Bai pa asuntu

Bai pa sugundu menu

Bai pa lista di asuntu

Tistimunhas di Jeová

Kabuverdianu

Kuzê ki nu pode prende na Bíblia?

 KAPÍTLU 14

Bu família pode ser filís

Bu família pode ser filís

1, 2. Modi ki Jeová krê pa famílias ser?

JEOVÁ DEUS faze primeru mudjer i el da Adon el pa ser se spoza. Asi el faze primeru kazamentu. Adon fika rei di kontenti, ki el fla: ‘Kel-li é osu di nha osu i karni di nha karni.’ (Génesis 2:22, 23) Kel-li ta mostra-nu ma Jeová krê pa famílias ser filís.

2 É tristi di odja ma txeu algen nunka ka tevi un família filís. Má Bíblia ten txeu konsedju ki pode djuda famílias ser filís. I el ta fla kuzê ki maridu, mudjer i fidjus debe faze pa djuda un família ser filís. — Lucas 11:28.

KONSEDJUS KI DEUS TA DA PA MARIDU

3, 4. (a) Modi ki maridu debe trata se mudjer? (b) Pamodi ki é inportanti maridu ku mudjer púrdua fadjas di kunpanheru?

3 Bíblia ta fla ma un bon maridu debe trata se mudjer ku amor i ruspetu. Efésios 5:25-29. Maridu debe trata se mudjer sénpri ku amor. Tanbê el debe proteje-l i kuida di el. I el ka debe faze nada ki ta prujudika se mudjer.

4 Má kuzê ki maridu debe faze óras ki se mudjer faze algun kuza mariadu? Bíblia ta da konsedju: ‘Kontínua ta ama bu mudjer i ka bu sai di kabésa ku el.’ (Colossenses 3:19) Si bo é un bon maridu, bu ta lenbra ma bo tanbê bu ta faze kuzas mariadu. I si bu krê pa Deus purdua-u, bu meste púrdua bu mudjer.  (Mateus 6:12, 14, 15) Kazamentu ta ser filís óras ki maridu ku mudjer ta púrdua fadjas di kunpanheru.

5. Pamodi ki maridu debe ruspeta se mudjer?

5 Jeová krê pa maridu ruspeta se mudjer. El debe preokupa ku nisisidadis di se mudjer. Kel-li é un asuntu sériu. Si maridu ka trata se mudjer dretu, Jeová pode ka obi se orason. (1 Pedro 3:7) Pa Jeová ómi ku mudjer é igual. Tudu algen ki ta ama Deus é inportanti pa el.

6. Modi ki maridu ku mudjer pode bira ‘un karni sô’?

6 Jizus splika ma maridu ku mudjer ‘ta dexa di ser dôs, i es ta bira un karni sô.’ (Mateus 19:6) Es debe ser lial ku kunpanheru i nunka es ka debe ranja otu algen. (Provérbios 5:15-21; Hebreus 13:4) Na asuntu di séksu, maridu ku mudjer debe preokupa ku interesi di kunpanheru i nunka es ka debe pensa sô na ses kabésa. (1 Coríntios 7:3-5) Maridu debe lenbra ma ‘ninhun ómi nunka ka ôdia se própi korpu, má el ta alimenta-l i el ta kuida di el’. Nton maridu debe ama se mudjer i mima-l. Kuzê ki un mudjer más ta krê é un maridu ki ta trata-l dretu i ki ta ama-l. — Efésios 5:29.

KONSEDJUS KI DEUS TA DA PA MUDJER

7. Pamodi ki família meste ten un xéfi ô kabésa?

7 Tudu família meste ten un xéfi ô un kabésa pa toma disizon i pa da orientason. Asi es ta fika unidu ku kunpanheru. 1 Coríntios 11:3 ta fla: ‘Kabésa di tudu ómi é Kristu, kabésa di mudjer é ómi i kabésa di Kristu é Deus.’

8. Modi ki mudjer ta mostra ma el ta ruspeta se maridu di korason?

 8 Bíblia ta fla: ‘Mudjer debe ruspeta se maridu di korason.’ (Efésios 5:33) Ninhun maridu é ka perfetu i el pode fadja na toma disizon. Má mudjer ta mostra ruspetu pa maridu óras ki el ta apoia-l na disizon ki el ta toma i óras ki el ta djuda-l di korason. Asi tudu algen na família ta ganha. (1 Pedro 3:1-6) I si maridu ka ta sigi mésmu relijion ki se mudjer? Má simé mudjer debe ruspeta-l. Bíblia ta fla: ‘Di mésmu manera, abo, mudjer, obi ku bu maridu, asi, si el ka seta palavra, bu ta ganha-l sen palavra, através di konportamentu di se mudjer, pamodi el odja ku se odju bu konportamentu puru, djuntu ku ruspetu di korason.(1 Pedro 3:1, 2) Si mudjer trata se maridu ku ruspetu, kel-li pode djuda kel maridu ntende i ruspeta kuzas ki mudjer krê faze pa Deus.

9. (a) Kuzê ki mudjer debe faze óras ki el ka ta konkorda ku se maridu? (b) Ki konsedju Bíblia ta da mudjer na Tito 2:4, 5?

9 Kuzê ki mudjer debe faze óras ki el ka ta konkorda  ku se maridu? El debe da se opinion, má sénpri ku ruspetu. Pur izénplu, Sara fla un kuza ki Abraon ka konkorda. Má Jeová fla Abraon: ‘Obi kuzê ki [Sara] sta fla.’ (Génesis 21:9-12) Sénpri ki maridu toma un disizon mudjer debe ruspeta i apoia se disizon, désdi ki kel disizon ka ta pô-l faze nada kóntra vontadi di Deus. (Atos 5:29; Efésios 5:24) Un bon mudjer ta faze txeu kuza pa kuida di se família. (Lé Tito 2:4, 5.) Óras ki se maridu i se fidjus ta odja tudu kuza ki el ta faze pa es, es ta ama-l i es ta ruspeta-l inda más txeu. — Provérbios 31:10, 28.

Pamodi ki Sara é un bon izénplu pa mudjeris?

10. Kuzê ki Bíblia ta fla sobri siparason i divórsiu?

10 Oji, txeu maridu ku mudjer ta sipara ô ta divôrsia pamodi kalker kuza. Má, Bíblia ta fla ma ‘mudjer ka debe sipara di maridu’ i ma ‘maridu ka debe larga se mudjer.’ (1 Coríntios 7:10, 11) Ten alguns situason gravi ki pode poi un algen ta sipara di se maridu ô di se mudjer, má kel-li é un disizon mutu sériu. I sobri divórsiu? Bíblia ta fla ma algen pode divôrsia sô si se maridu ô se mudjer faze séksu ku un otu algen. — Mateus 19:9.

KONSEDJUS KI DEUS TA DA PA PAI KU MAI

Jizus é un bon izénplu pa tudu algen na família

11. Kuzê ki fidjus meste más ki kalker otu kuza?

11 Pai ku mai debe pasa tudu ténpu ki es pode ku ses fidjus. Nhos fidjus meste nhos más ki kalker otu kuza. Es meste pa nhos inxina-s sobri Jeová. — Deuteronómio 6:4-9.

12. Kuzê ki pai ku mai meste faze pa proteje ses fidjus?

12 Mundu di Satanás sta ta bira kada bês más prigozu. Ten algen mau ki pode krê prujudika nos fidjus, i  ti es ta krê viola-s. Alguns pai ku mai ka ta xinti avontádi pa pâpia ku ses fidjus sobri kes asuntu li. Má pai ku mai ten responsabilidadi di aviza ses fidjus sobri kes prigu li. Pai ku mai debe inxina ses fidjus modi ki es ta difende, si kes algen mau tenta faze-s algun kuza. Si nhos ten fidjus, nhos meste proteje-s. * — 1 Pedro 5:8.

13. Modi ki pai ku mai pode inxina ses fidjus konporta?

13 Pai ku mai ten responsabilidadi di inxina ses  fidjus modi ki es debe konporta. Modi ki nhos pode inxina nhos fidjus? Nhos meste inxina-s kuzas dretu, má nunka nhos ka debe ser duru óras ki nhos ta koriji-s. (Jeremias 30:11) Nunka ka nhos kastiga nhos fidjus óras ki nhos sta ku raiba. Nhos ka krê pa nhos palavras mágua nhos fidjus sima ‘kórti di un spada’. (Provérbios 12:18) Nhos djuda nhos fidjus ntende pamodi ki es meste obi ku nhos, óras ki nhos pâpia ku es. — Efésios 6:4; Hebreus 12:9-11; djobe párti PRENDE MÁS n30.

KONSEDJUS KI DEUS TA DA PA FIDJUS

14, 15. Pamodi ki fidjus debe obi ku ses pai i ku ses mai?

14 Jizus sénpri obi ku se Pai, mésmu na momentus difísil. (Lucas 22:42; João 8:28, 29) Jeová krê pa fidjus obi ku ses mai ku ses pai. — Efésios 6:1-3.

15 Fidjus, alvês nhos ta atxa ma é difísil obi ku nhos pai ô ku nhos mai. Má nhos lenbra ma si nhos obi ku es, Jeová ta fika kontenti i nhos pai ku nhos mai tanbê ta fika kontenti. * — Provérbios 1:8; 6:20; 23:22-25.

Kuzê ki pode djuda un jóven faze kuzas dretu óras ki otus algen krê pa el faze kuzas mariadu?

16. (a) Ken ki Satanás pode uza pa poi un jóven faze kuzas mariadu? (b) Pamodi ki é inportanti ranja amigus ki ta ama Jeová?

16 Diabu pode uza bus amigu i otus jóven pa tenta pô-u faze kuzas mariadu. El sabe ma preson di kolégas pode ser fórti. Pur izénplu, Diná ki éra fidju-fémia di Jakó tinha amigus ki ka ta amaba Jeová. Kel-li traze txeu prubléma pa el i pa se família. (Génesis 34:1, 2) Si bus amigu ka ta ama Jeová, es pode pô-u faze algun kuza ki Jeová ka gosta. Kel-li ta traze txeu  dór pa bo, pa bu família i ta poi Jeová fika tristi. (Provérbios 17:21, 25) Pur isu, é rei di inportanti bu ranja amigus ki ta ama Jeová. — 1 Coríntios 15:33.

BU FAMÍLIA PODE SER FILÍS

17. Kal ki é responsabilidadi di kada un na família?

17 Óras ki tudu algen na família sigi kes konsedju ki Deus ta da, es ta ivita txeu prubléma. Nton si bo é maridu, ama bu mudjer i mostra-l bu amor. Si bo é mudjer, ruspeta bu maridu i obi ku el. Imita izénplu di kel mudjer ki sta na Provérbios 31:10-31. Si nhos ten fidjus, inxina-s ama Deus. (Provérbios 22:6) Si bo é pai kuida dretu di bu família. (Timóteo 3:4, 5; 5:8) I fidjus, nhos obi ku nhos pai i ku nhos mai. (Colossenses 3:20) Lenbra ma ningen na família é ka perfetu. Pur isu, é inportanti nu ser umildi i pidi kunpanheru perdon. Na Bíblia nu ta atxa bons konsedju ki Deus ta da pa tudu algen na família.

^ par. 12 Nhos pode atxa más informason sobri modi ki nhos ta proteje nhos fidjus na kapítlu 32 di livru Aprenda do Grande Instrutor, na purtugês, fazedu pa Tistimunhas di Jeová.

^ par. 15 Un fidju ka ten ki obi ku se pai ô ku se mai óras ki es ta pidi-l pa el faze un kuza ki ta bai kóntra lei di Deus. — Atos 5:29.