Bai pa asuntu

Bai pa sugundu menu

Bai pa lista di asuntu

Tistimunhas di Jeová

Kabuverdianu

Kuzê ki nu pode prende na Bíblia?

 KAPÍTLU 12

Modi ki bu pode bira amigu di Deus?

Modi ki bu pode bira amigu di Deus?

1, 2. Fla nómi di alguns algen ki éra amigus di Jeová.

KENHA ki bu ta krê pa ser bu amigu? Algen ki bu gosta di el. Algen ki nhos ta da dretu, ki ten un bon manera di ser i ki ten kualidadis ki bu ta dimira txeu.

2 Jeová Deus tanbê ta skodje ken ki ta ser se amigu. Pur izénplu, Jeová fla ma Abraon éra se amigu. (Isaías 41:8; Tiago 2:23) Jeová tanbê gostaba di Davidi. El fla ma Davidi éra ‘un ómi ki ta andaba sima se korason ta krê.’ (Atus 13:22, BPK) Proféta Daniel era un algen ki tinha ‘txeu valor’ pa Jeová. — Daniel 9:23.

3. Kuzê ki Abraon, Davidi i Daniel faze pa ser amigus di Jeová?

3 Modi ki Abraon, Davidi i Daniel bira amigus di Jeová? Es éra umildi i es ta obiba ku Deus. É kes tipu di algen li ki Jeová ta seta pa ser se amigus. Jeová fla Abraon: ‘Bu obi ku nha vós.’ (Génesis 22:18) Jeová splika povu di Israel modi ki es ta sérba se amigu: ‘Nhos obi ku nha vós, i N ta ser nhos Deus i nhos ta ser nha povu.’ (Jeremias 7:23) Nton si bu krê ser amigu di Jeová bu meste obi ku el.

JEOVÁ TA DJUDA SE AMIGUS

4, 5. Modi ki Jeová ta djuda se amigus?

4 Bíblia ta fla ma Jeová krê djuda kes algen ki ta kúnfia na el di korason. (2 Crónicas 16:9) Na Salmo 32:8, Jeová promete se amigus: ‘N ta da-u sabedoria i  N ta inxina-u na ki kaminhu ki bu debe anda. N ta da-u konsedju ku nha odju fíksu na bo.’

5 Pamodi ki nu meste di kes ajuda li? Pamodi nu ten un inimigu poderozu ki ka krê pa nu ser amigu di Deus. Es inimigu é Satanás. Má kes algen ki é fiel i ki ta sirbi Jeová di tudu ses korason, pode kúnfia ma Jeová ta djuda-s. (Lé Salmo 55:22.) Mésmu óras ki es ta pasa pa prublémas es pode ten kunfiansa sima kel skritor di Salmo ki fla: ‘Nada ka ta buli-m’. (Salmo 16:8; 63:8) Nu ben odja kuzê ki Satanás ta faze pa straga nos amizadi ku Deus.

MINTIRAS DI SATANÁS

6. Kuzê ki Satanás fla sobri tudu kes algen ki krê ser amigu di Deus?

6 Na kapítlu 11 nu odja ma Satanás txoma Jeová di mintirozu. El fla ma éra injustu Jeová ka dexa Adon ku Eva disidi kuzê ki éra dretu i kuzê ki éra mariadu pa ses kabésa. Stória di Jó ta inxina-nu ma Satanás tanbê fala kóntra tudu kes algen ki krê ser amigu di Deus. El fla ma es ka ta sirbi Deus pamodi es ta ama-l, má es ta sirbi-l sô pa interesi. El txiga di fla ma el ta poi kalker algen fika kóntra Deus. Nu ben odja kuzê ki Satanás faze Jó i modi ki Jeová djuda Jó.

7, 8. (a) Kuzê ki Jeová ta atxaba di Jó? (b) Kuzê ki Satanás fla di Jó?

7 Ken ki éra Jó? El éra un ómi fiel ki vive dja ten más di 3.500 anu. El tinha txeu ruspetu pa Deus i el ka gostaba di kuzas mariadu. Jeová ta amaba Jó i el fla ma na se ténpu ka tinha ningen sima el na mundu. (1:8) Fika klaru ma Jó éra un grandi amigu di Jeová.

8 Satanás fla ma Jó ta pensaba sô na se kabésa i ma  el ta sirbiba Deus sô pa interesi. Satanás fla Jeová: ‘Bu ka poi un sérka di proteson na se vólta, na se kaza i na tudu kuza ki el ten? Bu bênsua trabadju di se mô, i se ribanhu sta ta spadja na Téra. Má gósi labanta bu mô i mexe na tudu kuza ki el ten i odja si el ka ta bira kóntra bo na bu róstu.’ — 1:10, 11.

9. Kuzê ki Jeová dexa Satanás faze?

9 Satanás fla ma Jó éra amigu di Jeová sô pa interesi. Satanás tanbê fla ma el ta konsigiba poi Jó ta dizisti di sirbi Jeová. Deus sabia ma kel-li ka éra verdadi. Má simé el dexa Satanás prova Jó. Asi ta fikaba klaru si Jó ta sirbiba Jeová pamodi el ta amaba el ô si éra sô pa interesi.

SATANÁS ATAKA JÓ

10. (a) Modi ki Satanás ataka Jó? (b) I kuzê ki Jó faze?

10 Satanás kumesa ta ataka tudu kes animal di Jó. Alguns furtadu i kes otu matadu. Dipôs Satanás mata kuazi tudu kes npregadu di Jó. Jó perde tudu kuza ki el tinha. Más tristi inda, Satanás mata 10 fidju di Jó na un tenporal. Má simé Jó kontínua lial ku Jeová. ‘Na tudu kel-li Jó ka peka i nen el ka kulpa Deus di faze algun kuza mariadu.’ — 1:12-19, 22.

Jeová rekonpensa Jó pamodi el éra un amigu lial

11. (a) Kuzê más ki Satanás faze ku Jó? (b) Kuzê ki Jó faze?

11 Má simé Satanás ka dizisti di ataka Jó. El ta kriditaba ma si Jó fikaba duenti el ta bandonaba Deus. Satanás fla Deus: ‘Labanta bu mô i mexe na se osu i na se karni i di sertéza el ta bira kóntra bo na bu róstu.’ (2:5, 7) Nton, Satanás ataka Jó ku un duénsa gravi ki pô-l ta sufri txeu. Má Jó kontínua lial ku Jeová. El fla: ‘Ti N móre, N ka ta dizisti di ser lial pa Deus!’ — 27:5.

12. Modi ki Jó prova ma Satanás éra mintirozu?

 12 Jó ka sabeba di kes mintira ki Satanás flaba Deus i nen pamodi ki el staba ta sufri txeu si. Jó ta atxaba ma éra Deus ki sta poba el ta sufri. (6:4; 16:11-14) Má simé, ku tudu se prublémas, el kontínua fiel pa Jeová. Kel-la prova ma tudu kuzas ki Satanás dja flaba éra sô mintira. Fika klaru ma Jó ka ta sirbiba Jeová sô pa interesi, má pamodi el ta amaba el.

13. Kal ki foi rezultadu di lialdadi di Jó?

13 Sima dja nu odja, nbóra Jó ka sabia kuzê ki kontise na Séu, simé el kontínua lial ku Jeová. Kel-li prova ma Satanás é mau i el ka ten péna di ningen. Dja ki Jó mostra ma el éra un amigu lial, Jeová rekonpensa-l. — 42:12-17.

SATANÁS PÂPIA MAL DI BO

14, 15. Kuzê ki Satanás fla kóntra tudu algen?

14 Pamodi ki stória di Jó é inportanti pa nos? Pamodi é ka sô di Jó ki Satanás pâpia mal di el. El fla ma tudu algen ta sirbi Deus sô pa interesi. Na 2:4, Satanás fla: ‘Ómi ta da tudu kuza ki el ten pa se vida’. Monti ténpu dipôs di Jó, Satanás kontínua ta mostra falta di ruspetu pa Jeová i ta pâpia mal di kes algen ki ta sirbi Deus. Na Provérbios 27:11, Jeová ta pidi kada un di nos: ‘Aji ku sabedoria, nha fidju, poi nha korason fika kontenti, pa N pode da un respósta pa kel ki ta dizafia-m [ô, ki ta falta-m ruspetu]’.

15 Pa prova ma Satanás é mintirozu, bu ten ki skodje obi ku Jeová i ser se amigu lial. Ser amigu di Jeová é midjór kuza ki bu pode faze, mésmu ki pa kel-li bu  meste faze txeu mudansa na bu vida. Satanás fla ma si bu pasa pa prublémas bu ta dexa di ser lial pa Deus. Má kuzê ki el ta faze pa tenta afasta-nu di Deus?

16. (a) Di ki maneras Satanás ta tenta straga nos amizadi ku Jeová? (b) Kuzê ki Diabu pode faze pa tenta pô-u dizisti di sirbi Jeová?

16 Satanás ta uza txeu manera pa tenta straga nos amizadi ku Deus. Primeru, el ta ataka sima ‘un lion ki sta ta djobe algen pa satadja.’ (1 Pedro 5:8) Nton, ka bu spanta óras ki bus amigu, família, ô otus algen tenta pô-u dizisti di studa Bíblia i di faze kel ki é dretu. Alvês bu ta xinti sima ki tudu algen sta kóntra bo. * (João 15:19, 20) Sugundu, Satanás ‘ta finji ser un anju di lus’. Kel-li krê fla ma el ta poi kuzas mariadu parse dretu pa el pode ngana-nu. (2 Coríntios 11:14) Tirseru, pa tenta dizanima-nu el ta krê pô-nu pensa ma nunka nu ka ta konsigi ser amigu di Jeová pamodi nos é pekador. — Provérbios 24:10.

OBI KU JEOVÁ

17. Kuzê ki ta djuda-nu obi ku Jeová?

17 Pa nu prova ma Satanás é mintirozu, nu ten ki obi ku Jeová. Kuzê ki ta djuda-nu faze kel-li? Amor. Bíblia ta fla: ‘Ama Jeová bu Deus, di tudu bu korason, di tudu bu vida i ku tudu bu forsa.’ (Deuteronómio 6:5) Sima nos amor pa Jeová ta ba ta omenta, nu ta xinti más vontadi di faze kel ki el krê. Apóstlu Juan skrebe: ‘Amor di Deus ta siginifika kel-li: pa nu obi  ku se mandamentus, pamodi se mandamentus é ka pizadu.’ — 1 João 5:3.

18, 19. (a) Ki kuzas ki Deus ka krê pa nu faze? (b) Pamodi ki nu ta konsigi faze kes mudansa ki Jeová ta pidi-nu?

18 Ki tipu di kuzas Deus ka ta krê pa nu faze? Alguns di kes kuza sta na kuadru ‘ Ôdia kes kuza ki Jeová ta ôdia’. Pode parse ma kes kuza é ka mariadu. Má óras ki bu ta lé Bíblia i pensa dretu na kuzê ki el ta fla, bu ta pasa ta odja ma obi ku Jeová é midjór kuza ki bu pode faze. Pa bu mostra ma bu ta obi ku Jeová talvês bu ten ki faze mudansas na bu vida. Mésmu ki na komésu pode ser difísil, si bu faze mudansas bu ta ten pas i filisidadi ki amigus di Jeová ta ten. (Isaías 48:17, 18) Má, nu ta konsigi faze kes mudansa?

 19 Sin, pamodi Jeová nunka ka ta pidi-nu un kuza ki nu ka ta pode faze. (Deuteronómio 30:11-14) El é nos amigu i el konxe-nu midjór ki nos nu konxe nos kabésa. El konxe nos pontu fraku i nos pontu fórti. (Salmo 103:14) Pa nu xinti koraji, apóstlu Polu fla: ‘Deus é fiel, i el ka ta dexa nhos pasa pa ninhun tentason más ki kel ki nhos ta pode aguenta, má, djuntu ku tentason, El ta da un manera di skapa, pa nhos pode aguenta.’ (1 Coríntios 10:13) Nu pode ten sertéza ma Jeová sénpri ta da-nu forsa ki nu meste pa nu faze kel ki é dretu. El ta da-nu forsa pa nu lida ku nos prublémas. (2 Coríntios 4:7) Polu xinti maJeová djuda-l. Pur isu, el tinha motivu di fla: ‘Pa tudu kuza N ten forsa pamodi kel ki ta da-m puder.’ — Filipenses 4:13.

 PRENDE AMA KES KUZA KI JEOVÁ TA AMA

20. Dipôs di para di faze kuzas mariadu, kuzê más ki bu meste faze? Pamodi?

20 Dexa di faze kes kuza ki Deus ta fla ma é mariadu é sô komésu. Nu meste faze más. (Romanos 12:9) Bu meste prende ama kes kuza ki Jeová ta ama i imita se kualidadis. Pamodi? É sô si, ki nu ta pode ser amigu di Deus. Amigus di Deus ta mostra kualidadis sima ‘amor, alegria, pas, paxénxa, bondadi, amor lial, brandura i es ta kontrola ses kabésa’. (Gálatas 5:22, 23) Pa bu sabe modi ki amigus di Deus é, Salmo 15:1-5.

21. Kuzê ki ta djuda-u imita kes kualidadi di Deus?

21 Kuzê ki ta djuda-u imita kes kualidadi di Deus? Bu debe lé i studa Bíblia, pa bu pode prende kuzê ki Jeová ta ama. (Isaías 30:20, 21) Asi bu ta konxe Jeová midjór i bu amor pa el ta fika más fórti. É kel amor li ki ta faze-u xinti vontadi di obi ku el i imita se kualidadis.

22. Kuzê ki ta kontise si bu disidi obi ku Jeová?

22 Dexa di faze kuzas mariadu é sima duspi un ropa bédju. Kel ropa é ‘kel manera di ser ki nu tinha antis’. I kumesa ta faze kel ki é dretu é sima bisti otu ropa ki é ‘kel novu manera di ser’. Bíblia ta fla ma nu debe faze si. (Colossenses 3:9, 10) Faze kes mudansa i obi ku Jeová, alvês é ka faxi. Má el promete un ‘rekonpénsa grandi’ pa ken ki ta faze kel-li. (Salmo 19:11) Dexa bu amor pa Jeová pô-u disidi obi ku el. Kuzê ki ta kontise si bu faze kel-li? Bu ta ser un amigu di Jeová di verdadi i bu ta prova ma Satanás é mintirozu.

^ par. 16 Kel-li ka krê fla ma Satanás sta ta kontrola kes algen ki ta tenta pô-u dizisti di studa Bíblia. Má Satanás é ‘Deus di es mundu’ i ‘mundu interu sta na se puder’. Pur isu, nu ka ta stranha óras ki pesoas ta fla-nu pa nu dexa di sirbi Jeová. — Coríntios 4:4; 1 João 5:19.