Bai pa asuntu

Bai pa sugundu menu

Bai pa lista di asuntu

Tistimunhas di Jeová

Kabuverdianu

Kuzê ki bu pode prende ku stórias di Bíblia

 LISON 54

Jeová mostra paxénxa ku Jonas

Jeová mostra paxénxa ku Jonas

Na Nínivi, ki éra un sidadi di Asíria, pesoas éra mau. Jeová manda se proféta Jonas pa bai Nínivi i pa fla-s pa es muda ses manera di konporta. Má Jonas fuji pa otu kaminhu. El entra na un barku ki sta baba pa Társis i el viaja pa lonji.

Timenti barku staba na mar, kontise un tenpistadi fórti i kes marinheru fika ku medu. Es ora pa ses deus i es pergunta: ‘Pamodi ki kel-li sta kontise?’ Ti ki enfin, Jonas fla-s: ‘Ami ki é kulpadu. Jeová fla-m pa N faze un kuza, má N ka faze. Nhos bota-m na mar i tenpistadi ta para.’ Kes marinheru ka kria botaba Jonas na mar, má el insisti. Kantu es bota-l na mar, tenpistadi para.

Jonas pensa ma el ta moreba. Sima el ba ta bai pa fundu di mar, el ora Jeová. Dipôs Jeová manda un pexi uma tamanhu. Kel pexi inguli Jonas, má el ka mata-l. Déntu di bariga di pexi Jonas ora: ‘N ta promete ma di gósi pa dianti sénpri N ta obi ku bo.’ Jeová dexa Jonas fika três dia déntu di bariga di pexi i dipôs Jeová poi pexi vumita-l na téra.

Dja ki Jeová salva Jonas, kel-li krê fla ma el ka mesteba bai más pa Nínivi? Nau. Jeová torna fla Jonas pa bai la. Di es  bês Jonas obi. El bai la i el fla kel povu mau kel mensaji li: ‘Di li 40 dia, Nínivi ta ser distruídu.’ Dipôs, kontise un kuza ki Jonas ka sta ta speraba. Kes algen di Nínivi obi i es muda ses konportamentu. Rei di Nínivi fla se povu: ‘Nhos pidi Deus i nhos rapende i talvês el pode ka traze distruison.’ Kantu Jeová odja ma povu rapende, el ka distrui Nínivi más.

Jonas fika xatiadu pamodi sidadi ka distruídu. Má pensa: Jeová mostra paxénxa i mizerikórdia ku Jonas, má Jonas ka mostra mizerikórdia ku povu di Nínivi. Nton, el bai fika fóra di sidadi, baxu di un pé di arvi xatiadu. Dipôs kel pé di arvi móre i Jonas fika más xatiadu inda. Nton, Jeová fla-l: ‘Bu preokupa más ku kel pé di arvi di ki kes algen di Nínivi. N mostra-s mizerikórdia i es salva.’ Kuzê ki nu pode prende? Pesoas di Nínivi éra más inportanti ki kalker planta.

‘Jeová ten paxénxa ku nhos, pamodi el ka krê pa ningen ser distruídu, má el krê pa tudu algen rapende.’ — 2 Pedro 3:9