Bai pa asuntu

Bai pa sugundu menu

Bai pa lista di asuntu

Tistimunhas di Jeová

Kabuverdianu

Kuzê ki bu pode prende ku stórias di Bíblia

 LISON 66

Esdras inxina Lei di Deus

Esdras inxina Lei di Deus

Dja pasaba uns 70 anu ki kuazi tudu israelitas dja baba Jiruzalen, má alguns inda sta viveba na Pérsia. Un di es, éra un saserdóti ki txomaba Esdras. El ta inxinaba Lei di Jeová. Esdras da kónta ma povu na Jiruzalen ka sta sigiba Lei i el krê ba djudaba es. Rei di Pérsia, ki txomaba Artaxerxis, fla-l: ‘Deus faze-u un ómi xeiu di sabedoria, pa bu pode inxina se Lei. Bai i bu leba tudu kes ki krê bai ku bo.’ Esdras djunta tudu kes algen ki krê voltaba pa Jiruzalen. Es ora pa Jeová proteje-s duránti viaji i dipôs es sai.

Kuatu mês dipôs, es txiga na Jiruzalen. Prínsipis fla Esdras: ‘Israelitas ka obi ku Jeová i es kaza ku mudjeris ki ta adora deuzis falsu.’ Kuzê ki Esdras faze? Na frenti di tudu algen, Esdras poi duedju na txon i el ora: ‘Jeová, dja bu faze txeu kuza pa nos, má simé nu peka kóntra bo.’ Povu rapende, má es kontínua ta faze kuzas mariadu. Esdras skodje ansions ku juízis pa rezolve prublémas. Duránti três mês, kes algen ki ka ta adoraba Jeová tradu fóra.

Dipôs pasa 12 anu. Paredis di Jiruzalen staba tudu prontu. Nton, Esdras djunta povu na un prasa pa lé Lei di Deus pa es. Kantu Esdras abri livru, povu fika sakédu. El lova Jeová i povu labanta mô pa mostra ma es konkorda ku el. Dipôs Esdras lé i splika kel Lei i povu obi ku atenson. Es txora pamodi es odja ma es ka sta ta sigiba Lei di Jeová otu bês. Na kel otu dia, Esdras torna lé kel livru di Lei pa es. Es ntende ma staba kuazi ta txiga ténpu di es komemoraba Fésta di Barakas. Kel óra es kumesa ta pripara pa kel fésta.

Duránti kes 7 dia di fésta, povu staba kontenti i es agradise Jeová pa bon anu di kodjéta. Désdi ténpu di Juzué ka kontiseba un Fésta di Barakas sima kel-la. Dipôs di fésta povu djunta i ora: ‘Jeová, bu tra-nu  di skravidon, bu da-nu kumida na dizértu i bu da-nu es téra bunitu. Má monti bês, nu ka obi ku bo. Bu manda profétas pa aviza-nu, má nu ka obi. Má sénpri bu mostra paxénxa ku nos. Bu mante bu promésa ki bu faze Abraon. Gósi, nu ta promete ma nu ta obi ku bo.’ Es skrebe ses promésa i kes prínsipi ku levitas i saserdótis poi sélu na el.

‘Filís é tudu ken ki obi Palavra di Deus i faze sima Deus fla!’ — Lúkas 11:28, BPK