Bai pa asuntu

Bai pa sugundu menu

Bai pa lista di asuntu

Tistimunhas di Jeová

Kabuverdianu

Respóstas pa 10 pergunta ki jóvens ta faze

 PERGUNTA 9

N debe kridita na ivoluson?

N debe kridita na ivoluson?

PAMODI KI É INPORTANTI

Si ivoluson é verdadi, vida ka ten ninhun obijetivu. Si kriason é verdadi nu pode atxa respóstas pa perguntas sobri vida i futuru.

KUZÊ KI BU TA FAZEBA?

Imajina kel situason li: Adilson sénpri kridita na Deus i ma é Deus ki kria tudu kuza. Má gósi el tene dúvida pamodi se prufesor di biolojia fla ma siênsia dja da próva ma tudu kuza ben di ivoluson. Má Adilson ka krê pasa vergónha frénti se kolégas. El fika ta pensa: ‘Si sientistas dja da próva ma ivoluson é verdadi, ken ki é mi pa N fla ma é kasí?’

Si bo éra Adilson, bu ta kriditaba na ivoluson sô pamodi ten livrus ki ta fla ma el é verdadi?

PARA I BU PENSA!

Pesoas ki ta kridita na kriason ô na ivoluson ta fla na kuzê ki es ta kridita, má es ka sabe dretu pamodi ki es ta kridita na el.

  • Alguns algen ta kridita na kriason sô pamodi es inxinadu na igreja.

  • Alguns algen ta kridita na ivoluson sô pamodi es inxinadu na skóla.

 6 PERGUNTA KI BALE PÉNA ANALIZA

Bíblia ta fla: ‘Tudu kaza ten un algen ki faze-l, má ken ki faze tudu kuzas é Deus.’ (Hebreus 3:4) Bu ta atxa ma é simé?

Fla ma vida ka tevi un Kriador é sima fla ma kel kaza li ka ten ningen ki faze-l

TA FLADU: Tudu kuza ki ten na Séu ku Téra parse através di un grandi spluzon ki ta txomadu big bang.

1. Kenha ô kuzê ki faze kel big bang kontise?

2. Na kal ki ta da pa kridita: tudu kuza parse el sô ô ten un algen ki faze tudu kuza?

TA FLADU: Algen ben di animal.

3. Si algen ben di animal, sima makaku, nton pamodi ki intilijénsia di ómi ku makaku ten diferénsa sima di Séu pa Téra?

4. Pamodi ki ti kes fórma di vida más sinplis é rei di difísil nu ntende modi ki es fazedu?

TA FLADU: Ten próva ma tudu kuza ben di ivoluson.

5. Kes algen ki ta fla si, dja piskiza kel asuntu li dretu?

6. Kantu algen ki ta kridita na ivoluson sô pamodi es obi ta fladu ma ken ki é intilijenti ta kridita na ivoluson?

“Si bu sta ta anda na un florésta i bu atxa un kaza di madera bunitu, kuzê ki ta pasa-u pa kabésa: ‘Fórti bunitu! Kes pé di arvi kai di manera ki bira un kaza.’ Klaru ki nau! Ka ta da pa kridita na un kuza di kel-li. Nton nu debe kridita ma tudu ki ten na Séu ku Téra parse el sô?” – Júlia.

“Imajina ma algen fla-u ma na un fábrika ki ta fazedu livru kontise un spluzon i ma tinta spadja i bira un bon disionáriu. Bu ta kriditaba na un kuza di kel-li?” – Gwen.

 PAMODI KI NU DEBE KRIDITA NA DEUS?

Bíblia ta insentiva-nu pa nu uza nos ‘kapasidadi di pensa.’ (Romanos 12:1) Kel-li krê fla ma nu ka debe kridita na Deus sô pamodi:

  • SENTIMENTU (N ta xinti ma izisti un ser más poderozu ki nos.)

  • INFLUÉNSIA DI OTUS ALGEN (Tudu algen na nha relijion ta pensa si.)

  • FAMÍLIA (Nha pai ku nha mai fla-m ma N debe kridita na Deus, é ka mi ki skodje.)

Envês di pensa si, bu debe ten motivus fórti pa bu kridita na algun kuza.

“Óras ki N sta na aula ta obi prufesor ta splika modi ki nos korpu ta funsiona, kel-li ta da-m sertéza ma Deus izisti. Kada párti di korpu ten se funson, mésmu kes más pikinoti. I tudu kes párti ta funsiona sen nu da kónta. Nos korpu ka ten konparason!” – Tereza.

“Óras ki N ta odja un prédiu rei di altu, un barku ô un karu, N ta fika ta pensa: ‘Ken ki faze-l?’ Ten ki ser un algen intilijenti pa faze un karu. Pur izénplu, tudu pésa ten ki sta ben armadu pa karu trabadja dretu. Si ten un algen ki faze karu, tanbê ten ki ten un algen ki faze nos korpu.” – Ricardo.

“Kada bês ki N ta studaba siênsia ta fikaba más difísil inda pa N kridita na ivoluson. . . . Pa mi, kridita na ivoluson ta iziji más fé di ki kridita na un Kriador.” – António.

PA BU PENSA

Mésmu dipôs di txeu anu ta faze piskiza sobri ivoluson, ti inda sientistas ka txiga un akordu sobri es tioria. Si nen sientistas, ki ta fladu ma ten más konhisimentu sobri es asuntu, ka ta konkorda ku kunpanheru, é eradu bu ten dúvida sobri ivoluson?