Bai pa asuntu

Bai pa sugundu menu

Tistimunhas di Jeová

Kabuverdianu

Kuzê ki N debe faze si algen krê pa N faze séksu ku el?

Kuzê ki N debe faze si algen krê pa N faze séksu ku el?

Talvês bu ta pergunta: ‘Kuzê ki ten, si N faze séksu ku el? Tudu algen ta faze séksu.’

Para i bu pensa!

Verdadi: É ka tudu algen ki ta faze séksu.

Alguns piskiza ki fazedu, pode pô-nu ta pensa ma tudu algen ta faze séksu. Pur izénplu, na un piskiza ki fazedu na Mérka ku jóvens ki finda skóla, ta mostra ma entri três jóven na kel país, dôs ta fazeba séksu. Má, kel-li tanbê ta mostra ma entri kada três jóven ten un ki ka ta faze séksu. Nton, inda ten txeu jóven ki ka ta faze séksu.

Má, i kes ki ta faze séksu? Piskizas ta mostra ma txeu di kes jóven ta pasa pa txeu tipu di prublémas, sima kes-li:

Disgostu. Txeu jóven ki faze séksu antis di kazamentu, ta fla ma lógu dipôs es rapende.

Faze séksu antis di kazamentu é sima panha un kuadru bunitu i uza-l pa linpa pé

Diskunfiansa. Dipôs di faze séksu, é normal un algen pergunta: ‘Ku kenha más ki dja el faze séksu?’

Diziluzon. Na fundu-na-fundu, un monti minina ta prifiri algen ki ta proteje-s, envês di pruveta di es. I monti rapás ta xinti ma es ta perde interesi na kes minina ki ta dexa-s faze séksu ku es.

Kuzê ki bu pode prende: Bu korpu ten txeu valor pa bu ntrega-l di bandeja! Mostra ma bu ta konsigi obi ku lei di Deus di ka faze séksu antis di kazamentu. Nton, si bu kaza un dia, bu pode faze séksu sen pasa pa kes prubléma ki kes algen ki ta faze séksu antis di kazamentu ta xinti, sima disgostu, diskunfiansa i diziluzon. — Provérbios 7:22, 23; 1 Coríntios 7:3.