Bai pa asuntu

Bai pa sugundu menu

Bai pa lista di asuntu

Tistimunhas di Jeová

Kabuverdianu

Notísias sábi di Deus pa bo!

 LISON 9

Modi ki bu família pode ser filís?

Modi ki bu família pode ser filís?

1. Ómi ku mudjer meste kaza na rejistu pa ses família ser filís?

Notísias sábi ta ben di Jeová. El é un Deus filís i el krê pa tudu família ser filís. (1 Timóteo 1:11) É el ki kria kazamentu. Un ómi ku un mudjer meste sta kazadu na rejistu pa ser filís. Pamodi? Kaza na rejistu ta djuda família ser filís pamodi es ta xinti suguru i es ta kria ses fidjus midjór. Kes ki krê obi ku Deus debe ruspeta lei di kazamentu na rejistu di lugar undi ki es ta mora. — Lé Lúkas 2:1, 4, 5, BPK.

Kuzê ki Deus ta atxa di kazamentu? El krê pa óras ki ómi ku mudjer kaza, pa es ka sipara nunka más. Jeová krê pa maridu ku mudjer ser fiel ku kunpanheru. (Hebreus 13:4) El ten raiba di divórsiu. (Malaquias 2:16) Má si un algen kazadu faze adultériu, Jeová ta seta pa kel otu divôrsia i kaza otu bês. — Lé Mateus 19:3-6; 9.

2. Modi ki maridu ku mudjer debe trata kunpanheru?

Jeová faze ómi ku mudjer pa es djuda kunpanheru na kazamentu. (Gênesis 2:18) Maridu é xéfi di família, nton el debe sustenta se família i inxina-s kuzas di Deus. El debe ten un amor fórti pa se mudjer. Maridu ku mudjer debe ruspeta i krê kunpanheru txeu. Pa kazamentu ser filís, maridu ku mudjer debe púrdua kunpanheru pamodi ninhun di es é ka perfetu. — Lé Efésios 4:31, 32; 5:22-25, 33; 1 Pedro 3:7.

3. Si bu ka sta filís na kazamentu, bu debe larga ken ki bu sta kazadu ku el?

Si bu sta ta ten prubléma ku ken ki bu sta kazadu ku el, faze di tudu pa nhos trata kunpanheru ku amor. (1 Coríntios  13:4, 5) Bíblia ka ta fla ma siparason ta rezolve prublémas normal di kazamentu. — Lé 1 Coríntios 7:10-13.

4. Fidjus, kuzê ki Deus krê pa nhos?

Jeová krê pa nhos ser filís. El ta da nhos midjór konsedju pa nhos goza nhos juventudi. El krê pa nhos tra pruvetu di kuzê ki nhos pai ku nhos mai sabe i di kes kuza ki es prende di vida. (Colossenses 3:20) Jeová ki é nos Kriador, krê tanbê pa nhos xinti alegria di faze se vontadi i di se Fidju, Jizus. — Lé Eclesiastes 11:9–12:1; Mateus 19:13-15; 21:15, 16.

5. Pai ku mai, modi ki nhos pode djuda nhos fidju ser filís?

Nhos ten ki faze di tudu pa nhos da nhos fidjus kumida, kaza i ropa. (1 Timóteo 5:8) Má é ka sô kel-la. Tanbê nhos debe mostra nhos fidjus ma, pa es ser filís, es meste pa Deus inxina-s i es debe ama-l. (Efésios 6:4) Óras ki bu ta mostra amor pa Deus kel-la pode toka korason di bus fidjus. Si bu krê djuda bus fidjus midjora ses manera di pensa, da-s edukason di Bíblia. — Lé Deuteronômio 6:4-7; Provérbios 22:6.

Bu pode djuda bus fidjus si bu da-s forsa i si bu ngaba-s. Es meste tanbê di edukason i kastigu. Asi, bu ta libra-s di faze kuzas ki pode ka dexa-s ser filís. (Provérbios 22:15) Má kastigu nunka ka debe dadu dimás. — Lé Colossenses 3:21.

Tistimunhas di Jeová dja faze txeu livru ku bazi na Bíblia ki é própi pa djuda pai ku mai ku fidjus. — Lé Salmo 19:7, 11.