Bai pa asuntu

Bai pa sugundu menu

Bai pa lista di asuntu

Tistimunhas di Jeová

Kabuverdianu

Kuzê ki bu pode prende ku stórias di Bíblia

 LISON 72

Jizus, kantu el éra jóven

Jizus, kantu el éra jóven

Juzé ku Maria ta moraba na Nazaré, djuntu ku Jizus i kes otu fidjus. Juzé éra karpinteru. Ku se trabadju el ta sustentaba se família. Tanbê el ta inxinaba es sobri Jeová i se Lei. Sénpri es ta baba sinagóga pa adora Jeová i tudu anu es ta baba Jiruzalen pa Páskua.

Kantu Jizus tinha 12 anu, el ku se família faze un viaji lonji pa Jiruzalen sima es ta fazeba tudu anu. Jiruzalen staba xeiu di algen ki baba pa Fésta di Páskua. Dipôs Juzé ku Maria kumesa viaji pa volta pa kaza. Es pensa ma Jizus staba djuntu ku kes otu família. Má kantu es ba djobe-l es ka atxa-l.

Es volta pa Jiruzalen i duránti três dia es fika ta djobe ses fidju. Es bai atxa-l na ténplu. Jizus staba la xintadu na meiu di instrutoris ta obi ku atenson i ta faze-s perguntas difísil. Kes instrutor fika spantadu ku Jizus ki es kumesa ta faze-l  perguntas tanbê i es fika spantadu ku se respósta. Es odja ma el ta ntendeba Lei di Jeová dretu.

Juzé ku Maria staba txeu preokupadu. Maria fla: ‘Dja nu djobe-u tudu kau! Undi ki bu staba?’ Jizus fla: ‘Nhos ka sabe ma lugar ki N debe sta é na kaza di nha Pai?’

Jizus bai pa kaza djuntu ku se pai ku se mai. Juzé inxina Jizus trabadju di karpintaria. Ki tipu di jóven bu ta atxa ma Jizus éra? Sima el ba ta kria, el fika ku más sabedoria i tantu Deus kómu pesoas fika kontenti ku el.

‘Ó Deus, N gosta di faze bu vontadi i bu lei sta na nha korason.’ — Salmo 40:8