Bai pa asuntu

Bai pa sugundu menu

Bai pa lista di asuntu

Tistimunhas di Jeová

Kabuverdianu

Kuzê ki bu pode prende ku stórias di Bíblia

 LISON 59

Kuatu rapás ki obi ku Jeová

Kuatu rapás ki obi ku Jeová

Kantu Nabukudunuzor leba prínsipis di Judá pa Babilónia, el enkarega un ómi, ki txomaba Aspenás pa toma kónta di es. Nabukudunuzor fla Aspenás pa djobe déntu di kes ki lebadu pa Babilónia, kes rapás ki éra más spértu i ki tinha más bon saúdi. Kes rapás ki skodjedu ta sérba trenadu duránti três anu. Kel trenu ta priparaba es pa trabadjus inportanti na Babilónia. Es tinha ki prendeba lé, skrebe i pâpia língua akadianu, ki éra língua di Babilónia. Tanbê es tinha ki kumeba mésmu kumida ki rei di Babilónia i kes ki ta trabadjaba ku el na palásiu ta kumeba. Kuatu di kes rapás éra Daniel, Ananias, Mizael ku Azarias. Aspenás pô-s otus nómi na língua di Babilónia:  Beltesazar, Sadraki, Mizaki ku Abidinegu. Dipôs ki es kaba trenu, es ta kontinuaba ta sirbi Jeová?

Kes kuatu rapás staba disididu na faze vontadi di Jeová. Es sabia ma es ka debe kumeba kumida di rei, pamodi Lei di Jeová ta proibiba kume alguns animal. Nton es fla Aspenás: ‘Favor, ka bu obriga-nu kume kumida di rei.’ Aspenás fla-s: ‘Si nhos ka kume, rei ta odja ma nhos sta ta fika fraku i el ta mata-m!’

Daniel tevi un ideia. El fla kel algen ki ta kuidaba di es: ‘Favor, da-nu sô verdura ku agu pa 10 dia. Dipôs konpara-nu ku kes otu rapás ki kume kumida di rei.’ Ses responsável da di akordu.

Dipôs di 10 dia, Daniel ku se três amigu staba más fórti di ki tudu kes otu rapás. Jeová fika kontenti pamodi es obi ku el i el da Daniel sabedoria pa ntende vizons ku sonhus.

Kantu trenu kaba, Aspenás leba rapazis pa Nabukudunuzor. Rei pâpia ku es i el odja ma Daniel, Ananias, Mizael ku Azarias éra más intilijenti i más spértu ki kes otu rapás. El skodje kes kuatu rapás pa trabadja na se palásiu. Rei sénpri ta pidiba es konsedju sobri asuntus inportanti. Jeová da-s más sabedoria di ki kes méstri i kes ki ta fazeba majia pa rei.

Sikrê es staba lonji di ses téra, Daniel, Ananias, Mizael ku Azarias ka skese ma es éra povu di Jeová. Bu ta lenbra sénpri di Jeová, mésmu si bu pai ku bu mai ka sta djuntu ku bo?

‘Ka bu dexa ningen dispreza-u sô pamodi bo é jóven. Má ser izénplu pa kes ki é fiel na bu manera di pâpia, na konportamentu, na amor, na fé, na puréza.’ — 1 Timóteo 4:12