Bai pa asuntu

Bai pa sugundu menu

Bai pa lista di asuntu

Tistimunhas di Jeová

Kabuverdianu

Notísias sábi di Deus pa bo!

 LISON 13

Kuzê ki ta ben kontise ku relijion?

Kuzê ki ta ben kontise ku relijion?

1. Tudu relijion é dretu?

Na tudu relijion ten algen ki, di korason, krê poi Deus fika kontenti. Sabe ma Deus ta odja i ta preokupa ku kes algen la é un notísia sábi. Má é duedu odja relijion ta uzadu pa kuzas mariadu. (2 Coríntios 4:3, 4; 11:13-15) Sima notísias ta fla, alguns relijion sta metedu na terorismu, na matansa, na géra, na maltrata i viola mininu. Fórti kuzas tristi pa kes algen ki ta kridita na Deus di korason! — Lé Lúkas 21:7, 8, BPK; Mateus 24:11, 12.

Relijion verdaderu ta da Deus glória má relijion falsu ta mágua Deus. Relijion falsu ta inxina kuzas ki ka sta na Bíblia, sima mintira kóntra Deus i sobri mortus. Má Jeová krê pa tudu algen sabe verdadi sobri El. — Lé Ezequiel 18:4; 1 Timóteo 2:3-5.

2. Kuzê ki ta ben kontise ku relijion?

Relijion ki ta fla ma es ta ama Deus má ki na verdadi es ta ama mundu di Satanás, ka ta ngana Deus. (Tiago 4:4) Palavra di Deus ta txoma tudu relijion falsu di ‘Babilónia kel Grandi’. Relijion falsu kumesa dipôs di Dilúviu na ténpu di Nué, na un sidadi antigu ki txomaba Babilónia. Ka ta dura, Deus ta ben kaba di repenti ku tudu relijion ki sta ngana i fronta algen. — Lé Revelação (Apocalipse) 17:1, 2, 5, 16, 17; 18:8.

Notísias sábi é ka sô kes-li. Jeová ka ta skese di kes algen ki sta spadjadu na kes relijion falsu na mundu interu, má ki di korason, krê pa el fika kontenti. El sta ta inxina-s verdadi i el sta ta djuda-s sai di relijion falsu. — Lé Miquéias 4:2, 5.

 3. Kuzê ki kes algen ki krê poi Deus fika kontenti meste faze?

Relijion verdaderu sta ta uni algen

Jeová ta preokupa ku kes algen ki krê sabe verdadi i faze kel ki é dretu. El ta aviza-s pa es larga relijion falsu. Kes algen ki ta ama Deus krê dexa tudu kuza mariadu pa tras pa pô-l fika kontenti. — Lé Revelação (Apocalipse) 18:4.

Dipôs di mórti di Jizus, kes algen ki kreba pa Deus fikaba kontenti, kantu es obi notísias sábi di Deus ki apóstlus fla-s, es seta ku alegria. Jeová inxina-s otu manera di vive, más filís, ku obijetivu i speransa. Es é bon izénplu pa nos, pamodi es seta mensaji di Deus, i es pô-l na primeru lugar na ses vida. — Lé 1 Tessalonicenses 1:8, 9; 2:13.

Jeová ta resebe na se família di adoradoris kes algen ki larga relijion falsu. Si bu seta konviti ki Jeová ta faze-u ku amor, bu ta ganha se amizadi i un novu família xeiu di amor. Kenha ki ta faze párti di es novu família? Kes algen ki ta adora Jeová. Tanbê bu ta ben ganha vida itérnu. — Lé Lúkas 18:29, 30, BPK; 2 Coríntios 6:17, 18.

4. Pamodi ki fin di relijion falsu é un notísia sábi?

Óras ki Deus kaba ku relijion falsu, el ta ben tra mundu interu di frónta. Nunka más relijion falsu ka ta ngana nen dividi mundu. Tudu algen ta ben sta unidu pa adora sô Deus verdaderu. — Lé Revelação (Apocalipse) 18:20, 21; 21:3, 4.