1. Modi ki maldadi kumesa?

Deus sta ta dexa ómis governa pa un ténpu ki ta da pa mostra ma es ka ta konsigi kaba ku prublémas di mundu

Maldadi kumesa na Téra kantu Satanás konta mintira pa primeru bês. Na komésu el éra un anju perfetu, má ‘el ka kontínua finkadu na verdadi’. (João 8:44) El kumesa ta xinti gana pa algen adora-l, ki é un kuza ki sô Deus ki debe resebe. Satanás konta Eva mintira, i el konsigi pô-l ta obi ku el enbês di obi ku Deus. Adon tanbê djunta ku Eva i el ka obi ku Deus. Nton sufrimentu ku mórti é rezultadu di kuza ki Adon faze. — Lé Gênesis 3:1-6, 19.

Kantu Satanás ngoda Eva pa ka obi ku Deus, el kumesa ta rabela kóntra direitu ki Deus ten di governa, ô se lugar di Algen más Grandi ki ten. Sima Satanás, kuazi tudu algen ka ta dexa Deus ser ses Governanti. Nton, nu pode fla ma Satanás bira ‘governanti di mundu’. — Lé João 14:30; 1 João 5:19.

2. Staba algun kuza mariadu na kriason di Deus?

Tudu kuza ki Deus faze é perfetu. Tudu algen ki Deus faze na séu ku na Téra ta podeba faze tudu kuza sima El kreba. (Deuteronômio 32:4, 5) El faze-nu livri pa nu skodje si nu ta faze kuza dretu ô mariadu. Es liberdadi ta da-nu xansi di mostra Deus nos amor pa el. — Lé Tiago 1:13-15; 1 João 5:3.

3. Pamodi ki Deus ta dexa sufrimentu kontise?

Pa un ténpu, Jeová sta ta dexa algen kontínua ta rabela kóntra direitu ki el ten di governa. Pamodi? Pa mostra ma ka ten ninhun manera di tenta governa sen El, ki ta midjora vida di pesoas. (Eclesiastes 7:29; 8:9) Dipôs  di 6 mil anu di stória di ómi na mundu, un kuza fika klaru: govérnus di ómi ka ta konsigi kaba ku géra, krimi, injustisa i duénsa. — Lé Jeremias 10:23; Romanos 9:17.

Govérnu di Deus é diferenti di govérnu di ómi pamodi el ta djuda kes algen ki ta seta-l. (Isaías 48:17, 18) Ka ta dura, Jeová ta ben kaba ku tudu govérnu. Sô kes algen ki skodje Jeová pa governa-s é ki ta ben mora na Téra. — Isaías 11:9. Daniel 2:44.

4. Kuzê ki paxénxa di Deus ta da-nu xansi di faze?

Satanás fla ma ningen ka ta sirbi Jeová pamodi amor. Bu ta gostaba di mostra ma é kasí? Bu pode! Paxénxa di Deus ta da-nu xansi di mostra si nu sta di ladu di se govérnu ô di govérnu di ómi. Nos manera di vive ta mostra klaru kal ki nu skodje. — Lé 1:8-12; Provérbios 27:11.

5. Modi ki nu pode skodje Deus pa ser nos Governanti?

Kel ki nu skodje ta mostra si nu krê pa Deus ser nos Governanti

Pa nu skodje Deus pa ser nos Governanti nu ten ki buska sabe kal ki é adorason verdaderu ki sta na Bíblia ki é se Palavra, i vive sima el ta fla. (João 4:23) Óras ki nu ka mete na pulítika ô na géra, sima Jizus ka mete, nu ta mostra ma nu ka krê pa Satanás ser nos governanti. — Lé João 17:14.

Satanás ta uza se puder pa poi kuzas mariadu ta parse ma es é dretu. Si nu ka ta faze kes kuza mariadu, nos amigu i nos família pode faze-nu trósa i ti fika kóntra nos. (1 Pedro 4:3, 4) Asi, nu ten ki skodje. Nu ta faze amizadi ku kes algen ki ta ama Deus? Nu ta sigi leis di Deus ki é xeiu di amor i ki ta inxina-nu vive midjór? Si nu faze si, nu ta mostra ma Satanás konta mintira kantu el fla ma óras ki algen sta kóntra nos, nu ka ta faze vontadi di Deus. — Lé 1 Coríntios 6:9, 10; 15:33.

Amor di Deus pa nos ta da-nu sertéza ma maldadi ku sufrimentu ta ben kaba. Kes algen ki mostra ma es ta kridita na kel-li, ta ben vive pa tudu ténpu na Téra. — Lé João 3:16.