Bai pa asuntu

Kuzê ki siginifika 666?

Kuzê ki siginifika 666?

Respósta di Bíblia

Di akordu ku últimu livru di Bíblia, 666 é nunbru ô nómi di kel féra di 7 kabésa i 10 txifri ki ta sai di mar. (Apocalipse 13:​1, 17, 18) Kel féra li ta reprizenta sistéma pulítiku di mundu interu ki ta manda na ‘tudu tribus, povus, línguas i nasons.’ (Apocalipse 13:7) Nómi 666 ta mostra ma pa Deus sistéma pulítiku di mundu ta fadja txeu. Modi?

Más di ki un nunbru. Tudu kes nómi ki Deus ta da ten un siginifikadu. Pur izénplu, Deus troka Abron nómi pa Abraon. Abron siginifika “Pai é grandi”. Abraon siginifika “Pai di un monti algen” pamodi Deus promete-l ma el ta ben biraba ‘pai di txeu nason’. (Génesis 17:5, nótas di rodapé.) Di mésmu manera, Deus da kel féra nómi 666 pa reprizenta se kualidadis mariadu.

Nunbru 6 ta reprizenta inperfeson. Na Bíblia, txeu bês ta uzadu nunbru pa reprizenta algun kuza. Normalmenti, nunbru 7 ta reprizenta un kuza interu ô perfetu. Nunbru 6, ki é 7 ménus un, pa Deus ta reprizenta un kuza ki é ka konplétu nen perfetu. Tanbê el ta uzadu pa pâpia di inimigus di Deus. — 1 Crónicas 20:6; Daniel 3:1.

Ta ripiti três bês pa distaka. Alvês Bíblia ta ripiti un kuza três bês pa distaka un asuntu. (Apocalipse 4:8; 8:​13) Nton, kel nómi 666 ta distaka ku forsa ma Deus ta atxa ma sistéma pulítiku di mundu ta fadja txeu. Es ka ta konsigi traze pas nen suguransa pa tudu ténpu. É sô Reinu di Deus ki ta pode traze kes kuza li.

Marka di féra

Bíblia ta fla ma pesoas ta resebe ‘marka di féra’ pamodi es ta sigi-l ‘ku dimirason’ i ti es ta adora-l. (Apocalipse 13:​3, 4; 16:2) Es ta faze kel-li óras ki es ta da ónra pa ses país, pa sinblus di ses país ô pa puder di trópa. Sima un ensiklopédia * ta fla: “Nasionalismu dja bira un manera prinsipal di relijion manda na mundu di gósi.”

Modi ki marka di féra ta podu na mô direita ô na tésta di un algen? (Apocalipse 13:16) Deus fla nason di Israel sobri se leis: ‘Nhos debe grava kes nhas palavra li na nhos korason i na nhos alma i nhos debe mara-s na nhos na mô pa ta lenbra nhos, i es debe ser sima un faxa na nhos tésta.’ (Deuteronómio 11:18) Kel-li ka krê flaba ma israelitas tinha ki marka ses mô ô ses tésta. Má, el krê flaba ma palavras di Deus debe giaba tudu kes kuza ki es ta fazeba i ki es ta pensaba. Di mésmu manera, marka di féra é ka un tatuaji di verdadi ki ta fazedu. El ta reprizenta tudu kes ki ta dexa sistéma pulítiku manda na ses vida. Kes ki ten marka di féra ta poi ses kabésa kóntra Deus. — Apocalipse 14:​9, 10; 19:19-​21.

^ par. 8 The Encyclopedia of Religion. Odja tanbê livru Nationalism in a Global Era, pájina 134, i Nationalism and the Mind: Essays on Modern Culture, pájina 94.