Bai pa asuntu

Bai pa sugundu menu

Bai pa lista di asuntu

Tistimunhas di Jeová

Kabuverdianu

Kuzê ki bu pode prende ku stórias di Bíblia

 LISON 53

Jioiada mostra koraji

Jioiada mostra koraji

Jizabel tinha un fidju-fémia ki txomaba Atalia. El éra runha sima se mai. Atalia éra kazadu ku rei di Judá. Kantu ki se maridu móre, se fidju kumesa ta governa. Má kantu ki se fidju móre, Atalia faze se kabésa rainha di Judá. Dipôs el tenta kaba ku tudu famílias di rei. El mata tudu kes ki podia tornaba rei, ti se própi nétus. Tudu algen fika ku medu di Atalia.

Jioiada, ki éra Saserdóti Prinsipal, ku se mudjer Jiozeba, sabia ma kuzas ki Atalia sta ta fazeba éra mariadu. Es poi ses vida na prigu kantu ki es sukundi un di kes nétu di Atalia, ki txomaba Jioás. Es kria-l na ténplu.

Kantu ki Jioás tinha 7 anu, Jioiada djunta tudu xéfis di guardas ku levitas i el fla-s: ‘Nhos guarda pórtas di ténplu i ka nhos dexa ningen entra.’ Nton Jioiada poi Jioás ta ser rei di Judá i el pô-l koroa na kabésa. Povu di Judá grita: ‘Vida kunpridu pa rei!’

Rainha Atalia obi povu ta grita i el kóre pa ténplu. Kantu ki el odja kel novu rei, el grita: ‘Kel-li é traison! Kel-li é traison!’ Kes xéfi di guardas pega rainha, es tra-l di la i es leba-l pa bai mata. Má i kes kuza mariadu ki Atalia poi povu ta faze?

Jioiada djuda povu faze un kontratu ku Jeová, undi ki es promete adora sô El. Jioiada manda ronba ténplu di Baal i kebra imajis padás pa padás. El skodje saserdótis ku levitas pa trabadja na ténplu, asi povu ta adoraba la otu bês. El ranja guardas pa djobe ténplu, asi pa ningen inpuru ka  entra la. Dipôs, Jioiada ku kes xéfi di guardas leba Jioás pa palásiu i es pô-l na tronu. Povu di Jeová fika kontenti. Ti ki enfin es podia sirbiba Jeová livri di kel rainha mau i di adorason di Baal. Bu odja modi ki koraji di Jioiada djuda monti algen?

‘I ka nhos fika ku medu di kes ki ta mata korpu, má ka ta pode mata alma, envês di kel-li, nhos xinti medu di kel ki pode distrui alma ku korpu na Jiena.’ — Mateus 10:28