Bai pa asuntu

Bai pa sugundu menu

Bai pa lista di asuntu

Tistimunhas di Jeová

Kabuverdianu

Kuzê ki bu pode prende ku stórias di Bíblia

 LISON 64

Daniel botadu na kóba di lions

Daniel botadu na kóba di lions

Otu rei di Babilónia éra Dariu. El éra di un país ki txomaba Média. Dariu odja ma Daniel éra un algen spesial. El poi Daniel ta ser xéfi di tudu kes otu ómi inportanti na se téra. Kes ómi fika ku invéja di Daniel i es krê kababa ku el. Es sabia ma Daniel ta oraba pa Jeová três bês pur dia. Nton es fla Dariu: ‘Ó rei, nu debe faze un lei ki ta fla ma tudu algen debe ora sô pa nho. Kenha ki ka obi ku kel lei li, debe botadu na kóba di lions.’ Dariu konkorda ku ses ideia i el sina kel lei.

Kantu Daniel obi kel novu lei, el bai pa se kaza. El poi duedju na txon frenti di un janéla abértu i el ora pa Jeová. Kes ómi invejozu entra na se kaza i es pega-l ta ora. Es kóre pa Dariu i es fla-l: ‘Daniel ka obi ku nho. El ta ora pa se Deus três bês pur dia.’ Dariu gostaba di Daniel i el ka kreba pa el moreba. Duránti kel dia el fika ta pensa na un manera di salva Daniel. Má nen rei ka ta podia mudaba un lei ki el sina. Nton el manda se ómis pa bota Daniel djuntu ku lions mau.

Na kel noti, Dariu staba txeu preokupadu ku Daniel ki nen el ka konsigi durmi. Kel otu dia sédu  palmanhan, el kóre pa kel kóba di lion i el pergunta Daniel: ‘Bu Deus salva-u?’

Dariu obi un vós. Éra Daniel! El fla Dariu: ‘Anju di Jeová fitxa bóka di kes lion. Es ka faze-m nada.’ Dariu fika uma kontenti! El manda pa es tra Daniel di la. Daniel ka tinha ninhun pankada. Dipôs rei da órdi: ‘Nhos bota kes ómi ki ranja es prubléma djuntu ku lions.’ Kantu kes ómi botadu la, kes lion kume-s tudu.

Dariu da otu órdi pa se povu: ‘Tudu algen debe ten grandi ruspetu pa Deus di Daniel. El salva Daniel di kes lion.’

Bu ta ora pa Jeová tudu dia, sima Daniel?

‘Jeová sabe libra kes ki ta sirbi-l di prubléma.’ — 2 Pedro 2:9