Bai pa asuntu

Bai pa sugundu menu

Bai pa lista di asuntu

Tistimunhas di Jeová

Kabuverdianu

Kuzê ki bu pode prende ku stórias di Bíblia

Karta di Grupu Enkaregadu di Óbra

Karta di Grupu Enkaregadu di Óbra

Nos irmons ki nu krê txeu:

Dja ki nu ta adora Jeová, nu ta ama se Palavra ki é Bíblia. Nu ten sertéza ma stórias ki sta na el é di verdadi, orientasons ki el ta da pa vive é di kunfiansa i próva klaru di se grandi amor pa nos. (Salmo 119:105; Lucas 1:3; 1 João 4:19) Nu krê di fundu di nos korason, djuda otus algen prende verdadis di txeu valor ki sta na Palavra di Deus. Pur isu, nu sta txeu kontenti di fla ma kel livru li, ku téma: “Kuzê ki bu pode prende ku stórias di Bíblia” dja sta prontu. Nhos dexa-nu konta nhos un bokadinhu sobri kel livru li.

Txeu párti di kel livru li, priparadu ta pensa na minís pikinoti. Má, tanbê el pode ser uzadu pa djuda kes algen más grandi ki krê prende más sobri Bíblia. I dja ki Bíblia é un livru pa tudu algen, nu ka ten dúvida ma torna lé se stórias ta djuda-nu ser filís di verdadi.

Kel livru li ta konta stórias di Bíblia désdi kriason di umanus pa frenti. Fazedu txeu sforsu pa konta kes stórias di Bíblia di un manera klaru, sinplis i sénpri ki da, pa órdi ki es kontise.

Má, kel livru li, ka ta konta sô stórias di Bíblia. Se testu ku gravuras priparadu di un manera ki ta djuda-nu odja kes kuza ki kes algen odja i xinti kes kuza ki kes algen xinti.

Kel publikason li ta djuda-nu odja modi ki Bíblia é un livru ki ta pâpia di kes algen ki obi ku Jeová i kes ki ka obi ku el. I ku ses izénplu nu ta prende kuzas inportanti. (Romanos 15:4; 1 Coríntios 10:6) Kel livru li sta divididu na 14 párti. Na komésu di kada párti ten un rezumu di alguns kuza inportanti ki nu pode prende.

Si bu ten fidju, bu pode lé un stória ku bu fidju i pâpia di kes gravura. Dipôs, un di nhos pode lé kes testu di Bíblia ki ta konta kel  stória. Djuda bu fidju odja modi ki kuzê ki el lé na Bíblia ten aver ku kuza ki el prende na livru. Bu pode faze mésmu kuza pa djuda un algen más grandi ten un ideia di kuzê ki Bíblia ta fla.

É nos dizeju ki kel livru li ben djuda tudu kenha ki krê, kes jóven ku kes algen grandi, prende di Palavra di Deus i faze sima es prende. Asi tanbê, es pode adora Jeová i faze párti di se família ki el ta ama txeu.

Nhos irmons,

Grupu Enkaregadu di Óbra di Tistimunhas di Jeová