Bai pa asuntu

Bai pa sugundu menu

Bai pa lista di asuntu

Tistimunhas di Jeová

Kabuverdianu

Respóstas pa 10 pergunta ki jóvens ta faze

 PERGUNTA 1

N konxe nha kabésa dretu?

N konxe nha kabésa dretu?

PAMODI KI É INPORTANTI

Sabe ken ki bo é i kuzê ki bu ta kridita na el, ta djuda-u toma bons disizon óras ki bu sta sufri influénsia pa faze kuzas mariadu.

KUZÊ KI BU TA FAZEBA?

Imajina kel situason li: Dja ten uns 10 minutu ki Kátia txiga na un fésta i el obi se trás un vós ki el konxe ta fla-l:

“Kuzê ki bu sta faze li bo sô?”

Sima Kátia vira, el odja se amiga Jasira ku dôs garafa di serveja na mô. Jasira da-l un serveja i fla-l: “Toma, bo é ka mininu más. Bu meste divirti!”

Kátia ka tene gana toma, má Jasira é se amiga. I Kátia ka krê pa se amiga atxa ma el é skizitu. Dipôs, Jasira é un algen dretu. Si el sta ta bebe é pamodi ka ten nada di mariadu. Kátia pensa: ‘É sô un bebiba. Kel-li é ka sima toma dróga’.

Si bu staba na lugar di Kátia, kuzê ki bu ta fazeba?

PARA I BU PENSA!

Pa bu toma bon disizon na un situason sima kel-li, bu meste konxe bu kabésa dretu. Kel-li krê fla, sabe ken ki bo é pa déntu i na kuzê ki bu ta kridita. Si bu konxe bu kabésa dretu é sima si bu ten un arma poderozu ki ta djuda-u kontrola bu vida envês di dexa otus algen kontrola-u. – 1 Coríntios 9:26, 27.

Modi ki bu pode konsigi ten kel forsa li? Respósta di kes pergunta li pode djuda-u.

 1 KAL KI É NHAS PONTU FÓRTI?

Óras ki bu konxe dretu bus pontu fórti i kuzas ki bo é bon na es, bu kunfiansa ta bira más fórti.

IZÉNPLU DI BÍBLIA: Apóstlu Polu skrebe: ‘Má, mésmu ki N ka bon na pâpia, konhisimentu gó N ten.’ (2 Coríntios 11:6) Polu ka ta dexaba ki kuzas mariadu ki otus algen ta flaba di el, fazeba el perde kunfiansa pamodi el tinha txeu konhisimentu di Bíblia. El konsigi mante firmi. – 2 Coríntios 10:10; 11:5.

ANALIZA BU KABÉSA.

Skrebe un pontu fórti ki bu ten ô un kuza ki bo é bon na el.

Skrebe un kualidadi ki bu ta mostra más txeu. (Pur izénplu, bo é un algen ki ta mostra txeu amor? Un algen ki gosta di da? Un algen di kunfiansa? Un algen ki gosta di txiga na óra?)

2 KAL KI É NHAS PONTU FRAKU?

Sima ferújen ta straga féru, nos tanbê si nu dexa nos frakézas kontrola nos vida, nu ta dexa di ser kel tipu di algen ki nos é.

IZÉNPLU DI BÍBLIA: Apóstlu Polu staba sienti di se frakézas. El skrebe: ‘Na kel ómi ki ami é pa déntu N ta ama lei di Deus, má N ta odja na nha korpu otu lei ta briga ku lei di nha menti i ta leba-m prézu pa lei di pekadu.’ – Romanos 7:22, 23.

ANALIZA BU KABÉSA.

Kal ki é bu pontu fraku ki bu meste prende kontrola?

 3 KAL KI É NHAS OBIJETIVU?

Bu ta pidiba un kondutor di táxi pa fika ta da-u vólta na un rua ti ki gazulina seka? Kel-li é nosentéza – i bu ta pagaba txeu dinheru atoa!

Kuzê ki bu ta prende? Ten obijetivus na bu vida ta djuda-u orienta, bu ka ta fika atoa, ta da pa li ta da pa la. Bu ta sabe kuzê ki bu krê faze na bu vida i modi ki bu ta faze-l.

IZÉNPLU DI BÍBLIA: Apóstlu Polu skrebe: ‘N ka ta kóre sen rumu’. (1 Coríntios 9:26) Polu ka ta fikaba ku mô maradu ta spéra pa kuzas kontise. Má, el tinha obijetivus i el ta sforsaba pa txiga na es. – Filipenses 3:12-14.

ANALIZA BU KABÉSA.

Skrebe três obijetivu ki bu ta gostaba di konsigi na anu ki ta ben.

4 KUZÊ KI N TA KRIDITA NA EL?

Óras ki bu konxe bu kabésa dretu, bu ta ser sima un pé di arvi ki tene raís ben finkadu na txon, mésmu ki faze un grandi tenporal el ka ta kai

Si bu ka ta kridita na nada, bu ta fika sen sabe kuzê ki bu debe faze. Sima un animal ki txoma kamalion ki ta troka di kor konfórmi lugar ki el sta, bu ta fika ta troka di kor ô muda di opinion sô pa bu pode fika sima bus koléga, ki bu ta sta djuntu ku es. Si bu faze si, bu ta mostra ma bu ka konxe bu kabésa dretu.

Má, óras ki bu ta faze un kuza pamodi bu ta kridita na el, bu ta mostra ma bu sabe ki tipu di algen bo é, ka ta nporta kuzê ki otus algen krê faze.

IZÉNPLU DI BÍBLIA: Kantu proféta Daniel éra jóven ‘el disidi na se korason’ ma el ta obiba ku lei di Deus, mésmu lonji di se família. (Daniel 1:8) Asi, el mostra klaru ma el konxeba se kabésa dretu. Kes kuza ki Daniel faze na se vida é kuzas ki el ta kriditaba na el.

ANALIZA BU KABÉSA.

Kuzê ki bu ta kridita na el? Pur izénplu: Bu ta kridita na Deus? Si bu ta kridita, pamodi? Kuzê ki ta da-u sertéza ma Deus ten?

Bu ta atxa ma sigi leis di konportamentu di Deus ta djuda-u ten un vida midjór? Si bu ta atxa ma sin, pamodi?

Bu ta gostaba di ser sima un folha ki kualker bentinhu ta fulha-l pa li pa la ô sima un pé di arvi finkadu ki ta aguenta un grandi tenporal? Si bu sabe dretu ki tipu di algen bo é, bo é sima un pé di arvi fórti. Kel-li ta djuda-u atxa respósta di kel pergunta li: N konxe nha kabésa dretu?