Bai pa asuntu

Bai pa sugundu menu

Bai pa lista di asuntu

Tistimunhas di Jeová

Kabuverdianu

Kuzê ki bu pode prende ku stórias di Bíblia

 LISON 99

Un guarda di kadiâ prende verdadi

Un guarda di kadiâ prende verdadi

Na Filipus tinha un minina, ki éra skravu i ki tinha dimóni. Kel dimóni ta poba el ta dibinha. Se donus ta ganhaba txeu dinheru ku el. Kantu Polu ku Silas bai Filipus, kel minina fika ta anda ses tras pa txeu dia. Dipôs, dimóni pô-l ta grita: ‘Kes ómi li é skravus di kel Deus Más Grandi riba Téra interu.’ Ba ta bai ti ki Polu fla kel dimóni: ‘Na nómi di Jizus Kristu, sai di el!’ Nton dimóni sai di minina.

Kantu kes donu di minina da kónta ma es ka ta konsigiba ganha más dinheru ku kel minina, es fika rei di xatiadu. Es rasta Polu ku Silas i es leba-s pa autoridadis i es fla: ‘Kes ómi li sta viola lei i sta ta inkomoda sidadi interu!’ Kes juís manda pa sota Polu ku Silas i pa pô-s na kadiâ. Guarda di kadiâ pô-s na párti más fundu, más sukuru i ku pé kasadu na tronku.

Polu ku Silas staba ta kanta lovor pa Jeová i kes otu prézu staba ta obi. La pa meia noti, dirapenti txon treme ku tantu forsa, ki kadiâ sakudi di baxu pa riba. Tudu pórtas di kadiâ abri, korenti di tudu prézus rabenta i tronkus sai di ses pé. Guarda kóre pa déntu di kadiâ i el odja ma tudu pórtas staba abértu. El pensa ma tudu prézus dja fujiba, nton el panha un spada pa el mata kabésa.

Kel óra Polu grita: ‘Ka bu mata kabésa! Nu sta tudu li!’ Guarda kóre pa déntu i el poi duedju na txon frenti di Polu ku Silas. El pergunta-s: ‘Kuzê ki N meste faze pa N salva?’ Es fla-l: ‘Bo ku tudu algen di bu kaza meste kridita na Jizus.’ Dipôs Polu ku Silas inxina-s sobri Jeová. Nton, kel guarda ku tudu algen di se kaza batizadu.

‘Nhos ta ser prézu i pirsigidu, nhos ta lebadu pa sinagógas i pa kadiâ. Nhos ta lebadu dianti di reis ku governadoris pamodi nha nómi. Kel-li ta da nhos xansi di da tistimunhu.’ — Lucas 21:12, 13