Bai pa asuntu

Bai pa sugundu menu

Bai pa lista di asuntu

Tistimunhas di Jeová

Kabuverdianu

Kuzê ki bu pode prende ku stórias di Bíblia

 LISON 63

Un mô ta skrebe na paredi

Un mô ta skrebe na paredi

Dipôs, Belsazar bira rei di Babilónia. Un dia di noti, el konvida un monti di algen más inportanti di téra pa un fésta. El manda se npregadus traze kópus di oru ki Nabukudunuzor panhaba na ténplu di Jeová. Belsazar ku se konvidadus bebe na kes kópu i es lova ses deus. Bira si, parse un mô di ómi i el kumesa ta skrebe na paredi di sala undi ki es staba ta kume, palavras ki ningen ka ntende.

Belsazar fika xeiu di medu. El txoma se ómis ki ta fazeba majia i el promete-s: ‘Si un di nhos splika-m kes palavra li, N ta faze nhos tirseru ómi más poderozu di Babilónia’. Es tenta, má ninhun di es ka konsigi splika kes palavra. Dipôs rainha entra na sala i el fla: ‘Ten un ómi ki txoma Daniel ki tinha kustumu di splikaba sonhus i kuzas difísil di ntende pa Nabukudunuzor. El ta konsigi splika-u kes palavra li’.

Daniel txomadu pa bai ti rei. Belsazar fla-l: ‘Si bu konsigi lé i splika kes palavra li, N ta da-u un kolar di oru i bu ta bira tirseru ómi más poderozu di Babilónia’. Daniel fla: ‘N ka krê prezentis di nho, má N ta fla nho kuzê ki kes palavra siginifika. Pai di nho, Nabukudunuzor, éra orgulhozu, má Jeová rabaxa-l. Nho sabe tudu kuza ki kontise ku el, má nho mostra falta di ruspetu pa Jeová kantu ki nho bebe vinhu na kópu di oru di Se ténplu. Pur isu, Deus skrebe kes palavra li: Mene, Mene, Tekel i Parsin. Kes palavra li siginifika ma reis di Média ku Pérsia ta ben toma Babilónia i nho ta dexa di ser rei’.

Ta parseba ma nigen ka ta konsigi distruíba Babilónia. Sidadi di Babilónia staba protejidu ku paredis grandi i fórti, tanbê el tinha un riu fundu.  Má na kel mésmu noti, reis di Média ku Pérsia ataka Babilónia. Siru, ki éra rei di Pérsia, disvia agu di riu pa se trópas podia andaba ti ki txiga na portons di Babilónia. Kantu ki es txiga la, portons di Babilónia staba abértu! Trópas entra, es distrui sidadi i es mata rei. Dipôs Siru pasa ta governa Babilónia.

Déntu di un anu, Siru faze un avizu: ‘Jeová fla-m pa N konpo se ténplu na Jiruzalen. Kalker un di se povu ki krê bai djuda, pode bai’. Nton sima Jeová dja prometeba, txeu judeu volta pa ses kaza, 70 anu dipôs ki Jiruzalen distruídu. Siru manda oru ku prata i kuzas ki Nabukudunuzor trazeba di ténplu. Bu odja modi ki Jeová uza Siru pa djuda Se povu?

‘Dja kai! Babilónia kel Grandi dja kai i el bira lugar pa dimónis mora na el.’ — Apocalipse 18:2