Bai pa asuntu

Bai pa sugundu menu

Bai pa lista di asuntu

Tistimunhas di Jeová

Kabuverdianu

Kuzê ki bu pode prende ku stórias di Bíblia

 LISON 55

Anju di Jeová proteje rei Ezekias

Anju di Jeová proteje rei Ezekias

Asíria toma kel reinu di kes 10 tribu di Israel. Gósi Senakeribi, ki éra rei di Asíria, krê tomaba tanbê kel reinu di dôs tribu di Judá. El kumesa ta toma kes sidadi di Judá un pur un. Má sidadi ki más el kreba éra Jiruzalen. Sô ki Senakeribi ka sabia ma Jeová sta ta protejeba Jiruzalen.

Ezekias, ki éra rei di Judá, paga Senakeribi un monti dinheru pa dexa Jiruzalen kétu. Nbóra Senakeribi toma dinheru, simé el manda un monti trópa pa bai ataka Jiruzalen. Povu na sidadi di Jiruzalen fika ku medu, pamodi trópas di Asíria sta ta txigaba kada bês más pértu di es. Nton Ezekias fla-s: ‘Ka nhos xinti medu. Trópas di Asíria é fórti, má Jeová ta ben faze-nu más fórti ki es.’

Senakeribi manda se mensajeru, ki txomaba Rabsaké, pa faze povu trósa. Rabsaké fika sakédu fóra di sidadi i el grita: ‘Jeová ka ta pode djuda nhos. Ka nhos dexa Ezekias ngana nhos. Ka ten ninhun deus ki ta pode proteje nhos.’

Ezekias pergunta Jeová kuzê ki el ta fazeba. Jeová responde-l: ‘Bu ka meste xinti medu di kuzê ki Rabsaké sta ta fla. Senakeribi ka ta toma Jiruzalen.’ Dipôs, Ezekias resebe alguns karta di Senakeribi. Kes karta ta flaba: ‘É midjór bu dizisti. Jeová ka ta salva-u.’ Ezekias pidi Jeová na orason: ‘Jeová, favor, salva-nu, asi tudu algen ta sabe ma bo é Deus verdaderu.’ Jeová fla-l: ‘Rei di Asíria ka ta entra na Jiruzalen. N ta proteje nha sidadi.’

Senakeribi sta ta xintiba suguru ma, ka ta duraba Jiruzalen ta sérba di sel. Má un dia di noti, Jeová manda un anju pa undi ki trópas di Asíria staba djuntadu fóra di sidadi. Kel anju mata 185 mil trópa!  Rei Senakeribi perde se trópas poderozu. Úniku kuza ki el podia fazeba éra bai pa kaza. El perde géra. Jeová proteje Ezekias i Jiruzalen, sima el prometeba. Si bu staba na Jiruzalen, bu ta kunfiaba na Jeová?

‘Anju di Jeová ta sta pértu di kes algen ki ten grandi ruspetu pa El, i el ta salva-s.’ — Salmo 34:7