Bai pa asuntu

Bai pa sugundu menu

Bai pa lista di asuntu

Tistimunhas di Jeová

Kabuverdianu

Notísias sábi di Deus pa bo!

 LISON 2

Ken ki é Deus?

Ken ki é Deus?

1. Pamodi ki nu debe adora Deus?

Deus verdaderu é Kriador di tudu kuza. El ka ten komésu i nunka el ka ta ten fin. (Salmo 90:2) El é Fonti di notísias sábi ki nu ta atxa na Bíblia. (1 Timóteo 1:11) É sô Deus ki nu debe adora pamodi é el ki da-nu vida. — Lé Revelação (Apocalipse) 4:11.

2. Kuzê ki Bíblia ta fla-nu di Deus?

Nunka ningen ka odja Deus pamodi el é un Spritu. Kel-li krê fla ma el é un fórma di vida mutu más grandi ki tudu kriatura ki ta vive na Téra. (João 1:18; 4:24) Má, nu pode konxe manera di ser di Deus pa kuzas ki el faze. Pur izénplu, txeu tipu di fruta i di flor ta mostra se amor ku se sabedoria. Tamanhu di Séu ku Téra ta mostra puder di Deus. — Lé Romanos 1:20.

Nu pode prende más di manera di ser di Deus óras ki nu ta lé Bíblia. Pur izénplu, Bíblia ta fla-nu kuzê ki Deus gosta ku kuzê ki el ka gosta, modi ki el ta trata pesoas i modi ki el ta xinti óras ki nu faze kuzas dretu ô mariadu. — Lé Salmo 103:7-10.

3. Kal ki é nómi di Deus?

Jizus fla: ‘Nos Pai na séu, ki bu nómi ser santifikadu.’ (Mateus 6:9) Deus ten txeu titlu, sima Tudu-Poderozu i Kriador, má el ten sô un nómi. Na kada língua, se nómi ta fladu di manera diferenti. Na kabuverdianu nu ta fla ‘Jeová’. Nu ta atxa-l na alguns Bíblia na purtugês skrebedu ‘Jeová’ ô ‘Javé’. — Lé Salmo 83:18.

Nómi di Deus tradu di monti Bíblia i trokadu pa titlus Sinhor ô Deus. Má, kantu Bíblia skrebedu, es nómi ta staba  na el uns 7 mil bês. Kantu Jizus inxina pesoas sobri Deus, el faze-s konxe nómi di Deus. — Lé João 17:26.

4. Jeová ta preokupa ku nos?

Sima es pai xeiu di amor, kel ki Deus sta ta faze é midjór pa nos gósi i pa tudu ténpu

Tudu sufrimentu ki ten na mundu é razon pa nu fla ma Jeová é un Deus ki ka ta preokupa ku nos? Alguns algen ta fla ma Deus ta faze-nu sufri pa sprimenta-nu, má é kasí. — Lé Tiago 1:13.

Deus da-nu tantu valor ki el ta dexa-nu skodje kel ki nu krê di livri vontadi. Nos tudu, nu gosta di ten liberdadi di skodje sirbi Deus. (Josué 24:15) Má txeu algen ta skodje faze kuzas mariadu pa otus, nton sufrimentu ta bira más txeu. Jeová ta fika tristi óras ki el ta odja es injustisa. — Lé Gênesis 6:5, 6.

Jeová é un Deus ki ta preokupa ku nos. El krê pa nu xinti sábi na vida. Ka ta dura, el ta ben kaba ku sufrimentu i ku kes algen ki ta poi otus ta sufri. Ti la, Deus ten un bon motivu pa dexa sufrimentu kontínua pa poku ténpu. Na Lison 8, nu ta ben sabe kal ki é es motivu. — Lé 2 Pedro 2:9; 3:7, 13.

5. Modi ki nu pode bira más amigu di Deus?

Pa nu bira más amigu di Jeová, el ta konvida-nu pa nu pâpia ku el na orason. El ta preokupa ku kada un di nos. (Salmo 65:2; 145:18) Mésmu óras ki nu faze kuzas mariadu, Deus sta prontu pa purdua-nu i el ta odja sforsu ki nu ta faze pa pô-l fika kontenti. Nos é pekador, má simé nu pode ten un amizadi fórti ku Deus. — Lé Salmo 103:12-14; Tiago 4:8.

Nu debe ama Jeová más ki kalker otu algen pamodi é el ki da-nu vida. (Marcos 12:30) Sima bu ta ba ta mostra amor pa Deus, ta prende más di el i ta faze kuzê ki el ta pidi, poku-poku bu ta bira más se amigu. — Lé 1 Timóteo 2:4; 1 João 5:3.