Bai pa asuntu

Bai pa sugundu menu

Bai pa lista di asuntu

Tistimunhas di Jeová

Kabuverdianu

Kuzê ki bu pode prende ku stórias di Bíblia

 LISON 2

Deus faze primeru ómi ku primeru mudjer

Deus faze primeru ómi ku primeru mudjer

Jeová faze un jardin na un lugar ki txomaba Éden. Kel jardin staba xeiu di floris, pé di arvis i animal. Dipôs, Deus faze primeru ómi di téra i el sopra-l na se naris. Bu sabe kuzê ki kontise? Kel ómi bira un algen bibu! Jeová pô-l nómi di Adon. Jeová fla-l pa el toma kónta di jardin i pa el poi tudu animal nómi.

Jeová da Adon un órdi inportanti. El fla-l: ‘Bu pode kume fruta di tudu arvis, má ten un ki bu ka debe kume. Si bu kume fruta di kel arvi, bu ta móre’.

Un ténpu dipôs, Jeová fla: ‘N sta ben faze un algen pa djuda Adon.’ El poi Adon ta durmi un sónu pizadu, el tra-l un kostéla i di kel kostéla el faze un mudjer. Se nómi éra Eva. Asi, Adon ku Eva bira primeru família. Modi ki Adon xinti kantu el odja se  mudjer? Adon fika uma kontenti i el fla: ‘Odja kuzê ki Jeová faze di nha kostéla! Ti ki enfin N atxa un algen sima mi.’

Jeová fla Adon ku Eva pa es ten fidju i pa es intxi Téra di algen. El kreba pa es dôs djuntaba i trabadjaba pa bira Téra interu un paraízu ô un lugar bunitu, sima kel jardin di Éden. Má kuzas ka kontise sima Jeová kreba. Pamodi? Nu ta ben sabe más na kel otu kapítlu.

‘Kel ki kria-s na komésu faze-s ómi ku mudjer.’ — Mateus 19:4