Bai pa asuntu

Bai pa sugundu menu

Bai pa lista di asuntu

Tistimunhas di Jeová

Kabuverdianu

Kuzê ki nu pode prende na Bíblia?

 KAPÍTLU 17

Deus ta obi tudu tipu di orason?

Deus ta obi tudu tipu di orason?

‘Kel ki faze Séu ku Téra’ krê obi nos orason. — Salmo 115:15

1, 2. (a) Pamodi ki nu pode fla ma orason é prezenti spesial ki Jeová da-nu? (b) Pamodi ki nu meste sabe kuzê ki Bíblia ta fla sobri orason?

JEOVÁ faze Séu ku Téra i tudu ki ta izisti na es. Nton, é faxi ntende pamodi ki Bíblia ta fla ma pa Jeová tudu algen é sima un pinginhu di agu. (Salmo 115:15; Isaías 40:15) Konparadu ku Séu ku Téra nos é pikinoti. Má simé Salmo 145:18, 19 ta fla: ‘Jeová sta pértu di tudu kes ki ta pâpia di el, di tudu kes ki ta pâpia verdadi di el. El ta faze vontadi di tudu kes algen ki ten grandi ruspetu pa el, El ta obi-s óras ki es pidi ajuda i el ta libra-s.’ Kel-li é un priviléjiu grandi ki nu ten! Jeová, ki é Kriador Tudu-Poderozu, krê pa nu ser se amigu i el krê obi nos orason. Orason é un prezenti spesial ki Jeová ta da pa tudu nos.

2 Má Jeová ta obi nos orason, sô si nu faze-l di manera ki el ta seta. Nton, modi ki nu debe faze orason? Nu ben odja kuzê ki Bíblia ta fla sobri orason.

PAMODI KI NU DEBE FAZE ORASON?

3. Pamodi ki bu debe faze orason pa Jeová?

3 Jeová krê pa nu pâpia ku el na orason. Modi ki nu sabe kel-li? Favor Filipenses 4:6, 7. Pensa na es konviti ki Jeová ta faze-u ku amor. El ki é Kriador di Séu ku Téra, krê pa nu pâpia ku el sobri nos prublémas i modi ki nu ta xinti.

4. Pamodi ki faze orason pa Jeová tudu óra ta djuda bu amizadi ku el fika más fórti?

 4 Faze orason ta djuda-nu bira amigu di Jeová. Óras ki dôs amigu ta pâpia ku kunpanheru sénpri sobri kuzê ki es ta pensa, ses prublémas i kuzê ki es ta xinti, ses amizadi ta fika más fórti. Ta kontise mésmu kuza óras ki nu ta faze orason pa Jeová. Através di Bíblia, el ta fla-nu kuzê ki el ta pensa, kuzê ki el ta xinti i kuzê ki el ta ben faze na futuru. Tudu óra bu pode pâpia ku el sobri tudu ki bu ta xinti na fundu di korason. Óras ki bu faze si, bu amizadi ku Jeová ta ba ta fika más fórti. — Tiago 4:8.

KUZÊ KI NU MESTE FAZE PA DEUS OBI NOS ORASON?

5. Modi ki nu sabe ma Jeová ka ta obi tudu orason?

5 Jeová ta obi tudu orason? Nau, el ka ta obi. Na ténpu di proféta Izaías, Jeová fla israelitas: ‘Mésmu ki nhos faze txeu orason, N ka ta obi; nhos mô sta xeiu  di sangi.’ (Isaías 1:15) Kel-li ta mostra ma, si nu faze kuzas ki Jeová ta ôdia, el pode dexa di obi nos orason.

6. (a) Pamodi ki fé é inportanti? (b) Modi ki nu ta prova ma nu ten fé?

6 Si nu krê pa Jeová obi nos orason, nu meste ten fé na el. (Marcos 11:24) Apóstlu Polu splika: ‘Sen fé nu ka ta pode agrada Deus, pamodi ken ki ta txiga pértu di Deus ten ki kridita ma el izisti i ki el ta rekonpensa kes ki ta djobe-l di korason.’ (Hebreus 11:6) Má sô fla ma nu ten fé na el ka ta txiga. Nu meste prova nos fé óras ki nu ta obi ku Jeová tudu dia. — Tiago 2:26.

7. (a) Pamodi ki nu meste ser umildi i mostra ruspetu óras ki nu ta ora pa Jeová? (b) Modi ki nu pode mostra ma nu sta pâpia di korason óras ki nu ta faze orason?

7 Nu meste ser umildi i mostra ruspetu óras ki nu ta ora pa Jeová. Pamodi? Imajina ma nu sta ta pâpia ku un rei ô ku un prizidenti. Nu ta pâpia ku el ku txeu ruspetu. Jeová é Deus Tudu-Poderozu. Nton, nu debe ser más umildi i mostra más ruspetu óras ki nu ta pâpia ku el. (Génesis 17:1; Salmo 138:6) Tanbê nu debe fla kel ki nu sta ta xinti na korason. Nu ta mostra kel-li óras ki nu ta faze orason di korason, envês di ripiti sénpri mésmu palavra. — Mateus 6:7, 8.

8. Kuzê ki nu meste faze dipôs ki nu pidi Jeová algun kuza na orason?

8 Tanbê, dipôs di faze orason, nu meste aji di akordu ku kel ki nu pidi. Pur izénplu, si nu pidi Jeová pa djuda-nu ten sustentu, nu ka pode fika xintadu ku mô maradu, ta spéra pa Jeová da-nu tudu kuza ki nu meste. Nu meste sforsa pa nu trabadja, i seta kalker tipu di trabadju ki nu ta konsigi faze. (Mateus 6:11; 2 Tessalonicenses 3:10) Tanbê, si nu pidi Jeová  pa djuda-nu ka faze un kuza mariadu, nu meste ivita kalker situason ki pode pô-nu na tentason. (Colossenses 3:5) Nu ben odja alguns pergunta ki pesoas ta faze sobri orason.

ALGUNS PERGUNTA SOBRI ORASON

9. (a) Pa kenha ki nu debe faze orason? (b) Kuzê ki João 14:6 ta inxina-nu sobri Jeová?

9 Pa kenha ki nu debe faze orason? Jizus inxina se sigidoris pa faze orason pa ‘nos Pai ki sta na Séu.’ (Mateus 6:9) Tanbê el fla: ‘Ami é kaminhu, verdadi i vida. Ningen ka ta txiga na Pai si ka é através di mi.’ (João 14:6) Nton, nu debe faze orason sô pa Jeová na nómi di Jizus. Pamodi ki nu debe faze orason na nómi di Jizus? Pa Jeová seta nos orason, nu meste mostra ma nu ta ruspeta kuzê ki Jizus faze pa nos. Sima dja nu prende, Jeová manda Jizus pa Téra pa salva-nu di pekadu ku mórti. (João 3:16; Romanos 5:12) Tanbê, Jeová skodje Jizus pa ser Saserdóti Prinsipal i pa faze julgamentu. — João 5:22; Hebreus 6:20.

Bu pode faze orason tudu óra

10. Nu meste fika na algun puzison spesial pa faze orason? Splika.

10 Nu meste fika na algun puzison spesial pa faze orason? Nau. Jeová ka ta pidi-nu pa nu fika di duedju, xintadu ô sakédu óras ki nu ta faze orason. Bíblia ta inxina-nu ma nu pode pâpia ku Jeová na kalker puzison ki ta mostra ruspetu. (1 Crónicas 17:16; Neemias 8:6; Daniel 6:10; Marcos 11:25) Pa Jeová, más inportanti é ka puzison ki nu sta ta faze orason, má é kel ki nu ten na korason. Nu pode faze orason ku vós altu, déntu nos, ka ta nporta undi nu sta i na kalker óra. Óras ki nu ta faze orason pa Jeová, nu pode kúnfia ma el ta  obi-nu, mésmu ki ningen más ka obi-nu. — Neemias 2:1-6.

11. Sobri kuzê ki nu debe faze orason?

11 Sobri kuzê ki nu debe faze orason? Nu pode faze orason sobri kalker kuza ki sta di akordu ku vontadi di Jeová. Bíblia ta fla: ‘Ka ta nporta kuzê ki nu pidi di akordu ku se vontadi, el ta obi-nu.’ (1 João 5:14) Nu pode faze orason sobri asuntu pesoal? Sin. Faze orason pa Jeová debe ser sima óras ki nu ta pâpia ku un amigu. Nu pode fla Jeová tudu kuza ki nu ta pensa i ki nu ta xinti. (Salmo 62:8) Nu pode pidi Jeová pa da-nu se spritu santu pa djuda-nu faze kel ki é dretu. (Lucas 11:13) Tanbê, nu pode pidi Jeová pa da-nu sabedoria pa djuda-nu toma bons disizon i pa da-nu forsa pa nu lida ku prublémas. (Tiago 1:5) Nu debe pidi pa Jeová purdua-nu nos pekadus. (Efésios 1:3, 7) Tanbê, nu debe faze orason pa Jeová djuda otus algen, pur izénplu, nos família i nos irmons di kongregason. — Atos 12:5; Colossenses 4:12.

12. Kuzê ki debe ser más inportanti na nos orason?

12 Kuzê ki debe ser más inportanti na nos orason? Jeová i se vontadi debe ser kes kuza más inportanti na nos orason. Nu debe agradise-l di korason pa tudu kuza ki el faze pa nos. (1 Crónicas 29:10-13) Nu sabe kel-li, pamodi kantu Jizus ben pa Téra, el inxina se disiplus modi ki es debe faze orason. (Lé Mateus 6:9-13.) El fla ma es debe ora primeru pa nómi di Deus ser santifikadu, ô pa linpadu di tudu mintira ki ta fladu kóntra el. Tanbê Jizus mostra ma nu debe faze orason pa Reinu di Deus ben i pa vontadi di Jeová fazedu na Téra. Sô dipôs ki dja nu fala di kes  kuza rei di inportanti li, ki Jizus fla ma nu debe faze orason sobri kuzas ki nu meste. Óras ki nu ta poi Jeová i se vontadi na primeru lugar na nos orason, nu ta mostra ma kes-li é kuza más inportanti pa nos.

13. Kantu ténpu ki nos orason debe dura?

13 Kantu ténpu ki nos orason debe dura? Bíblia ka ta fla. Nos orason pode dura poku, pode dura txeu, ta dipende di situason. Pur izénplu, antis di nu kume nu pode faze un orason kurtu. Má, talvês nu pode  faze un orason más kunpridu óras ki nu ta agradise Jeová ô pâpia ku el sobri nos preokupason. (1 Samuel 1:12, 15) Nu ka debe faze un orason kunpridu sô pa nu txoma atenson di otus, sima alguns algen ta fazeba kantu Jizus staba na Téra. (Lucas 20:46, 47) Jeová ka gosta di kes tipu di orason li. Más inportanti pa el é pa nu faze orason di korason.

14. (a) Kantu bês ki nu debe faze orason? (b) Kuzê ki kel-li ta inxina-nu sobri Jeová?

14 Kantu bês ki nu debe faze orason? Jeová ta konvida-nu pa nu pâpia ku el tudu óra. Bíblia ta fla-nu pa ‘nu kontínua ta ora’, ‘ka nu para di faze orason’ i pa ‘nu faze orason sénpri.’ (Mateus 26:41; Romanos 12:12; 1 Tessalonicenses 5:17) Jeova sta sénpri prontu pa obi-nu. Nu pode agradise-l tudu dia pa  se amor i pa tudu kuzas ki el ta da-nu. Tanbê nu pode pidi-l pa el da-nu orientason, pa el da-nu forsa i pa el konsola-nu. Si nu ta da valor di verdadi pa priviléjiu ki nu ten di faze orason pa Jeová, nu ta pruveta tudu oportunidadi pa nu pâpia ku el.

15. Pamodi ki nu debe fla ‘amén’ na fin di orason?

15 Pamodi ki nu debe fla ‘amén’ na fin di orason? Palavra ‘amén’ krê fla ‘N sta di akordu’. Óras ki nu ta fla ‘amén’ na fin di nos orason, nu ta mostra ma kuzê ki nu sta fla na orason é di korason. (Salmo 41:13) Bíblia ta fla ma, pa nu mostra ma nu sta di akordu ku kuzê ki otu algen fla na orason, é bon nu fla ‘amén’ ku vós altu ô déntu nos. — 1 Crónicas 16:36; 1 Coríntios 14:16.

MODI KI DEUS TA RESPONDE NOS ORASON

16. Jeová ta responde nos orason? Splika.

16 Jeová ta responde nos orason? Klaru ki sin. Bíblia ta txoma-l di ‘Kel ki ta obi orason’. (Salmo 65:2) Jeová ta obi i ta responde orason di milhons di algen ki ta pâpia ku el di korason. I el ta responde-s di maneras diferenti.

17. Modi ki Jeová ta uza anjus i kes algen ki ta sirbi-l li na Téra pa responde nos orason?

17 Pa responde nos orason, Jeová ta uza anjus i kes algen ki ta sirbi-l li na Téra. (Hebreus 1:13, 14) Ten txeu izénplu di pesoas ki faze orason pa pidi ajuda pa ntende Bíblia, i lógu dipôs Tistimunhas di Jeová vizita-s. Bíblia ta mostra ma anjus ta partisipa na pregason di ‘notísias sábi’ na Téra interu. (Lé Apocalipse 14:6.) Tanbê, txeu di nos dja faze orason pa Jeová sobri un prubléma ô un kuza ki nu mesteba, i lógu  dipôs un irmon ô irman da-nu kel ajuda. — Provérbios 12:25; Tiago 2:16.

Jeová pode responde nos orason através di ajuda di un irmon

18. Modi ki Jeová ta uza se spritu santu i Bíblia pa responde nos orason?

18 Jeová ta uza se spritu santu pa responde nos orason. Óras ki nu ta faze orason pa pidi ajuda pa lida ku un prubléma, Jeová pode uza se spritu santu pa orienta-nu i pa da-nu forsa. (2 Coríntios 4:7) Tanbê Jeová ta uza Bíblia pa responde nos orason. Óras ki nu ta lé Bíblia, nu pode atxa testus ki ta djuda-nu toma bons disizon. Tanbê Jeová pode responde nos orason, óras ki un irmon ta da un komentáriu na un runion ô óras ki un ansion ta mostra-nu un testu na Bíblia. — Gálatas 6:1.

19. Pamodi ki alvês nu pode atxa ma Jeová ka sta responde nos orason?

19 Alvês, nu pode pergunta: ‘Pamodi ki ti inda Jeová ka responde nha orason?’ Lenbra ma el sabe kal ki é midjór óra i midjór manera di responde nos orason. Nu debe kontínua ta faze orason pa nu mostra ma kuzê ki nu sta ta pidi é di korason i ma nu ta kúnfia na Jeová. (Lucas 11:5-10) Alvês, Jeová ta responde nos orason di un manera ki nu ka sta ta spéra. Pur izénplu, nu pode faze orason sobri un situason difísil, má envês di Jeová tra-nu kel prubléma, el pode da-nu kel forsa ki nu meste pa nu aguenta kel prubléma. — Filipenses 4:13.

20. Kuzê ki ta kontise óras ki nu faze txeu orason pa Jeová?

20 Faze orason pa Jeová é un grandi priviléjiu! Nu pode ten sertéza ma el ta obi nos orason. (Salmo 145:18) Kantu más nu faze orason pa Jeová i nu fla-l kel ki nu ta xinti na korason, nos amizadi ku el ta fika más fórti.