu sabe ma Deus ta preokupa txeu ku nos. Nton, el debe ten un bon motivu pa dexa sufrimentu kontise. — 1 João 4:8.

PAMODI KI DEUS TA DEXA SUFRIMENTU KONTISE?

10. Kuzê ki Satanás fla kóntra Jeová na jardin di Éden?

10 Na jardin di Éden, Diabu ngana Adon ku Eva. Satanás fla-s ma Deus ka sta governaba dretu i ma el staba ta sukundi algun kuza ki éra bon pa Adon ku Eva. Satanás krê pa es kriditaba ma es ka mesteba di Deus pa governa-s i ma el ta governaba midjór ki Jeová. — Génesis 3:2-5; djobe párti PRENDE MÁS n27.

11. Ki pergunta nu meste responde?

11 Adon ku Eva ka obi ku Deus, es bira kóntra el. Es atxa ma es tinha direitu di disidi pa ses kabésa kuzê ki éra dretu i kuzê ki éra mariadu, pa es fazeba kel ki es  krê. Modi ki Deus ta provaba ma Adon ku Eva ka tinha razon?

12, 13. (a) Pamodi ki Jeová ka distrui Adon ku Eva lógu ki es peka? (b) Pamodi ki Jeová dexa Satanás i umanus governa?

12 Jeová ka distrui Adon ku Eva lógu ki es peka. Pamodi? Pamodi Jeová dja flaba es pa es tinha fidju i pa es intxiba Téra. Nton, Jeová dexa Adon ku Eva ten fidju i dipôs ses fidjus ta ben skodjeba si es ta obiba ku Deus ô ku Satanás. Jeová sénpri ta kunpri se vontadi, ka ta nporta kuzê ki Diabu tenta faze pa trapadja. — Génesis 1:28; Isaías 55:10, 11.

13 Satanás dizâfia Jeová na frénti di milhons di anju. (38:7; Daniel 7:10) Nton, Jeová da Satanás un ténpu pa el mostra modi ki el ta governaba pesoas. I el dexa umanus faze ses própi govérnu ku ajuda di Satanás. Jeová dexa kel-li kontise pa tudu algen fika ta sabe si ómis i Satanás ta governa midjór ki el ô nau.

14. Kuzê ki fika provadu na tudu es ténpu ki ómis ku Satanás sta governa?

14 Ninhun manera di governa ki ómis dja sprimenta tudu es ténpu ka da sértu. Kel-li ta prova ma Satanás é mintirozu. Umanus meste di ajuda di Jeová. Proféta Jeremias tinha razon kantu el fla: ‘Jeová, N sabe dretu ma ómi é ka donu di se kaminhu. Nen el é ka kapás di gia se kabésa.’ — Jeremias 10:23.

PAMODI KI TI INDA JEOVÁ STA TA SPÉRA?

15, 16. (a) Pamodi ki Jeová sta ta dexa sufrimentu kontise pa txeu ténpu? (b) Pamodi ki Jeová inda ka konpo kes kuza mariadu ki sta kontise?

15 Pamodi ki Jeová sta ta dexa sufrimentu kontise pa txeu ténpu? Pamodi ta leba ténpu pa sabe si un  govérnu é bon ô nau. I ténpu sta ta mostra ma govérnu di Satanás ka ta pode rezolve prublémas. Ómis dja sprimenta tudu tipu di govérnu, má ninhun di es ka da sértu. Nbóra siênsia i tekinolojia dja dizenvolve, má simé injustisa, pobréza, krimi i géra sta ta bira kada bês más txeu. Kel-li ta mostra klaru ma ómis ka ta konsigi governa ses kabésa sen ajuda di Deus. Má pamodi ki Deus ka ta kaba peloménus ku disgrasas?

16 Deus ka ta faze kel-li. Pamodi si el konpo kes kuza mariadu el sta ta djuda Satanás governa. I asi, ómis pode pensa ma es sta ta governa dretu sen ajuda di Deus. Má kel-li é mintira. Jeová nunka ka ta djuda Diabu nen el ka ta poi pesoas ta kridita na mintira. — Hebreus 6:18.

17, 18. Modi ki Jeová ta ben konpo tudu kes kuza mariadu ki Satanás faze?

17 Jeová pode konpo tudu kes kuza mariadu ki Satanás i algen dja faze? Sin. Deus ta pode faze tudu kuza. Jeová sabe na ki ténpu ki ta fika provadu ma Satanás é mintirozu. Dipôs Jeová ta ben faze Téra bira un paraízu, sima el kreba désdi komésu. Kes algen ki móre ta ben vive otu bês. (João 5:28, 29) Duénsa ku mórti ka ta ben ten más. Jeová ta ben uza Jizus pa konpo tudu kes kuza mariadu ki Satanás faze. (1 João 3:8) Nu ta fika kontenti pamodi paxénxa di Jeová dexa kuzas txiga ti nos ténpu i gósi nu ten xansi di konxe-l i disidi si nu ta obi ku el. (Lé 2 Pedro 3:9, 10.) É klaru ki ti inda nu sta sufri. Má Jeová ta da-nu forsa pa nu aguenta prublémas. — João 4:23; lé 1 Coríntios 10:13.

 18 Jeová ka ta obriga ningen pa obi ku el. El faze-nu di manera ki nu ta pode skodje kuzê ki nu krê faze. Nu ben odja modi ki kel-li é un grandi prezenti ki Jeová da-nu.

KUZÊ KI BU TA DISIDI?

19. (a) Ki prezenti Jeová da-nu? (b) Pamodi ki es prezenti ta pô-nu fika kontenti?

19 Nos é ka sima animal ki ka ten kapasidadi di pensa. (Provérbios 30:24) Tanbê nos é ka sima mákina, ki meste di un algen pa kontrola-l. Jeová da-nu liberdadi pa nu skodje kuzê ki nu krê, pamodi el krê pa nu ser filís. Asi, nu ta konsigi skodje ki tipu di algen ki nu ta ser, ken ki ta ser nos amigu i kuzê ki nu ta faze na nos vida. Jeová sabe ma es liberdadi ta dexa-nu filís.

20, 21. Kal ki é midjór disizon ki bu pode toma na bu vida?

20 Jeová krê pa nu ama-l. (Mateus 22:37, 38) El ka krê pa nu sirbi-l kóntra nos vontadi. El da-nu liberdadi pa nu disidi kuzê ki nu krê. Tudu pai ta fika kontenti óras ki se fidju ta fla-l di korason: “Papá N ta ama-u”. Jeová tanbê ta fika kontenti óras ki nu ta skodje ama-l i sirbi-l. Satanás i Adon ku Eva disidi na ka obi ku Jeová. I bo? Kuzê ki bu ta disidi faze?

21 Midjór disizon ki bu pode toma é sirbi Jeová. Milhons di algen dja disidi faze vontadi di Deus i es nega sigi Satanás. (Provérbios 27:11) Sima dja nu prende, Deus sta ben kaba ku tudu sufrimentu i el sta ben bira Téra un paraízu. Kuzê ki nu meste faze pa nu sta la? Na kapítlu 12 nu ta ben sabe respósta di kel pergunta li.