Bai pa asuntu

Bai pa sugundu menu

Bai pa lista di asuntu

Tistimunhas di Jeová

Kabuverdianu

Kuzê ki bu pode prende ku stórias di Bíblia

 LISON 101

Polu lebadu pa Roma

Polu lebadu pa Roma

Tirseru viaji di pregason di Polu finda na Jiruzalen. La es prende-l i es pô-l na kadiâ. Na un vizon duránti noti, Jizus fla-l: ‘Bu ta bai prega na Roma.’ Polu lebadu di Jiruzalen pa Sezarea i el pasa dôs anu na kadiâ. Kantu ki el staba dianti di Governador Festu ta julgadu, Polu fla: ‘N krê pa Séza julga-m na Roma’. Festu fla: ‘Bu pidi bai pa Séza, nton bu ta bai pa Séza.’ Polu podu na un barku pa Roma i dôs irmon ki txomaba Lúkas ku Aristarku, bai ku el.

Kumesa un grandi tenpistadi na mar, ki dura pa txeu dia. Tudu algen pensaba ma es sta moreba. Má Polu fla: ‘Gentis, un anju fla-m na un sonhu: ‘Ka bu ten medu, Polu. Bu ta bai Roma i ningen ki sta ku bo na barku ka ta móre.’ Nhos ten koraji! Nu ka ta móre.’

Tenpistadi dura 14 dia. Ti ki enfin, es odja téra ta parse. Éra ilha di Malta. Barku inkadja na areia i kebra padás pa padás, má tudu kes 276 algen ki staba na barku konsigi skapa ti ki txiga téra. Alguns bai ta nada i otus bai ta boia na kes padás di barku ti txiga téra. Gentis di Malta kuida di es i es faze-s fogera pa kenta-s pamodi friu.

Três mês dipôs, trópas leba Polu na un otu barku pa Roma. Kantu el txiga, irmons bai nkontra ku el. Kantu Polu odja-s, el agradise Jeová i el fika xeiu di koraji. Nbóra Polu staba prézu, es dexa-l mora na un kaza lugadu i un trópa fika ta djobe-l. El fika la dôs anu. Gentis ta bai djobeba el i el ta apruveitaba pa prega-s sobri Reinu di Deus i el ta inxinaba es sobri Jizus. Polu tanbê skrebe kartas pa kongregasons di Ázia ku Judea. Jeová uza Polu pa spadja notísias sábi pa nasons.

‘Di tudu manera nu ta rakumenda nos kabésa kómu ministrus di Deus, pamodi nu aguenta firmi na txeu provason, na tribulasons, na ténpus di nisisidadi, na difikuldadis.’ — 2 Coríntios 6:4