Bai pa asuntu

Bai pa sugundu menu

Bai pa lista di asuntu

Tistimunhas di Jeová

Kabuverdianu

Kuzê ki bu pode prende ku stórias di Bíblia

 LISON 65

Ester salva se povu

Ester salva se povu

Ester éra israelita i el staba ta vive na Suzan, un sidadi ki ta fikaba na Pérsia. Txeu anu antis, Nabukudunuzor leba se família pa Jiruzalen. Ken ki kria-l foi se primu Mordekai, i el ta trabadjaba ku Rei Asueru na Pérsia.

Rei Asueru kreba un otu rainha. Se ajudantis leba-l kes mudjer más bunita ki staba na Pérsia. Ester éra un di es. Na meiu di tudu kes mudjer, rei skodje Ester pa ser rainha. Mordekai fla Ester pa ka dexa ningen sabe ma el éra israelita.

Un ómi orgulhozu ki txomaba Aman éra xéfi di tudu kes prínsipi. El kreba pa tudu algen nbaxaba se frenti. Mordekai nega faze kel-la i Aman fika uma xatiadu ki el krê mataba el. Kantu Aman diskubri ma Mordekai éra judeu, el faze un planu pa mata tudu judeus na kel téra. El fla rei: ‘Judeus é un povu prigozu; nhu meste kaba ku es.’ Asueru fla: ‘Faze kel ki bu krê ku es.’ Nton el da-l puder pa faze un lei. Aman faze un lei ki ta flaba, ma na dia 13 di mês di adar tudu judeus ta sérba mortu. Jeová staba ta odja tudu kuza.

Ester ka sabia di kel lei. Nton Mordekai manda-l un kópia di kel lei i el manda fla-l: ‘Bai pâpia ku rei.’ Ester fla: ‘Ken ki bai pâpia ku rei sen el konvidadu ta matadu. Dja ten 30 dia ki rei ka konvida-m pa N bai na el! Má N ta bai. Si el ponta se vara di oru pa mi, N ka ta móre. Si el ka ponta, N ta móre.’

Ester bai pa pátiu di palásiu di rei. Kantu rei odja-l, el ponta se vara di oru pa el. Ester bai pa el i rei pergunta-l: ‘Kuzê ki bu krê Ester?’ Ester fla: ‘N krê konvida nho ku Aman pa un fésta oji di  noti.’ Na kel fésta Ester konvida-s pa un otu fésta. Duránti kel sugundu fésta, rei torna pergunta Ester: ‘Kuzê ki N pode faze pa bo?’ Ester fla: ‘Ten un algen ki krê mata-m mi ku nha povu. Salva-nu favor.’ Rei pergunta-l: ‘Ken ki krê mata-u?’ Ester fla: ‘É Aman, kel ómi mau li.’ Asueru fika uma xatiadu ki el ta mataba Aman kel óra.

Má ningen ka podia kababa ku lei ki Aman faze, nen própi rei. Dipôs, rei skodje Mordekai pa ser xéfi di prínsipis i el da-l puder pa faze un novu lei. Mordekai faze un lei ki ta daba judeus liberdadi di difende ses kabésa óras ki es atakadu. Na dia 13 di mês di adar, judeus mata tudu ses inimigu. Désdi kel dia, es fika ta komemora ses vitória tudu anu.

‘I nhos ta lebadu dianti di governantis ku reis pamodi mi, pa nhos pode da-s tistimunhu i tanbê pa nasons.’ — Mateus 10:18