Bai pa asuntu

Bai pa sugundu menu

Bai pa lista di asuntu

Tistimunhas di Jeová

Kabuverdianu

Kuzê ki nu pode prende na Bíblia?

 KAPÍTLU 1

Ken ki é Deus?

Ken ki é Deus?

1, 2. Ki perguntas nu ta kustuma faze?

KRIANSAS gosta di faze txeu pergunta. Bu pode ti splika-s alguns kuza, má kuazi sénpri es ta pergunta: ‘Pamodi?’ I óras ki bu ta tenta da-s un respósta, talvês es ta torna pergunta: ‘Má pamodi?’

2 Ka ta nporta si nos é pikinoti ô grandi, nos tudu nu ten perguntas pa nu faze. Nu ta faze perguntas sobri kuzê ki nu ta kume, kuzê ki nu ta bisti ô kuzê ki nu ta kunpra. Ô nu ta faze perguntas sobri kuzas inportanti sima kuzê ki ta ser di nos vida i nos futuru. Má, si respóstas ki nu atxa ta pô-nu ku más dúvida inda, talvês nu ta para di djobe respóstas.

3. Pamodi ki txeu algen ta pensa ma es ka ta konsigi atxa respóstas pa ses pergunta inportanti?

3 Bíblia ten respóstas pa perguntas inportanti ki nu ta faze? Alguns algen ki ta pensa ma sin, ta atxa ma Bíblia é mutu difísil di ntende. Talvês es ta atxa ma é sô profesoris, padris ô pastoris ki ten respóstas. I otus algen ta xinti txeu vergónha di fla ma es ka sabe respósta. I bo? Kuzê ki bu ta atxa?

4, 5. Ki perguntas inportanti bu ten? Pamodi ki bu debe kontínua ta djobe respóstas?

4 Talvês bu krê sabe respóstas pa perguntas sima: ‘Pamodi ki N sta na mundu? Kuzê ki ta kontise ku mi óras ki N móre? Modi ki Deus é?’ Jizus, un instrutor txeu konxedu, fla: ‘Nhos kontínua ta pidi, nhos ta dadu; nhos kontínua ta djobe, nhos ta atxa; nhos  kontínua ta konku, nhos ta abridu pórta.’ (Mateus 7:7) Ka bu dizisti ti ki bu atxa respóstas ki bu pode kúnfia na es.

5 Bu pode ten sertéza ma si bu ‘kontínua ta djobe’ bu ta atxa respóstas na Bíblia. (Provérbios 2:1-5) Respóstas é ka mutu difísil di ntende. Kuzê ki bu ta prende ta djuda-u ser filís gósi i ta da-u un speransa rei di sábi pa futuru. Pa kumesa, nu ben pâpia di un pergunta ki ta baradja txeu algen kabésa.

DEUS TA PREOKUPA KU NOS Ô EL É MAU?

6. Pamodi ki alguns algen ta atxa ma Deus ka ta preokupa ku ses sufrimentu?

6 Monti algen ta atxa ma Deus ka ta preokupa ku nos. Es ta atxa ma, si Deus ta preokupaba ku nos dimé-divéra, mundu ta sérba diferenti. Na mundu interu nu sta ta odja géra, violénsia i mizéria. Pesoas ta fika duenti, es ta sufri i es ta móre. Alguns ta pergunta: ‘Si Deus ta preokupa ku nos, pamodi ki el ka ta kaba ku tudu sufrimentu?’

7. (a) Modi ki xéfis di relijion ta poi pesoas ta pensa ma Deus é mau? (b) Pamodi ki nu pode ten sertéza ma Deus é ka kulpadu pa kuzas mariadu ki ta kontise?

7 Alvês xéfis di relijion ta poi pesoas ta kridita ma Deus é mau. Óras ki ta kontise un disgrasa, es ta fla ma é vontadi di Deus. Es ta fla ma é Deus ki krê pa kel-la kontise. Óras ki es ta fla si, es sta ta poi kulpa na Deus. Má Bíblia ta inxina ma kuzas mariadu nunka ka ta ben di Deus. Tiago 1:13 ta fla-nu ma Deus ka ta sprimenta ningen ku kuzas mariadu. El ta fla: ‘Óras ki algen sta pasa pa frónta, el ka debe fla:  ‘É Deus ki tene-m na frónta.’ Pamodi, pa kuzas mariadu, Deus ka ta podu na frónta, nen el ka ta fronta ningen.’ Kel-li krê fla ma mésmu ki Deus ta dexa kuzas mariadu kontise, nunka el ka ta pô-nu ta sufri. (Lé 34:10-12.) Nu ben odja un izénplu.

8, 9. Pamodi ki é ka justu kulpa Deus pa nos prublémas? Da un izénplu.

8 Imajina un fidju ki ta mora djuntu ku se pai ku se mai. Se pai ta gosta txeu di el i ta inxina-l toma bons disizon. Má kantu el kria el rabela kóntra se pai i el sai di kaza. El faze kuzas mariadu i el poi se kabésa na prubléma. Bu ta kulpaba se pai pa kuzas ki kontise pamodi el ka inpidi se fidju di sai di kaza? Klaru ki nau! (Lúkas 15:11-13, Bíblia na Prugrésu di Traduson pa Lingua Kabuverdianu, BPK.) Sima es pai li, Deus tanbê ka tadja umanus kantu es skodje rabela kóntra el i faze kuzas mariadu. Nton, óras ki un kuza mariadu kontise, nu debe lenbra ma é ka Deus ki ta pô-l kontise. Poi kulpa na Deus é un grandi injustisa.

9 Deus ten un bon motivu pa dexa kuzas mariadu kontise. Na kapítlu 11, bu ta ben prende kuzê ki Bíblia ta fla sobri kel-li. Má, bu pode ten sertéza ma Deus ta ama-nu i ma el ka ten ninhun kulpa di prublémas ki nu ta sufri. Aliás, é sô el ki ta pode kaba ku nos prublémas. — Isaías 33:2.

10. Pamodi ki nu pode ten sertéza ma Deus ta ben konpo tudu kes disgrasa ki algen mau dja faze?

10 Deus é santu. (Isaías 6:3) Tudu kuza ki el ta faze é puru, linpu i dretu. Nton nu pode kúnfia na el. Má nen sénpri nu pode kúnfia na pesoas. Txeu bês es ta faze kuzas mariadu. Nen kes governanti más onéstu  ka ten puder di konpo tudu kes disgrasa ki algen mau ta faze. É sô Deus ki ten es puder. El pode i el ta ben konpo tudu kes disgrasa ki algen mau sta ta faze. El ta ben kaba ku maldadi pa tudu ténpu. — Lé Salmo 37:9-11.

MODI KI DEUS TA XINTI ÓRAS KI ALGEN TA SUFRI?

11. Modi ki Deus ta xinti óras ki nu ta sufri?

11 Modi ki Deus ta xinti óras ki el ta odja kuzas ki sta pasa na mundu? Modi ki el ta xinti óras ki nu ta sufri? Bíblia ta fla ma Deus ta ‘ama justisa.’ (Salmo 37:28) Nton, el gosta di kuzas dretu i el ka gosta di kuzas mariadu. El ta ôdia odja pesoas ta sufri. Bíblia ta fla di un ténpu ki ‘el xinti tristi na se korason’, kantu el odja ma mundu staba xeiu di maldadi. (Génesis 6:5, 6) Deus ka muda. (Malaquias 3:6) Bíblia ta fla ma Deus ta preokupa txeu ku bo. — Lé 1 Pedro 5:7.

Bíblia ta inxina ma Jeová é Kriador xeiu di amor ki faze Séu ku Téra

12, 13. (a) Pamodi ki nu ta ama i nu ta nporta ku otus, i modi ki nu ta xinti óras ki nu ta odja sufrimentu na mundu? (b) Pamodi ki nu pode ten sertéza ma Deus ta ben kaba ku tudu sufrimentu i injustisa?

12 Bíblia tanbê ta fla ma Deus faze-nu ta parse ku el. (Génesis 1:26) Kel-li krê fla ma Deus faze-nu ku kes mésmu kualidadi bunitu ki el ten. Nton, si bu ta xinti ka sábi óras ki bu ta odja algen ki ka ten kulpa ta sufri, bu pode ten sertéza ma Deus tanbê ta xinti mutu más tristi. Modi ki nu sabe kel-li?

13 Bíblia ta inxina-nu ma ‘Deus é amor.’ (1 João 4:8) Amor é bazi di tudu kuza ki Deus ta faze. Nton nu ta ama pamodi Deus ta ama. Pensa na kel-li: si bu tinha puder, bu ka ta kababa ku tudu sufrimentu i  injustisa ki ten na mundu? É klaru ki bu ta fazeba el, pamodi bu ten amor pa pesoas. I Deus? El ten puder i pamodi el ta ama-nu, el ta ben kaba ku tudu sufrimentu i injustisa. Bu pode ten sertéza ma tudu kes promésa di Deus ki sta na komésu di es livru ta ben kontise. Má pa bu kúnfia na es promésa bu meste konxe Deus midjór.

DEUS KRÊ PA BU KONXE-L

Si bu krê ser amigu di un algen bu ta fla-l bu nómi. Deus ta uza Bíblia pa fla-nu se nómi

14. Kal ki é nómi di Deus i modi ki nu sabe ma nu debe uza-l?

14 Si bu krê ser amigu di un algen, kal ki é primeru kuza ki bu ta kustuma fla-l? É klaru ki é bu nómi. Dja bu sabe nómi di Deus? Monti relijion ta fla ma se nómi é Deus ô Sinhor. Má kes-la é ka nómi. Es é sima óras ki bu ta txoma un algen di “rei” ô “prizidenti”, má kel-la tanbê é ka se nómi. Deus fla-nu ma se nómi é Jeová. Salmo 83:18 ta fla: ‘Pa pesoas sabe ma bu nómi é Jeová, sô bo é Kel Más Grandi riba Téra interu.’ Kes ómi ki skrebe Bíblia, es uza nómi di Deus más di 7 mil bês. Jeová krê pa bu sabe se nómi i pa bu uza-l. El ta fla-u se nómi pa bu pode ser se amigu.

15. Kuzê ki nómi Jeová krê fla?

 15 Nómi di Deus, Jeová, ten un grandi siginifikadu. Es nómi krê fla ma Deus pode kunpri kalker promésa ki el faze i el pode faze tudu ki é se vontadi. Ka ten nada ki ta tadja-l di faze se vontadi. Sô Jeová é ki pode ten es nómi. *

16, 17. Kuzê ki Bíblia krê fla óras ki el ta txoma Deus di (a) ‘Tudu-Poderozu’? (b) ‘Rei pa tudu ténpu’? (c) ‘Kriador’?

 16 Sima dja nu lé antis, Salmo 83:18 ta fla sobri Jeová: ‘Sô bo ki é Kel Más Grandi’. Tanbê, Apocalipse 15:3 ta fla: ‘Bus óbra é grandi i maravilhozu Jeová Deus, ki é Tudu-Poderozu. Bus kaminhu é justu i verdaderu, Rei pa tudu ténpu.’ Kuzê ki palavra ‘Tudu-Poderozu’ krê fla? El krê fla ma Jeová é más poderozu ki kalker algen na Séu i na Téra. I ‘Rei pa tudu ténpu’ krê fla ma Jeová sénpri izisti. Salmo 90:2 ta splika ma el é Deus di ‘tudu ténpu’ pa ‘tudu ténpu’. Kel-li é un kuza ki ta poi algen ta fika spantadu!

17 Sô Jeová ki é Kriador. Apocalipse 4:11 ta fla: ‘Jeová nos Deus bo ki merese resebe glória, ónra i puder, pamodi bu kria tudu kuza i pa bu vontadi es pasa  ta izisti i es kriadu.’ Kuzas ki ta izisti sima, anjus, strélas ki ta sta na Séu, frutas ki ta sta na arvis, pexi ki ten na mar i tudu otus kuza ki bu pode pensa na el — é Jeová ki faze.

BU PODE SER AMIGU DI JEOVÁ?

18. Pamodi ki alguns algen ta atxa ma nunka es ka ta pode ser amigu di Deus? Kuzê ki Bíblia ta fla sobri kel-li?

18 Óras ki alguns algen lé sobri kes kualidadi maravilhozu ki Jeová ten, es ta xinti medu i es ta pensa: ‘Deus é mutu poderozu, mutu inportanti i el sta mutu lonji. Pamodi ki el ta ben preokupa ku mi?’ Má é si ki Deus krê pa nu xinti? Klaru ki nau. Jeová krê pa nu ser se amigu. Bíblia ta fla ma Deus “ka sta lonji di kada un di nos.” (Atus 17:27, BPK) Deus krê pa bu ser se amigu, i el ta promete ma ‘el ta ser bu amigu.’ — Tiago 4:8.

19. (a) Modi ki bu pode bira amigu di Deus? (b) Di kes kualidadi di Jeová, kal ki más bu gosta?

19 Modi ki bu pode ser amigu di Deus? Jizus fla: ‘Vida itérnu é kel-li: pa es konxe-u abo, úniku Deus verdaderu, i kel ki bu manda, Jizus Kristu.’ (João 17:3) Kontínua ta studa Bíblia i bu ta konxe Jeová i Jizus. I dipôs bu ta ganha vida itérnu. Pur izénplu, dja nu prende ma ‘Deus é amor’. (1 João 4:16) Má tanbê el ten monti otus kualidadi. Bíblia ta fla-nu ma Jeová ten ‘mizerikórdia, konpaxon, paxénxa i el é xeiu di amor lial i di verdadi’. (Êxodo 34:6; 2 Pedro 3:9) Jeová é bon i el sta ‘prontu pa púrdua.’ (Salmo 86:5) Deus é lial. (Apocalipse 15:4) Sima bu ta ba ta lé sobri Jeová na Bíblia, bu ta prende más sobri se kualidadis.

20, 21. Modi ki bu pode ser amigu di Deus si bu ka ta konsigi odja-l?

 20 Modi ki bu pode ser amigu di Deus si bu ka ta konsigi odja-l? (João 1:18; 4:24; 1 Timóteo 1:17) Óras ki bu lé sobri Jeová na Bíblia, el ta pasa ta ser un algen rial pa bo, ki ta izisti própi. (Salmo 27:4; Romanos 1:20) Sima bu ta ba ta prende sobri Jeová, bu amor pa el ta omenta i bu amizadi ku el ta bira más fórti.

Un pai ta ama se fidjus, má nos Pai na Séu ta ama-nu inda más txeu

21 Bu ta pasa ta ntende ma Jeová é nos Pai. (Mateus 6:9) El da-nu vida i el krê pa nu ten un vida filís. É kel-la ki un pai xeiu di amor ta krê pa se fidjus. (Salmo 36:9) Sin, Bíblia ta inxina ma bu pode bira amigu di Jeová. (Tiago 2:23) Imajina kel-li: Jeová, Kriador di Séu ku Téra, krê pa bu ser se amigu!

22. Kuzê ki bu debe faze si algen ka krê pa bu studa Bíblia?

22 Alguns algen pode ka krê pa bu studa Bíblia. Es pode xinti medu di bu muda di relijion. Má ka bu dexa ningen inpidi-u di bira amigu di Jeová. El é midjór Amigu ki bu pode ten.

23, 24. (a) Pamodi ki bu debe kontínua ta faze perguntas? (b) Kuzê ki nu ta ben sabe na kapítlu 2?

23 Sima bu ta ba ta studa Bíblia, ta ben ten kuzas ki bu ka ta ntende. Má ka bu xinti vergónha di faze perguntas ô di pidi ajuda. Jizus fla ma nu debe ser umildi, sima un kriansa. (Mateus 18:2-4) I kriansas gosta di faze txeu pergunta. Deus krê pa bu atxa respóstas. Nton, studa Bíblia ku atenson pa bu pode ten sertéza ma kel ki bu sta prende é verdadi. — Lé Atus 17:11, BPK.

24 Studa Bíblia é midjór manera di prende sobri Jeová. Na kapítlu 2 nu ta ben sabe pamodi ki Bíblia é un livru diferenti di tudu kes otu.

^ par. 15 Si na bu Bíblia ka ten nómi Jeová ô si bu krê sabe más sobri siginifikadu i modi ki ta fladu nómi di Deus, favor djobe párti PRENDE MÁS n1.