Bai pa asuntu

Bai pa sugundu menu

Bai pa lista di asuntu

Tistimunhas di Jeová

Kabuverdianu

Notísias sábi di Deus pa bo!

 LISON 11

Modi ki prinsípius di Bíblia ta djuda-nu?

Modi ki prinsípius di Bíblia ta djuda-nu?

1. Pamodi ki nu meste orientason?

Modi ki prinsípius di Bíblia pode leba-nu toma medidas di suguransa? — SALMO 36:9.

Nos Kriador sabe más ki nos. Sima un Pai xeiu di amor, el ta kuida di nos. Deus ka faze-nu pa nu vive sen el. (Jeremias 10:23) Sima un kriansa meste di orientason di se pai ku se mai, nos tanbê nu meste orientason di Deus. (Isaías 48:17, 18) Orientason ki prinsípius di Bíblia ta da-nu é prezenti di Deus. — Lé 2 Timóteo 3:16.

Leis ku prinsípius di Jeová, ta inxina-nu midjór manera di vive gósi i ta mostra-nu modi ki Deus ta bênsua-nu pa tudu ténpu na futuru. Nu debe da valor pa tudu orientason di Deus pamodi é el ki faze-nu. — Lé Salmo 19:7, 11; Revelação (Apocalipse) 4:11.

2. Kuzê ki é prinsípius di Bíblia?

Prinsípius di Bíblia é kes verdadi prinsipal ki ta mostra-nu kuzê ki Deus krê pa nu faze na txeu situason. Má lei pode fazedu pa un sértu situason. (Deuteronômio 22:8) Nu meste uza nos kapasidadi di pensa pa nu ntende modi ki un prinsípiu ta uzadu na un sértu situason. (Provérbios 2:10-12) Pur izénplu, Bíblia ta fla ma vida é un prezenti di Deus. Es verdadi prinsipal pode djuda-nu na trabadju, na kaza i óras ki nu ta viaja. Kel-la ta leba-nu toma medidas di suguransa. — Lé Atos 17:28.

3. Kal ki é dôs prinsípiu más inportanti?

Jizus pâpia di dôs prinsípiu di grandi inportánsia. Kel primeru ta mostra kal ki é obijetivu prinsipal di vida, ki é konxe Deus, ama-l i faze se vontadi. Na tudu kuza ki nu ta faze nu debe sigi es prinsípiu li. (Provérbios  3:6) Kes algen ki ta sigi es prinsípiu di verdadi, ta ganha amizadi ku Deus, ta ser filís i ta ben ten vida pa tudu ténpu. — Lé Mateus 22:36-38.

Kel sugundu prinsípiu ta djuda-nu da dretu ku kunpanheru. (1 Coríntios 13:4-7) Pa sigi es prinsípiu nu ten ki trata algen sima Deus ta trata-nu. — Lé Mateus 7:12; 22:39, 40.

4. Modi ki prinsípius di Bíblia ta djuda-nu?

Prinsípius di Bíblia ta inxina famílias sta unidu ku amor. (Colossenses 3:12-14) Palavra di Deus tanbê ta proteje famílias pamodi el ta inxina-s otu prinsípiu ki ta orienta-s: ma kazamentu debe ser pa tudu ténpu. — Lé Gênesis 2:24.

Sigi prinsípius di Bíblia pode djuda-nu na trabadju i ta da-nu pas na korason. Pur izénplu, txeu patron ta krê npregadus sériu i trabadjador sima prinsípius di Bíblia ta fla. (Provérbios 10:4, 26; Hebreus 13:18) Palavra di Deus tanbê ta inxina-nu sta kontenti ku kuzas ki nu ta meste na dia-dia i da nos amizadi ku Deus más valor ki nos trabadju. — Lé Mateus 6:24, 25, 33; 1 Timóteo 6:8-10.

Sigi prinsípius di Bíblia pode djuda-nu ten más saúdi. (Provérbios 14:30; 22:24, 25) Pur izénplu, si nu obi ku lei di Deus ki ta fla ma nu ka debe bebe dimás, nu ta libra di asidentis i di duénsas ki ta mata. (Provérbios 23:20) Jeová ka ta kondena bebe désdi ki é na limiti. (Salmo 104:15; 1 Coríntios 6:10) Prinsípius di Deus ta djuda-nu pamodi es ta inxina-nu toma kudadu ku kuzê ki nu ta faze i ku kuzas ki nu ta pensa na el. (Salmos 119:97-100) Má kristons di verdadi ka ta ruspeta kuzê ki Deus ta fla sô pamodi el ta djuda-s. Es ta faze-l pa da Jeová ónra. — Lé Mateus 5:14-16.