Bai pa asuntu

Bai pa sugundu menu

Bai pa lista di asuntu

Tistimunhas di Jeová

Kabuverdianu

Kuzê ki nu pode prende na Bíblia?

 KAPÍTLU 10

Kuzê ki Bíblia ta fla sobri anjus?

Kuzê ki Bíblia ta fla sobri anjus?

1. Pamodi ki nu meste prende sobri anjus?

JEOVÁ krê pa nu konxe se família. Anjus ta faze párti di família di Deus. Bíblia ta txoma anjus di ‘fidjus di Deus’. (38:7) Kuzê ki anjus ta faze? Modi ki es djuda pesoas na ténpu antigu? Es pode djuda-nu oji? — Djobe párti PRENDE MÁS n8.

2. Ken ki faze anjus? I kantu anju ki ten?

2 Colossenses 1:16 ta fla, ma dipôs ki Jeová faze Jizus, ‘fazedu tudu kes otu kuza na Séu ku na Téra’. Kel-li ta mostra ma é Jeová ki faze anjus. Kantu anju ki el faze? Bíblia ta fla ma ten milhons di anju. — Salmo 103:20; Apocalipse 5:11.

3. Kuzê ki livru di Jó ta fla-nu sobri anjus?

3 Livru di Jó ta mostra ma Jeová faze anjus antis di el faze Téra. I modi ki es xinti kantu es odja Jeová ta faze Téra? Es fika rei di kontenti. Tudu kes anju ta sirbiba Jeová djuntu, sima un família unidu. — 38:4-7.

ANJUS TA DJUDA POVU DI DEUS

4. Modi ki nu sabe ma anjus ta preokupa ku umanus?

4 Bíblia ta mostra ma anjus sénpri ta preokupa ku umanus. Es tene gana di odja umanus ta vive na Téra sima Jeová ta krê. (Provérbios 8:30, 31; 1 Pedro 1:11, 12) Di sertéza, anjus fika rei di tristi kantu Adon ku Eva ka obi ku Jeová. Ta parse ma es fika  más tristi inda, kantu es odja txeu algen ka ta faze vontadi di Deus. Bíblia ta fla ma es ta fika kontenti óras ki un algen rapende di se pekadus i volta pa Jeová. (Lucas 15:10) Anjus ta preokupa inda mutu más ku kes algen ki ta sirbi Jeová. Jeová ta uza-s pa proteje i pa djuda kes algen ki ta sirbi-l. (Hebreus 1:7, 14) Nu ben odja alguns izénplu.

‘Nha Deus manda se anju i el fitxa bóka di kes lion.’ — Daniel 6:22

5. Da izénplu di modi ki anjus djuda kes algen ki ta sirbiba Deus na ténpu antigu?

 5 Antis di distrui sidadis di Sudoma ku Gumora, Jeová manda dôs anju pa ba djuda Ló ku se família sai di la. (Génesis 19:15, 16) Txeu ténpu dipôs, proféta Daniel botadu na meiu di lion, má es ka mexe ku el, pamodi ‘Deus manda se anju i el fitxa bóka di kes lion.’ (Daniel 6:22) Otu izénplu é di apóstlu Pedru. Kantu el staba prézu Jeová manda se anju pa liberta-l. (Atos 12:6-11) Tanbê anjus djuda Jizus kantu el staba na Téra. Pur izénplu, dipôs ki el batizadu ‘anjus staba ta sirbiba el’. (Marcos 1:13) I antis di Jizus matadu, un anju ben “da-l forsa”. — Lúkas 22:43, BPK.

6. (a) Modi ki nu sabe ma anjus ta djuda kes algen ki ta sirbi Deus oji? (b) Ki perguntas nu meste sabe respósta?

6 Oji anjus ka sta ta parse más pa umanus. Má nu pode kúnfia ma anjus ti inda sta ta djuda kes algen ki ta sirbi Deus. Bíblia ta fla: ‘Anju di Jeová ta fika pértu di kes algen ki ten grandi ruspetu pa El, i el ta salva-s.’ (Salmo 34:7) Pamodi ki nu meste ses proteson? Pamodi nu ten inimigus poderozu ki krê prujudika-nu. Ken ki é kes inimigu? Kuzê ki es ta faze pa prujudika-nu? Pa nu atxa respósta pa kes pergunta li, nu meste sabe kuzê ki kontise dipôs ki Jeová faze Adon ku Eva.

KES ANJU KI É NOS INIMIGU

7. Kuzê ki ti inda Satanás sta ta faze?

7 Nu prende na kapítlu 3 ma un anju fika kóntra Deus i el kreba pa kes otu anju sigiba el. Bíblia ta txoma kel anju di Satanás, ki tanbê é Diabu. (Apocalipse  12:9) Satanás krê tanbê pa otus algen fika kóntra Deus. El ngana Eva i ti inda el sta ta ngana un monti algen. Má alguns ki é sima Abel, Enóki i Nué es kontínua ta obi ku Jeová. — Hebreus 11:4, 5, 7.

8. (a) Modi ki alguns anju bira dimónis? (b) Kuzê ki dimónis faze pa es ka móre na Dilúviu?

8 Otus anju sigi Satanás i es fika kóntra Deus. Bíblia ta txoma-s di dimónis. Na ténpu di Nué, alguns anju bandona Séu, ki é ses kaza, i es ben vive na Téra kómu umanu. Pamodi ki es faze kel-li? Bíblia ta fla ma es krê kazaba ku mudjeris. (Lé Génesis 6:2.) Má anju ka fazedu pa kaza. (Judas 6) Kes algen li na Téra fika runhu i violéntu sima kes anju mau. Nton Jeová disidi kaba ku kes algen mau na Dilúviu. Má el salva kes algen ki obi ku el. (Génesis 7:17, 23) Pa es ka móre, kes anju mau torna bai pa Séu i es fika djuntu ku Diabu, ki bira ses xéfi. — Mateus 9:34.

9. (a) Kuzê ki kontise ku dimónis kantu ki es volta pa Séu? (b) Kuzê ki nu sta ben odja gósi?

9 Kuzê ki kontise kantu dimónis volta pa Séu? Jeová ka dexa-s más faze párti di se família. (2 Pedro 2:4) Dimónis ka ta konsigi bira umanus más. Má simé, es sta kontínua ta ngana mundu interu. (Apocalipse 12:9; 1 João 5:19) Gósi nu sta ben odja modi ki dimónis ta konsigi ngana txeu algen. — Lé 2 Coríntios 2:11.

MODI KI DIMÓNIS TA NGANA ALGEN

10. Kuzê ki dimónis ta uza pa ngana algen?

10 Dimónis ta ngana algen di monti manera. Un di kes kuza ki es ta uza é bruxaria ô fitisaria. Kel-li é  un manera ki algen ta fika nvolvidu ku dimónis sen da kónta. Alvês é própi kel algen ki ta pâpia ku dimónis ô el ta ba djobe ajuda na un méstri ô kuranderu. Má Bíblia ta fla pa nu fika lonji di kalker kuza ki ten aver ku dimónis. (Gálatas 5:19-21) Pamodi? Sima un kasador ta uza un armadilha pa pega un animal, asi tanbê dimónis ta uza fitisaria ô bruxaria pa ngana i kontrola algen. — Djobe párti PRENDE MÁS n26.

11. Pamodi ki dibinha futuru é un kuza prigozu?

11 Dibinha futuru é un di kes armadilha ki dimónis ta uza. Pesoas ta uza síginu, es ta bota karta ô es ta uza bóla di kristal pa tenta sabe kuzê ki ta ba kontise na futuru. Tanbê es ta tenta lé mô ô es ta tenta fla siginifikadu di kuzas ki algen ta sunha. Monti algen ta atxa ma faze kes kuza li é normal. Má faze kes kuza li é rei di prigozu. Pur izénplu, Bíblia ta mostra ma dimónis ta uza kes algen ki ta dibinha futuru. Livru di Atus 16:16-18, ta fala di un ‘spritu ô dimóni di dibinha’ ki ta djudaba un minina fla kuzê ki ta kontiseba na futuru. (BPK) Dipôs ki apóstlu Polu tra dimóni di kel minina, el ka konsigi dibinha futuru más.

12. (a) Pamodi ki é prigozu tenta pâpia ku algen ki dja móre? (b) Pamodi ki kes ki ta sirbi Deus ka ta partisipa di alguns kustumu ki ten aver ku mórti?

12 Dimónis ta uza un otu manera pa ngana algen. Es krê pa nu kridita ma mortus ta kontínua ta vive na un otu lugar i ma nu pode fala ku es. Pur izénplu, kes algen ki ta sta nvolvidu ku dimónis ta fla ma es pode pâpia ku un algen ki dja móre i ti imita se vós.  (1 Samuel 28:3-19) Má kel-li é rei di prigozu tanbê, pamodi ken ki ta tenta pâpia ku mortus ta fika nvolvidu ku dimónis. Bíblia ta fla ma nu ka pode pâpia ku mortus i nen es ka pode prujudika-nu. (Salmo 115:17) É pur isu ki óras ki algen móre, kristons verdaderu ka ta partisipa na kes kuza ki ta fazedu pa agrada ô djuda algen mortu. Na alguns lugar es ta kustuma faze fésta, faze sakrifisius ô es ta da prezentis pa algen ki dja móre. Otus algen ta sende véla pa es. Talvês família ô vizinhus di un kriston verdaderu ka ta ntende pamodi ki el ka ta partisipa di kes kuza li i es pode fika xatiadu ku el. Alguns ti ta dexa di pâpia ku el. Má Deus ka krê pa kes algen ki ta sirbi-l faze kuzas ki ten aver ku dimónis. Pur isu, nunka ka bu tenta pâpia ku algen ki dja móre i nen ka bu partisipa di kes kustumu. — Lé Deuteronómio 18:10, 11; Isaías 8:19.

13. Kuzê ki kontise ku un monti di algen ki ta pasaba mal na mô di dimónis?

13 Alén di ngana algen, dimónis tanbê gosta di prujudika-s. I kada bês es sta más violéntu. Pamodi? Pamodi es sabe ma Deus ka sta ben dexa-s kontínua ta prujudika algen. Ses ténpu sta kuazi ta kaba. (Apocalipse 12:12, 17) Monti algen ki antis dja pasaba mal na mô di dimónis, oji es ka tene medu más i es liberta di dimónis. Modi ki es konsigi?

MODI KI NU PODE LIBERTA DI DIMÓNIS

14. Kuzê ki un algen meste faze pa liberta di dimónis?

14 Bíblia ta fla kuzê ki nu pode faze pa nu liberta di dimónis i fika lonji di es. El ta fala di alguns algen ki  staba nvolvidu ku dimónis antis di es bira sigidor di Kristu. Es ta moraba na un sidadi ki txomaba Éfezu. Modi ki es konsigi liberta di dimónis? Bíblia ta fla: ‘Un monti di kes ki éra fitiseru djunta ses livru i es leba pa ba kemadu’. (Atus 19:19, BPK) Es sabia ma primeru kuza ki es tinha ki fazeba pa es liberta di dimónis éra distruíba tudu ses livru di majia. Oji tanbê ken ki krê sirbi Jeová meste liberta di tudu kes kuza ki ten aver ku dimónis. Pur izénplu, kes kuza pode ser livrus, revistas, kuzas ki ten aver ku síginu, filmis, múzikas, jogus, ô kuzas pa da sórti ô proteson. Tanbê pode ser fotus ki ten aver ku majia ki ta pô-l ta parse sima un diverson ki ka ta prujudika-nu. Má ka bu ngana bu kabésa. Tudu kel-li ten aver ku dimónis. — 1 Coríntios 10:21.

15. Kuzê más ki nu ten ki faze pa nu proteje di Satanás i di se dimónis?

15 Dimónis ka dizisti di tenta ngana kes algen na Éfezu. Dipôs di algun ténpu ki kes kriston kema ses livru di majia, apóstlu Polu fla ma inda es tinha un géra ‘kóntra kes forsa spritual malvadu’. (Efésios 6:12) Nton, kuzê más ki es tinha ki fazeba? Apóstlu Polu fla: ‘Nhos uza kel grandi skudu di fé, pa nhos pode paga tudu flexa di lumi di kel Malvadu.’ (Efésios 6:16) Na ténpu antigu, trópas ta uzaba un skudu pa protejeba es. Nos tanbê oji nu pode uza nos fé pa proteje-nu. Nu meste ten tudu kunfiansa ma Jeová ta proteje-nu. Asi nu ta liberta di Satanás i di se dimónis. — Mateus 17:20.

16. Modi ki nos fé na Jeová pode fika más fórti?

16 Modi ki nos fé na Jeová pode fika más fórti? Nu meste lé Bíblia tudu dia. Asi nu ta odja ma Jeová  pode proteje-nu i nu ta pasa ta kúnfia na el más txeu. Óras ki nos fé é fórti, Satanás i se dimónis ka ta pode prujudika-nu. — 1 João 5:5.

17. Kuzê más ki pode proteje-nu di dimónis?

17 Kuzê más ki kes kriston na Éfezu meste fazeba? Kel sidadi staba xeiu di fitisaria ô bruxaria. Pur isu Polu fla-s pa es faze orason tudu óra. (Efésios 6:18) Es devia pidiba Jeová pa protejeba es na tudu momentu. Nos tanbê nu sta ta vive na un mundu xeiu di fitisaria ô bruxaria. Nton, nu meste pidi Jeová pa proteje-nu i nu meste uza se nómi óras ki nu ta faze orason. (Lé Provérbios 18:10.) Si nu kontínua ta pidi Jeová pa libra-nu di Satanás el ta responde nos orason. — Salmo 145:19; Mateus 6:13.

18, 19. (a) Modi ki nu pode ganha géra kóntra Satanás i se dimónis? (b) Ki pergunta nu ta ben responde na kapítlu 11?

18 Pa nu ganha géra kóntra Satanás i se dimónis nu meste libra di tudu kes kuza ki ten aver ku es i kúnfia ma Jeová ta proteje-nu. Nu ka meste xinti medu di dimónis. (Lé Tiago 4:7, 8.) Jeová é mutu más poderozu ki es. Na ténpu di Nué Jeová kastiga-s i na futuru el ta ben kaba ku tudu es. (Judas 6) Lenbra ma nu ka sta nos sô na es géra. Jeová ta uza se anjus pa proteje-nu. (2 Reis 6:15-17) Nu pode kúnfia ma ku ajuda di Jeová nu ta ganha es géra. — 1 Pedro 5:6, 7; 2 Pedro 2:9.

19 Má si Satanás i se dimónis é kulpadu pa txeu sufrimentu ki sta na mundu, pamodi ki ti inda Deus ka kaba ku es? Kapítlu 11 ta ben responde es pergunta.