Bai pa asuntu

Bai pa sugundu menu

Bai pa lista di asuntu

Tistimunhas di Jeová

Kabuverdianu

Kuzê ki bu pode prende ku stórias di Bíblia

 LISON 83

Jizus da monti algen kumida

Jizus da monti algen kumida

Un dia, poku ténpu antis di Páskua di anu 32, apóstlus volta di pregason. Es staba kansadu, pur isu, Jizus leba-s na barku pa Betisaida, undi es podia diskansaba. Má kantu barku txiga pértu di téra, Jizus odja un monti algen ki sigi-s ti la. Nbóra Jizus krê fikaba el sô ku se apóstlus, el resebe kes algen ku amor. El kura kes duenti i el kumesa ta inxina-s. Jizus pasa kel dia ta inxina-s sobri Reinu di Deus. Kantu ki staba kuazi ta sukuru, apóstlus bai pa Jizus i es fla-l: ‘Gentis sta ku fómi. Manda-s ses kaminhu, pa es pode bai kume algun kuza.’

Jizus fla: ‘Es ka meste bai. Nhos da-s algun kuza pa es kume li.’ Apóstlus pergunta: ‘Bu krê pa nu bai kunpra pon pa es?’ Filipi, ki éra un di kes apóstlu, fla: ‘Mésmu si nu tinha txeu dinheru, nu ka ta pode kunpraba pon ki ta txiga pa tudu kes algen ki sta li.’

Jizus pergunta: ‘Kuzê ki nu tene pa kume?’ André fla: ‘Nu tene sinku pon ku dôs pexi pikinoti. Má kel-li ka ta txiga pa nada.’ Jizus fla: ‘Nhos traze-m kes pon ku pexi.’ El fla gentis pa xinta na padja na grupu di 50 ku 100. Jizus toma pon ku pexi, el labanta róstu pa séu i el ora. Dipôs el da apóstlus kumida i es ba ta da gentis ki staba la. Kes 5 mil ómi, ku mudjeris ku mininus kume ti farta. Dipôs, apóstlus djunta kes kumida ki resta, asi pa nada ka  straga. Es djunta 12 balai xeiu! Bu ka ta atxa ma Jizus faze un grandi milagri?

Kes algen fika uma kontenti ku Jizus, ki es krê fazeba el rei. Má Jizus sabia ma inda ka txigaba ténpu pa el sérba rei. Pur isu, el manda kes algen pa bai ses kaminhu i el fla se apóstlus pa es bai pa otu ladu di Mar di Galilea. Es bai na ses barku i Jizus subi un monti el sô. Pamodi? Pamodi el mesteba ténpu pa el oraba pa se Pai. Mésmu okupadu, Jizus sénpri tra ténpu pa el ora.

‘Nhos trabadja, ka pa kumida ki ta kaba, má pa kumida ki ta dura pa tudu ténpu, ki Fidju di Ómi ta ben da nhos.’ — João 6:27