Respósta di Bíblia

 Palavra “antikristu” ta ben di un palavra gregu ki krê fla “kóntra (ô na lugar di) Kristu”. Antikristu é ka sô un algen ô un organizason, pamodi Bíblia ta fla ma ten “txeu antikristu.” (1 Juan 2:18) Pur isu, “antikristu” é kalker algen ki:

•   Ka ta seta ma Jizus é Kristu (Misías) ô ma el é Fidju di Deus. — 1 Juan 2:22.

•   É kóntra Kristu, ki é kel ki Deus skodje. — Salmu 2:1, 2; Lukas 11:23.

•   Ta finji ma el é Kristu. — Mateus 24:24.

•   Ta pirsigi kes disiplu di Kristu. Pamodi sima Jizus fla, ken ki ta pirsigi ses disiplu sta ta pirsigi ael. — Atus 9:5.

•   Ta fla ma el é kriston, má el ta faze kuzas mariadu i el ta ingana otus algen. — Mateus 7:22, 23; 2 Koríntius 11:13.

 Alén di pâpia di kes algen ki ta faze kes kuza li, i ki pur isu es é antikristu, Bíblia tanbê ta pâpia di es sima un grupu óras ki el ta txoma-s di “antikristu”. (2 Juan 7) Kel antikristu li parse na ténpu di apóstlus i ti inda el ta izisti. Bíblia dja flaba ma kel-li ta kontiseba. — 1 Juan 4:3.

Modi ki nu ta sabe kenha ki é antikristu

•   Es ta spadja mintira sobri Jizus. (Mateus 24:9, 11) Pur izénplu, es ta inxina ma Jizus ta faze párti di Trinidadi ô ma el é Deus Tudu-Poderozu. Má na verdadi kes ensinu li ta ba kóntra kel ki Jizus inxina kantu el fla: “Pai é más grandi ki mi.” — Juan 14:28.

•   Kes antikristu ka ta seta kuzê ki Jizus fla sobri modi ki Reinu di Deus ta governa. Pur izénplu, alguns xéfi di relijion ta fla ma Kristu ta governa através di govérnus di ómi. Má kel-li ta ba kóntra kel ki Jizus inxina kantu el fla: “Nha Reinu ka ta faze párti di es mundu.” — Juan 18:36.

•   Es ta fla ma Jizus é ses Sinhor, má es ka ta obi ku ses mandamentu, sima kel di prega kes notísia sábi di Reinu. — Mateus 28:19, 20; Lukas 6:46; Atus 10:42.