Bai pa asuntu

Bai pa sugundu menu

Bai pa lista di asuntu

Tistimunhas di Jeová

Kabuverdianu

Respóstas pa 10 pergunta ki jóvens ta faze

 PERGUNTA 10

Bíblia pode djuda algen?

Bíblia pode djuda algen?

PAMODI KI É INPORTANTI

Bíblia ta fla: ‘Tudu ki sta na Skritura ben di Deus’. (2 Timóteo 3:16) Si kel-li é verdadi, nton Bíblia pode da-u midjór orientason na bu vida.

KUZÊ KI BU TA FAZEBA?

Imajina kel situason li: Davidi sta ta konduzi karu na un zóna ki el ka konxe. Sinal na strada i kes plaka ku nómi di zóna ta mostra ma el sta na lugar mariadu. Dja el da kónta ma dja el perde. Na viaji el entra na algun rua mariadu.

Si bo éra Davidi, kuzê ki bu ta fazeba?

PARA I BU PENSA!

Bu pode skodje:

  1. Pidi algun algen informason.

  2. Djobe na mapa ô uza GPS.

  3. Kontínua ta konduzi karu, ku speransa na atxa kaminhu sértu.

Klaru ki kel últimu sujiston é kel ki ménus ta djuda-u.

Kel sugundu sujiston é midjór ki kel primeru. Afinal, ka ten nada midjór di ki ten un mapa ô un GPS pa djuda-u atxa kaminhu.

Bíblia pode djuda-u di mésmu manera!

El é livru más konxedu na mundu. Bíblia pode:

  • djuda-u lida ku prublémas di vida

  • djuda-u konxe bu kabésa dretu i bira un algen midjór

  • mostra-u modi ki bu pode ten midjór vida ki ten

 RESPÓSTA PA KES PERGUNTA MÁS INPORTANTI DI VIDA

Sin ki nu prende pâpia, nu ta faze pergunta.

  • Pamodi ki Séu é azul?

  • Kantu stréla ki ten?

Sima nu ta ba ta kria nu ta faze pergunta sobri kes kuza ki nu ta odja ta kontise na mundu.

I si tudu kel ténpu li respóstas dja staba na Bíblia?

Txeu algen ta fla ma Bíblia ten un monti stória inventadu, ka ta sirbi pa nos ténpu ô ma é ka faxi di ntende. Má prubléma sta na Bíblia, ô na kuzê ki kes algen ta atxa ma es sabe di Bíblia? I si kes algen sta nganadu?

Pur izénplu, txeu algen ta atxa ma Bíblia ta fla ma é Deus ki ta manda na mundu. Má é simé? Es mundu sta di kabésa pa baxu! El sta xeiu di dór i sufrimentu, duénsa i mórti, mizéria i disgrasa. Modi ki un Deus ki ta ama-nu txeu, ta kastiga-nu di kel manera li?

Bu ta gostaba di sabe respósta? Bu pode fika spantadu ku kuzê ki Bíblia ta fla sobri ken ki sta governa mundu!

Sima dja bu odja, konsedjus ki sta na kel folhetu li tradu di Bíblia. Tistimunhas di Jeová ten sertéza ma Bíblia ta mostra-nu kal ki é midjór kaminhu ki nu debe sigi. Pamodi el ‘ben di Deus i el ta sirbi pa inxina, pa koriji, pa poi kuzas na kaminhu’. (2 Timóteo 3:16, 17) Bu ka ta atxa ma midjór kuza ki bu debe faze é analiza Bíblia, un livru antigu má ki ti inda ta sirbi?