Bai pa asuntu

Bai pa lista di asuntu

Tistimunhas di Jeová

Skodje língua Kabuverdianu

 LISON 75

Diabu tenta Jizus

Diabu tenta Jizus

Dipôs ki Jizus batizadu, spritu santu leba-l pa dizértu. El staba ku txeu fómi pamodi dja tinha 40 dia ki el ka kumeba nada. Nton Diabu bai tenta Jizus i el fla-l: ‘Si bo é Fidju di Deus, fla kes pédra li pa bira pon.’ Má Jizus responde-l ku un testu di Bíblia: ‘Sta skrebedu, ma pa nu vive nu meste más di ki kumida. Nu meste obi tudu palavra ki Jeová ta fla.’

Dipôs, Diabu dizafia Jizus: ‘Si bo é própi Fidju di Deus, bua di ténplu. Sta skrebedu ma Deus ta manda se anju pa pega-u.’ Má Jizus responde-l otu bês ku un testu di Bíblia: ‘Sta skrebedu, ma nu ka debe poi Jeová na próva.’

Dipôs, Satanás mostra Jizus tudu reinus di mundu, se rikézas ku glória i el fla-l: ‘N ta da-u tudu kes reinu li ku ses glória si bu adora-m sô un bês.’ Má Jizus responde-l: ‘Sai di li, Satanás! Sta skrebedu, ma nu debe adora sô Jeová.’

Dipôs Diabu bai se kaminhu i anjus ben da Jizus kumida. Di kel dia pa dianti, Jizus prega notísias sábi di Reinu. Kel-li ki éra trabadju ki el mandadu faze na Téra. Pesoas ta gostaba di obi kuzas ki Jizus ta inxinaba es i pa undi ki el baba es ta sigiba el.

‘Óras ki Diabu konta mintira, el sta ta mostra kel ki el é, pamodi el é mintirozu i pai di mintira.’ — João 8:44