Bai pa asuntu

AJUDA PA FAMÍLIA

Modi ki bu pode kontrola raiba

Modi ki bu pode kontrola raiba

Alvês bu maridu ô mudjer pode fla ô faze kuzas ki ta da-u raiba. Envês di bu mostra-l ma bu fika xatiadu, bu ta disidi guarda raiba. Má dipôs, bu maridu ô mudjer ta repara ma algun kuza sta ta inkomoda-u i el ta tenta sabe kuzê ki sta ta pasa. Kel-li pode dexa-u inda más xatiadu ku el. Na kes situason li, modi ki bu pode kontrola raiba?

 Kuzê ki bu meste sabe

  • Dexa raiba toma kónta di bo pode prujudika bu saúdi. Piskizas ta mostra ma kes algen ki ka sabe kontrola raiba ten más xansi di ten tenson altu, duénsas di korason, depreson i prublémas na stômagu. Tanbê, el pode traze falta di sónu, poi algen ta xinti txeu preokupadu, ten duénsas di péli i panha trónbozi. Pur isu, Bíblia ta fla: ‘Ka bu xâtia i ka bu volta pa faze mal.’ — Salmo 37:8.

  • Guarda raiba pode prujudika-u tanbê. Si bu fika ta guarda raiba, é sima si bu sta ta dexa un duénsa spadja déntu di bo. Pur izénplu, bu pode bira un algen finjidu ô ki ta kritika otus algen txeu. Si kel-li kontise, ta fika difísil pa otus algen lida ku bo. Inda más, kes atitudi li pode prujudika txeu bu kazamentu.

 Kuzê ki bu pode faze

  • Konsentra na kes bon kualidadi di bu maridu ô bu mudjer. Skrebe três kuza ki bu gosta na bu maridu ô bu mudjer. Di prósimu bês ki bu fika xatiadu ku algun kuza ki el faze, pensa na kes kualidadi ki bu tene skrebedu. Kel-li pode djuda-u kontrola raiba.

    Prinsípiu di Bíblia: Nhos mostra ma nhos é gratu.’ — Colossenses 3:15.

  •  Prende púrdua. Primeru, tenta odja kuzas sima bu maridu ô mudjer ta odja. Kel-li ta djuda-u ser un algen ki ta ‘poi na lugar di otus’. (1 Pedro 3:8) Dipôs pergunta bu kabésa: ‘Kuza ki nha maridu ô mudjer faze é txeu gravi ki ka ta da pa N purdua-l?’

    Prinsípiu di Bíblia: É un kuza bunitu dexa un ofénsa pasa.’ — Provérbios 19:11.

  •  Pâpia di kel ki bu ta xinti ku kalma i ruspetu. Envês di bu fla: “Bu ka ta mostra konsiderason pa mi óras ki bu ka ta txoma-m pa fla-m undi bu sta.” Fla si: “N ta fika preokupadu óras ki dja sta noti i bu ka txiga kaza i N ka sabe si bu sta dretu.” Si bu pâpia di kel ki bu ta xinti ku kalma, ta djuda-u kontrola raiba.

    Prinsípiu di Bíblia: Ki nhos palavras ser sénpri sábi, tenpradu ku sal’. — Colossenses 4:6.

  •  Obi ku ruspetu. Dipôs di pâpia di kel ki bu ta xinti, obi bu maridu ô mudjer sen korta-l konbérsu. Óras ki el kaba di pâpia, ripiti kel ki el fla pa bu pode odja si bu ntende dretu. Óras ki bu ta obi tudu kel ki bu maridu ô mudjer ta fla, ta djuda-u txeu na kontrola raiba.

    Prinsípiu di Bíblia: Tudu algen debe sta prontu pa obi, má nhos ka debe pâpia faxi’. — Tiago 1:19.