Bai pa asuntu

Bai pa sugundu menu

Bai pa lista di asuntu

Tistimunhas di Jeová

Kabuverdianu

Kuzê ki bu pode prende ku stórias di Bíblia

 LESSON 82

Jizus inxina se disiplus ora

Jizus inxina se disiplus ora

Tudu kuza ki farizeus ta fazeba éra pa txomaba atenson. Si es fazeba algun kuza dretu, éra sô pa otus algen odjaba. Es ta oraba na rua, asi pa tudu algen odjaba es. Farizeus ta dikoraba orasons ki éra kunpridu i es ta ripitiba es na sinagógas i na kaminhu ki algen ta pasaba pa pode obiba es. Pur isu, gentis fika dimiradu kantu Jizus fla-s: ‘Ka nhos ora sima farizeus. Es ta pensa ma es ta ngana Deus óras ki es ta uza txeu palavra, má es ka sta ngana-l. Orason é entri nhos ku Jeová. Ka nhos ripiti mésmu kuza tudu bês óras ki nhos ta faze orason. Jeová krê pa nu fla-l kel ki nu ta xinti.

‘É si ki nhos debe ora: ‘Nos Pai ki sta na Séu, pa bu nómi ser santifikadu. Faze bu Reinu ben. Pa bu vontadi fazedu na  Séu, asi tanbê na Téra.’’ Tanbê Jizus fla-s ma es debe ora pa kumida, pa pidi perdon di ses pekadu i sobri otus kuza ki es meste.

Jizus fla-s: ‘Nunka ka nhos para di ora. Nhos kontínua ta pidi nhos Pai Jeová, kuzas dretu. Tudu pai ku mai ta krê da ses fidju kuzas dretu. Si nhos fidju pidi nhos pon, nhos ta da-l un pédra? Si el pidi un pexi, nhos ta da-l un kóbra?’

Dipôs Jizus splika-s kuzê ki el krê flaba es: ‘Si nhos sabe da nhos fidjus kuzas dretu, nhos Pai Jeová ka ta da nhos se spritu santu, ki é mutu más midjór? Tudu ki nhos meste faze é pidi.’ Bu ta sigi konsedju di Jizus? Sobri ki asuntus bu ta ora?

‘Nhos kontínua ta pidi, nhos ta dadu; nhos kontínua ta djobe, nhos ta atxa; nhos kontínua ta konku, nhos ta abridu pórta.’ — Mateus 7:7