Bai pa asuntu

Bai pa sugundu menu

Bai pa lista di asuntu

Tistimunhas di Jeová

Kabuverdianu

Kuzê ki bu pode prende ku stórias di Bíblia

 LISON 80

Jizus skodje 12 apóstlu

Jizus skodje 12 apóstlu

Dipôs ki Jizus ten más ô ménus un anu i meiu ta prega, el tinha ki tomaba un disizon inportanti. Kenha ki el ta skodjeba pa trabadja djuntu ku el? Kenha ki el ta trenaba pa toma kónta di kongregason? Jizus mesteba di orientason di Jeová, pa tomaba kes disizon li. Pur isu, el bai pa un monti el sô i el ora un noti interu. Kel otu dia di palmanhan, Jizus txoma alguns di se disiplus i el skodje se 12 apóstlu. Bu sabe nómi di algun di es? Ses nómi éra: Pedru, André, Tiagu, Juan, Filipi, Bartulumeu, Tumé, Mateus, Tiagu fidju di Alfeu, Tadeu, Simon i Judas Iskariótis.

André, Pedru, Filipi, Tiagu

Kes 12 apóstlu ta viajaba ku el. Dipôs ki el trena-s, el manda-s bai prega es sô. Jeová da-s puder pa tra dimónis i pa kura duentis.

Juan, Mateus, Bartulumeu, Tumé

Jizus txoma kes 12 apóstlu di se amigus i el ta kunfiaba na es. Farizeus ta atxaba ma apóstlus éra algen sinplis i ku poku skóla. Má Jizus ta pensaba diferenti di farizeus, pur isu el  trena-s pa kel trabadju. Es ta ben staba djuntu ku Jizus na momentus más inportanti di se vida, sima antis di el móre i dipôs ki el resusita. Kuazi tudu kes 12 apóstlu éra di Galilea sima Jizus. Alguns di es éra kazadu.

Tiagu (fidju di Alfeu), Judas Iskariótis, Tadeu, Simon

Apóstlus éra ómis inperfetu ki ta pekaba. Alvês es ta papiaba sen pensa i es ta tomaba disizons mariadu. Tanbê es ka tinha paxénxa. Ti es ta diskutiba kal di es ki éra más inportanti. Má es éra pesoas dretu ki ta amaba Jeová. Es ta sérba kes primeru ki ta fazeba párti di kongregason i es ta ben fazeba un trabadju inportanti dipôs ki Jizus bai pa Séu.

‘N ta txoma nhos di amigus, pamodi N fla nhos tudu kel ki N obi di nha Pai.’ — João 15:15