Bai pa asuntu

Bai pa sugundu menu

Bai pa lista di asuntu

Tistimunhas di Jeová

Kabuverdianu

Notísias sábi di Deus pa bo!

 LISON 3

Es notísia sábi ben di Deus mê?

Es notísia sábi ben di Deus mê?

1. Ken ki é Autor di Bíblia?

Bíblia ta da un notísia sábi: pesoas ta ben vive na Téra pa tudu ténpu. (Salmo 37:29) Bíblia ten 66 livru pikinoti. Deus skodje uns 40 ómi fiel pa skrebe-s. Dja ten más di 3.500 anu ki Muizes skrebe kes primeru sinku livru di Bíblia. Apóstlu Juan skrebe kel últimu livru di Bíblia dja ten más di 1.900 anu. Kes ideia ki sta na Bíblia é di kenha? Deus uza se spritu santu pa dexa kes skritor di Bíblia sabe kuzê ki es ta skrebeba. (2 Samuel 23:2) Es ka skrebe ses ideia, es skrebe ideias di Deus. Nton, Autor di Bíblia é Jeová. — Lé 2 Timóteo 3:16; 2 Pedro 1:20, 21.

2. Modi ki nu pode sta sértu ma Bíblia é di Deus?

Nu sabe ma Bíblia é di Deus pamodi el ta fla-nu kuzê ki sta pa kontise sen fadja nada i tintin pa tintin. Ningen ka ta pode faze kel-la. (Josué 23:14) É sô Deus Tudu-Poderozu ki pode konta futuru di es mundu sen fadja nada. — Lé Isaías 42:9; 46:10.

Nu ta speraba ma un livru ki ben di Deus ka ta tenba konparason, i Bíblia é si. Dja distribuidu bilhons di kópia di Bíblia na senténas di língua. Dja dura ki el skrebedu, má kel ki el ta fla di siénsia é sértu. Tanbê, di kes 40 skritor ninhun ka fla un kuza pa kel otu fla otu kuza. * Inda más, Bíblia ta mostra klaru ma Deus ta ama-nu i ma el ten puder di muda vida di pesoas pa más midjór. É pamô kes kuza li ki milhons di pesoa ta kridita ma Bíblia é Palavra di Deus. — Lé 1 Tessalonicenses 2:13.

 3. Ki asuntus nu ta atxa na Bíblia?

Asuntu ki más nu ta atxa na Bíblia é notísias sábi di kuzas bon ki Deus krê pa tudu algen. Skrituras ta splika modi ki ómi, na komésu, perde xansi di vive na paraízu na Téra i el ta fla modi ki Paraízu ta ben rekuperadu. — Lé Revelação (Apocalipse) 21:4, 5.

Palavra di Deus ten tanbê leis, prinsípius i konsedjus. Bíblia ta fla-nu kuzê ki Deus faze ku kes algen ki faze kuzas dretu i ku kes ki faze kuzas mariadu. Ku kes izénplu la bu pode konxe manera di ser di Deus. Nton, Bíblia pode djuda-u konxe Deus. Bíblia ta fla modi ki bu pode bira amigu di Deus. — Lé Salmo 19:7, 11; Tiago 2:23; 4:8.

4. Modi ki bu pode ntende Bíblia?

Es folhetu ta ba djuda-u ntende Bíblia. Modi? Di mésmu manera ki Jizus ta fazeba. Jizus ta uzaba diferentis testu pa splika “siginifikadu di Skrituras”. — Lé Lúkas 24:27, 45, BPK.

É poku kuza ki ta da-nu tantu alegria sima kes notísia sábi ki Deus ten pa nos. Má simé, alguns algen ka ta liga-s i otus, ti ta dispreza-s. Má ka bu dexa kel-la dizanima-u. Bu speransa di ten vida itérnu ta dipende di bu konxe Deus. — Lé João 17:3.

 

^ par. 3 Djobe folhetu Um livro para todas as pessoas, na purtugês.