Bai pa asuntu

Bai pa sugundu menu

Tistimunhas di Jeová

Kabuverdianu

PERGUNTAS KI JÓVENS TA FAZE

N sta priparadu pa N namora?

N sta priparadu pa N namora?

 Kuzê ki é namoru?

  • Un rapás ku un minina ta sai sénpri ku kunpanheru. Es sta ta namora?

  • Un rapás ku un minina sta ta gosta di kunpanheru. Na un dia, es ta manda kunpanheru mensájen i es ta pâpia na tilifóni txeu bês. Es sta ta namora?

  • Sénpri ki bu sta djuntu ku bus amigu, bu ta fika sô djuntu di kel mésmu algen. Nhos sta ta namora?

Pode ser ki bu ka tevi prubléma na responde kel primeru pergunta, má talvês na kes otu bu para pa pensa antis di bu responde. Nton, kuzê ki é namoru?

Si bu sta pasa ténpu ku un algen ki nhos sta gosta di kunpanheru i nhos sta ta da kunpanheru txeu atenson, nu pode fla ma kel-li é namoru.

Nton respósta pa tudu kes três pergunta é sin. Namora é óras ki bo ku un algen ki sta ta gosta di kunpanheru, nhos ta pâpia sénpri pa tilifóni, pa internet ô kara-kara, sikrê na klaru ô sukundidu.

 Kal ki é obijetivu di namoru?

É un manera di djuda un ómi ku un mudjer disidi si es krê kaza ku kunpanheru.

É verdadi ki alguns di bus amigu ka ta leba namoru asériu. Pode ser ki es gosta di sta djuntu ku un algen spesial, má sen intenson di kaza. Alguns ta odja kel algen sima un tasa ô troféu ki es ganha, ki es krê pa tudu algen odja-s ku el, sô pa es pode xinti inportanti.

Kuazi sénpri kes tipu di namoru li ka ta dura txeu. Un minina ki txoma Heather fla: ‘Txeu jóven ta tirmina namoru na un ô dôs simana. Pa es, namoru é sima un pasa ténpu. Kel-li ta pripara-s más pa divórsiu di ki pa kazamentu.’

É klaru ki óras ki bu ta namora ku un algen, bu ta mexe ku se sentimentus. Pur isu, sforsa pa bu ten bons intenson. — Lucas 6:31.

Si bu namora sen intenson di kaza, bu sta ta faze sima un mininu ki ta brinka ku un brinkedu novu, má dipôs el ta bota-l

Pensa na kel-li: Bu ta gostaba pa un algen brinkaba ku bus sentimentu sima un brinkedu ki un mininu ta brinka ku el i dipôs el ta bota-l? Nton ka bu faze kel-la ku ningen! Bíblia ta fla ma amor ‘ka ta konporta mariadu’. — 1 Coríntios 13:4, 5.

Un minina ki txoma Chelsea fla: ‘Alvês N ta kreba pa namoru sérba sô un pa pasa ténpu, má é ka sábi óras ki é sô un algen ki ta leba namoru asériu.’

Un ideia: Pa bu pode pripara pa namoru i dipôs pa kazamentu lé 2 Pedro 1:5-7 i skodje un kualidadi ki bu meste midjora. Dipôs di un mês, djobe kuzê ki dja bu prende sobri kel kualidadi i si bu midjora na mostra kel kualidadi.

 Dja N ten idadi pa namora?

  •  Na bu opinion, kal ki é midjór idadi pa kumesa ta namora?

  •  Dipôs, faze kel mésmu pergunta li pa bu pai ô bu mai.

Normalmenti nhos respósta ta ser diferenti. Má, nhos respósta pode ser igual si bo é un di kes jóven ki ten juís, ki ta spéra ti ki ten idadi pa konxe ses kabésa midjór i sô dipôs es ta namora.

É si ki Danielle, di 17 anu, disidi faze. El fla: ‘Kuza ki dôs anu antis N ta djobeba na un algen pa sérba nha maridu é diferenti di kel ki N ta djobe gósi. N pode fla ma ti gósi N ka ta kúnfia na nha kabésa pa toma kel disizon li. Óras ki N xinti ma dja N konxe nha kabésa dretu, N ta disidi si N ta namora.

Ten un otu motivu pa spéra. Bíblia ta pâpia di ‘flor di juventudi’ pa mostra ma kel-la é un ténpu di vida ki un algen ta xinti txeu vontadi di faze séksu i ki é faxi kumesa ta gosta di un algen. (1 Coríntios 7:36) Timenti bu sta na kel fazi li, si bu fika sénpri djuntu ku un minina ô ku un rapás, bus dizeju pode omenta i pô-u ta faze kuza mariadu.

Pa bus koléga, kel-la pode parse un kuza normal. Txeu di es pode sta ku gana di faze séksu. Má bu ka meste, nen bu ka debe pensa sima es. (Romanos 12:2) Bíblia ta konsedja-u pa bu ‘fuji di konportamentu seksual mariadu’. (1 Coríntios 6:18, Bíblia na Linguagem de hoje) Si bu spéra ti ki flor di juventudi pasa, bu pode ‘libra di prublémas’. — Eclesiastes 11:10.

 Pamodi ki bale péna spéra?

Kumesa ta namora antis di sta priparadu é sima ki es obriga-u faze un izámi di un kursu, ki bu kumesa ki ka dura. É klaru ki kel-la é ka dretu. Bu meste ténpu pa studa matéria i ten un ideia di perguntas ki bu ta ba atxa na próva.

Mésmu kuza ta kontise ku namoru.

Namoru é un kuza sériu. Pur isu, antis di bu kumesa ta namora, tra ténpu pa bu studa un ‘matéria’ inportanti: modi ki bu pode faze bons amizadi.

Dipôs, óras ki bu atxa kel algen sértu, bu ta sta priparadu pa kumesa un namoru sériu. Dja ki un bon kazamentu é union di dôs bons amigu.

Bu ka ta perde nada si bu spéra pa namora. Má el ta da-u más liberdadi pa bu’ ten alegria na bu juventudi’. (Eclesiastes 11:9) Tanbê, bu ta ten más ténpu di midjora bu manera di ser, i más inportanti inda, ten un bon amizadi ku Jeová. — Lamentações 3:27.

Bu pode ten amigus ku amigas. Má kal ki é midjór manera di faze amizadi? É óras ki bu ta sta djuntu ku algen di mésmu idadi i ku algen más grandi ki nhos. Un minina ki txoma Tammy fla: ‘N ta atxa ma nu ta divirti más, óras ki nu sta djuntu ku txeu amigu.’ Tanbê, un minina ki txoma Mónica fla: ‘Sta djuntu ku amigus ta pâsia é rei di sábi pamodi bu ta konxe ses manera di ser.’

Tanbê, si bu kumesa ta namora sédu, nhos ta kaba pa sufri. Pur isu, ten paxénxa. Uza bu juventudi pa prende faze i mante bons amizadi. Asi, óras ki bu disidi namora, bu ta konxe bu kabésa midjór i bu ta sabe kuzê ki bu krê atxa na kel algen ki bu ta ba pasa réstu di bu vida ku el.