Bai pa asuntu

Bai pa sugundu menu

Bai pa lista di asuntu

Tistimunhas di Jeová

Kabuverdianu

Kuzê ki bu pode prende ku stórias di Bíblia

 LISON 95

Ka tinha nada ki ta paraba es

Ka tinha nada ki ta paraba es

Un ómi ki ka ta andaba, ta fikaba tudu dia xintadu na porton di ténplu ta pidi zimóla. Un dia di tardi, el odja Pedru ku Juan ta bai pa ténplu. El fla-s: ‘Favor, nhos da-m algun kuza.’ Pedru fla: ‘N tene un kuza pa N da-u ki é mutu más midjór ki dinheru. Na nómi di Jizus, labanta i bu anda!’ Nton, Pedru djuda-l labanta i ómi kumesa ta anda! Gentis fika uma kontenti ku kel milagri, ki monti algen fika ta kridita na Jizus.

Má saserdótis ku saduseus fika uma xatiadu. Es pega apóstlus, es leba-s pa Sinédriu, ki éra tribunal di xéfis di relijion i es fla-s: ‘Kenha ki da nhos puder pa kura es ómi?’ Pedru fla: ‘Nu resebe puder di Jizus Kristu, kel ki nhos mata.’ Xéfis di relijion grita: ‘Nhos para di pâpia sobri Jizus!’ Má apóstlus fla: ‘Nu ten ki pâpia sobri el. Nu ka ta para.’

Lógu ki Pedru ku Juan libertadu, es bai atxa kes otu disiplu i es fla-s kuzê ki kontise. Es ora djuntu i es pidi Jeová: ‘Favor, djuda-nu ten koraji, pa nu pode kontinua ta faze bu trabadju.’ Jeová da-s spritu santu ki djuda-s kontinua ta prega i ta faze kura. Kada bês más algen pasa ta ten fé na Jizus. Saduseus fika ku tantu invéja ki es pega apóstlus i es pô-s na kadiâ. Má duránti noti, Jeová manda un anju ki abri pórta di kadiâ i el fla apóstlus: ‘Nhos torna bai pa ténplu i nhos inxina la.’

Na kel otu dia di sédu, gentis ba fla na Sinédriu: ‘Pórta di kadiâ inda sta fitxadu, má kes ómi ki nhos poi la, dja sai! Es sta na ténplu ta inxina gentis!’ Más un bês, apóstlus pegadu i lebadu pa tribunal. Saserdóti prinsipal fla: ‘Nu ka fla nhos,  pa nhos ka pâpia sobri Jizus?’ Má Pedru responde: ‘Nu ten ki obi ku Deus antis di nu obi ku ómis, pamodi El ki ta manda’.

Kes xéfi di relijion fika uma xatiadu ki es krê mataba kes apóstlu. Má Gamaliel, ki éra fariseu, labanta i el fla: ‘Nhos toma kuidadu! Deus pode sta ku kes ómi li. Nhos krê própi luta kóntra Deus?’ Es obi se konsedju. Dipôs ki es da apóstlus ku xikóti, es torna fla-s pa es para di prega i dipôs es dexa-s bai. Má simé apóstlus ka para. Es kontinua ta prega notísias sábi ku koraji, tantu na ténplu i di kaza en kaza.

‘Nu ten ki obi ku Deus antis di nu obi ku ómis, pamodi El ki ta manda.’ — Atos 5:29