Bai pa asuntu

Bai pa lista di asuntus

 STUDU 40

Mante okupadu duránti fin di ‘ténpu di fin’

Mante okupadu duránti fin di ‘ténpu di fin’

‘Nhos mante firmi, ka nhos muda. Nhos ten sénpri txeu pa faze na óbra di Sinhor.’ — 1 CORÍNTIOS 15:58.

KÁNTIKU 58 Nu djobe kes amigu di pas

KUZÊ KI NU STA BEN STUDA *

1. Pamodi ki nu ten sertéza ma nu sta ta vive ‘na ténpu di fin’?

BU NASE dipôs di 1914? Si bu respósta é sin, nton sénpri bu vive duránti ‘ténpu di fin’ di es sistéma. (2 Tim. 3:1) Jizus dja flaba ma txeu kuza ta ben kontiseba na es ténpu, sima géra, falta di kumida, tremor di téra, duénsas ki ta spadja, kuzas ki é kóntra lei ta bira más txeu i sérvus di Jeová ta pirsigidu. (Mat. 24:3, 7-9, 12; Luc. 21:10-12) Tanbê, nu sta ta odja pesoas ta konporta sima apóstlu Polu dja flaba. (Odja kuadru “ Modi ki pesoas sta gósi”.) Anos ki ta adora Jeová, nu ten sertéza ma nu sta ta vive ‘na ténpu di fin’. — Miq. 4:1.

2. Ki perguntas nu meste sabe respósta?

2 Dja pasa txeu ténpu désdi 1914. Nton, gósi nu sta ta vive na fin di ‘ténpu di fin’. Dja ki nu sta pértu di fin, nu meste sabe respóstas di alguns pergunta inportanti: Ki kuzas sta ben kontise na fin di ‘ténpu di fin’? Kuzê ki Jeová krê pa nu faze timenti nu sta ta spéra kes kuza kontise?

KUZÊ KI TA BEN KONTISE NA FIN DI ‘TÉNPU DI FIN’?

3. Di akordu ku kel profesia ki sta na 1 Tessalonicenses 5:1-3, ki avizu nasons ta ben faze?

3 1 Tessalonicenses 5:1-3. Li Polu pâpia sobri ‘dia di Jeová’. Na kes versíklu li, ‘dia di Jeová’ krê fla kel ténpu  ki ta kumesa ataki kóntra ‘Babilónia, kel Grandi’, ki é tudu kes relijion falsu, i el ta tirmina ku Armajedon. (Apo. 16:14, 16; 17:5) Antis di kel ‘dia’ kumesa, nasons ta ben fla ma dja ten ‘pas i suguransa!’ Govérnus di mundu alvês ta uza palavras kuazi sima kel-li, óras ki es ta konsigi midjora relason entri nasons. * Má, kel avizu di ‘pas i suguransa’, ki Bíblia ta pâpia di el, ta ben ser diferenti. Pamodi? Óras ki kel-li kontise, pesoas ta ben pensa ma govérnus di mundu konsigi bira Téra na un lugar más suguru. Má, na verdadi, ta ben kumesa kel ‘grandi tribulason’ i dipôs ‘distruison ta ben riba di es dirapenti’. — Mat. 24:21.

Ka bu ser nganadu óras ki nasons aviza ‘pas i suguransa’ (Odja parágrafus 3 ti 6.) *

4. (a) Kuzê ki inda nu ka sabe sobri kel avizu di ‘pas i suguransa’? (b) Kuzê ki dja nu sabe sobri kel avizu li?

4 Nu sabe alguns kuza sobri kel avizu di ‘pas i suguransa’. Má ten otus kuza ki inda nu ka sabe. Pur izénplu, nu ka sabe kuzê ki ta poi nasons ta faze kel avizu i nen modi ki el ta fazedu. I nu ka sabe si ta ben ser sô un avizu, ô un monti di avizu. Ka ta nporta kuzê ki kontise, nu sabe kel-li: ‘Nu ka debe kridita i atxa ma govérnus di mundu ta ben konsigi poi pas na mundu interu’. Má, é kel avizu li ki Bíblia fla-nu pa nu spéra. El ta ben ser kel sinal ki ta mostra ma ‘dia di Jeová’ sta kuazi ta kumesa!

5. Di akordu ku 1 Tessalonicenses 5:4-6, kuzê ki nu debe faze pa nu sta priparadu pa ‘dia di Jeová’?

5 1 Tessalonicenses 5:4-6. Kel avizu di Polu ta fla-nu kuzê ki nu debe faze pa nu sta priparadu pa ‘dia di Jeová’. Nu ka pode ‘durmi sima otus algen ta faze’. Nu debe ‘fika kordadu’ i mante sienti. Pur izénplu, nu meste toma kuidadu pa nu ka mete na asuntus di pulítika. Si nu mete na pulítika, nu pode fika ta faze ‘párti di mundu’. (João 15:19 ) Nu sabe ma é sô Reinu di Deus ki pode traze pas na mundu interu.

6. Kuzê ki nu krê djuda otus algen faze, i pamodi?

6 Alén di nu fika kordadu, nu krê tanbê djuda otus algen prende sobri kuzê ki Bíblia ta fla ma ta ben kontise na mundu. Nu debe faze kel-li gósi, pamodi óras ki grandi tribulason kumesa ta ser tardi dimás pa pesoas kumesa ta sirbi Jeová. É pur isu ki nos trabadju di pregason é urjenti! *

MANTE OKUPADU NA PREGASON

Timenti nu sta ta prega gósi, nu ta mostra ma é sô Reinu di Deus ki pode traze suguransa pa Téra (Odja parágrafus 7 ti 9.)

7. Kuzê ki Jeová ta spéra pa nu faze oji?

7 Na es poku ténpu ki sta falta pa  ‘dia’ di Jeová txiga, el ta spéra pa nu kontinua okupadu na trabadju di pregason. Nu meste ten sertéza ma nu ‘ten sénpri txeu pa faze na óbra di Sinhor’. (1 Cor. 15:58) Jizus fla kuzê ki nu tinha ki fazeba. Kantu el pâpia di tudu kes kuza inportanti ki staba ta ben kontise, el fla: ‘Tanbê, notísias sábi ten ki ser pregadu primeru na tudu nasons.’ (Mar. 13:4, 8, 10; Mat. 24:14) Pensa na kel-li: Tudu bês ki bu sai na pregason, bu sta ta djuda pa kel profesia di Bíblia li kunpri!

8. Modi ki nu sabe ma trabadju di pregason sta kontinua ta omenta?

8 Kuzê ki nu pode fla sobri omentu di trabadju di pregason? Tudu anu, más algen sta ta obi notísias sábi di Reinu. Pur izénplu, pensa modi ki publikadoris sta ta omenta na mundu interu na es ténpu di fin. Na anu di 1914, tinha 5.155 publikador na 43 país. Oji, ten uns 8,5 milhon di publikador na 240 país! Má, nos trabadju inda ka txiga fin. Nu ten ki kontinua ta pâpia ku pesoas sobri Reinu di Deus, ki é úniku soluson pa tudu prublémas di mundu. — Sal. 145:11-13.

9. Pamodi ki nu debe kontinua ta prega mensaji di Reinu?

9 Nos trabadju di pregason ta ben tirmina sô óras ki Jeová fla ma dja kaba. Kantu ténpu ki pesoas ten inda pa konxe Jeová Deus i Jizus Kristu? (João 17:3 ) Nu ka sabe. Kuzê ki nu sabe é ma ti óras ki grandi tribulason kumesa, tudu kes ki ten ‘kel bon inklinason pa vive pa tudu ténpu’ inda pode seta notísias sábi. (Atos 13:48 ) Modi ki nu pode djuda kes algen antis di ser tardi dimás?

10. Kuzê ki Jeová ta da-nu pa djuda-nu inxina pesoas verdadi?

10 Através di se organizason, Jeová ta da-nu tudu kel ki nu meste pa inxina pesoas verdadi. Pur izénplu, nu ta trenadu através di runion di meiu di simana. Kel runion li ta djuda-nu sabe kuzê ki nu ta fla na primeru vizita i na revizitas. Tanbê, el ta inxina-nu modi ki nu ta faze studus di Bíblia. Organizason di Jeová tanbê ta da-nu kes Feraménta prinsipal pa inxina. Es ta djuda-nu. . .

  •   kumesa un konbérsu,

  • kria interesi,

  • motiva pesoas pa prende más,

  • inxina verdadi através di studus di Bíblia i

  • konvida kes ki ten interesi pa vizita nos site i nos Salons di Reinu.

É klaru ki sô ten kes feraménta ka ta txiga. Nu meste uza-s. * Pur izénplu, si dipôs di un bon konbérsu ku un algen interesadu, bu dexa-l ku un folhetu ô un revista, el ta ten algun kuza pa lé antis di bu ba revizita-l otu bês. Kada un di nos ten responsabilidadi di mante okupadu tudu mês na prega notísias sábi.

11. Pamodi ki kriadu kel kursu di Bíblia na internet?

11 Otu ajuda ki Jeová sta ta da pa pesoas prende verdadi é Curso da Bíblia Online na jw.org®. Pamodi ki kriadu kel kursu li? Tudu mês, un monti di algen na mundu interu, ta djobe si es ta atxa lisons di Bíblia na internet. Kes lison na nos site pode djuda kes algen konxe verdadis di Palavra di Deus. Tanbê, bu pode pâpia ku un algen ki ka ta xinti avontádi pa seta un studu di Bíblia. Na kel situason li, mostra-l kel kursu na internet ô manda-l un link di kes lison. *

12. Kuzê ki un algen pode prende na kel kursu di Bíblia na internet?

12 Kel kursu di Bíblia na internet, ta pâpia sobri kes asuntu li: “A Bíblia e seu Autor ”, “Os principais personagens da Bíblia ” i “A mensagem da Bíblia sobre um futuro melhor ”. Déntu di kada asuntu, es ta inxina-nu:

  • Modi ki Bíblia pode djuda un algen

  • Ken ki é Jeová, Jizus i anjus

  • Pamodi ki Deus kria umanus

  • Pamodi ki ten txeu maldadi ku sufrimentu

Kes lison tanbê ta splika modi ki Jeová ta ben. . .

  • kaba ku sufrimentu i mórti,

  • poi mortus ta vive otu bês i

  • troka govérnus di ómi pa Reinu di Deus.

13. Kel kursu di Bíblia na internet ta toma lugar di un studu di Bíblia ki ta fazedu ku un Tistimunha di Jeová? Splika.

13 Kel kursu di Bíblia na internet, ka ta toma lugar di kel studu ki ta fazedu ku un Tistimunha di Jeová. Jizus da-nu priviléjiu di faze disiplus. Kes lison ta sirbi pa txoma atenson di kes algen ki ten interesi. Dipôs, si es gosta di kuzê ki es sta ta prende, talvês es ta xinti vontadi di sabe más i di seta un studu di Bíblia. Na fin di kada lison, ten un link undi ki kel algen ki sta ta lé, pode pidi pa un Tistimunha di Jeová studa Bíblia ku el. Através di nos site, tudu dia nu ta resebe más di 230 pididu pa studu di Bíblia, ki ta ben di mundu interu! Di sertéza, ten un studu di Bíblia pesoal ku un instrutor, é txeu inportanti!

KONTINUA TA SFORSA PA FAZE DISIPLUS

14. Di akordu ku palavras di Jizus ki sta na Mateus 28:19, 20, kuzê ki nu ten ki sforsa pa faze? I pamodi ki kel-li é inportanti?

14 Mateus 28:19, 20. Óras ki nu ta faze studus di Bíblia, nu ten ki faze nos midjór pa ‘faze disiplus i inxina-s obidese tudu kuza ki Jizus manda’. Nu meste djuda pesoas ntende modi ki é inportanti pa es skodje sirbi Jeová i apoia se Reinu. Kel-li krê fla ma pesoas ten  ki faze sima es prende, da ses vida pa Jeová i batiza. Sô asi ki es ta konsigi skapa na dia di Jeová. — 1 Ped. 3:21.

15. Ku kuzê ki nu ka pode perde ténpu, i pamodi?

15 Sima dja nu odja, falta mutu poku ténpu pa txiga fin di es sistéma. Pur isu, nu ka pode perde ténpu ta studa Bíblia ku kes algen ki ka krê muda ses vida pa sirbi Jeová. (1 Cor. 9:26) Nos trabadju é urjenti! Ten txeu algen ki inda meste obi mensaji di Reinu, antis di ser tardi dimás.

FIKA LONJI DI TUDU RELIJION FALSU

16. Di akordu ku Apocalipse 18:2, 4, 5, 8, kuzê ki tudu kristons verdaderu debe faze? (Odja tanbê nóta di rodapé.)

16 Apocalipse 18:2, 4, 5, 8. Kes versíklu li ta mostra más un kuza ki Jeová ta spéra di kes algen ki ta adora-l. Tudu kristons verdaderu debe dexa klaru ma es ka ta faze párti di Babilónia, kel Grandi. Antis di un studanti di Bíblia prende verdadi, pode ser ki el ta fazeba párti di un relijion falsu. Talvês, el ta baba la ô el ta partisipaba di kuzas ki es ta faze. Ô pode ser ki el ta daba dinheru pa se relijion. Má, si un studanti di Bíblia krê bira un publikador, el meste korta tudu ligason ku relijion falsu. El debe skrebe un karta pa kel antigu igreja ô mostra di algun otu manera ma el ka ta faze párti di el más. Tanbê el debe faze mésmu kuza ku kalker otu organizason ki sta ligadu ku Babilónia, kel Grandi. *

17. Ki tipu di trabadju un kriston debe ivita, i pamodi?

17 Un kriston verdaderu debe djobe si se trabadju ka ta faze nada ki sta ligadu ku Babilónia, kel Grandi. (2 Cor. 6:14-17) Pur izénplu, el ka ta trabadjaba pa un igreja. Tanbê, un kriston ki ta trabadja na un enpréza, ka ta setaba faze un trabadju na un lugar ki ta uzadu pa relijion falsu. I si un kriston ten se própi nogósiu, el ka ta djobeba trabadju na lugaris ki sta ligadu ku Babilónia, kel Grandi, nen el ka ta setaba ses oférta di trabadju. Pamodi ki nu ten ki toma un disizon firmi? Pamodi pa Deus, kes organizason é inpuru. Nu ka krê faze párti di ses óbra i di ses pekadu. — Isa. 52:11. *

18. Modi ki un irmon sigi prinsípius di Bíblia na se trabadju?

 18 Ten un ansion ki tinha se própi nogósiu. Dja ten uns anu, ki un ómi kria kontrataba el pa faze un trabadju di karpintaria na un igreja di se sidadi. Kel ómi dja sabia ma kel ansion ka ta setaba trabadjus na igrejas. Má, el staba frontadu pa atxa un algen pa faze kel trabadju. Má simé, kel ansion disidi sigi prinsípius di Bíblia i el ka seta kel trabadju. Na kel otu simana, jornal di kel zóna poi fotu di un otu karpinteru ta prega un krus na kel igreja. Si nos irmon setaba kel trabadju, talvês éra se fotu ki ta saíba na kel jornal. Imajina modi ki kel-la ta sujaba se nómi dianti di se irmons kriston! Tanbê imajina modi ki Jeová ta xintiba.

KUZÊ KI NU PRENDE?

19-20. (a) Kuzê ki dja nu prende ti gósi? (b) Kuzê más ki nu meste prende?

19 Di akordu ku profesia di Bíblia, kel otu kuza ki ta ben kontise na mundu é kel avizu di ‘pas i suguransa’. Má Jeová dja mostra-nu ma nasons ka ta konsigi traze pas na mundu pa tudu ténpu. Kuzê ki nu debe faze antis di kel avizu di ‘pas i suguransa’ i di distruison ki ta ben kontise dirapenti? Jeová ta spéra ma nu ta mante okupadu na prega mensaji di Reinu i na faze disiplus. Má tanbê, nu meste mante siparadu di tudu relijion falsu. Pa kel-li, nu ten ki dexa di faze párti di Babilónia, kel Grandi i ka faze kalker trabadju ki sta ligadu ku el.

20 Ten otus kuza ki sta ben kontise duránti ‘ténpu di fin’. Tanbê, ten otus kuza ki Jeová krê pa nu faze. Kuzê ki é kes kuza? I modi ki nu pode pripara pa kuzê ki ta ben kontise na futuru? É kel-li ki nu sta ben odja na kel otu studu.

KÁNTIKU 71 Nos é trópas di Jeová!

^ par. 5 Ka ta dura nu ta ben obi nasons ta fla ma dja es konsigi ‘pas i suguransa’! Kel-la ta ben ser sinal ma grandi tribulason sta ba kumesa. Kuzê ki Jeová ta spéra pa nu faze gósi i dipôs? Kel studu li ta ben djuda-nu atxa respósta.

^ par. 3 Pur izénplu, site di Nasons Unidu ta fla ma ses obijetivu é “mante pas i suguransa na mundu interu”.

^ par. 6 Odja artigu “Julgamentus di Deus — Ta ben sen aviza?” na kel Sentinéla li.

^ par. 10 Pa más informason di modi ki nu ta uza kes Feraménta prinsipal pa inxina, odja artigu “Inxina verdadi” na Sentinéla di otubru di 2018.

^ par. 11 Gósi bu ta atxa kel kursu na purtugês i na inglês. Ka ta dura, el ta ben fazedu na más língua.

^ par. 16 Tanbê nu ka ta partisipa na kanpamentus ki jóvens ta faze ô nu ka ta partisipa di algun atividadi ki sta ligadu ku relijion falsu. Txeu di kes organizason li, ta tenta fla ma ses atividadi ka ten aver ku relijion, má na verdadi es é organizasons ki ta pâpia di ideias i obijetivus di relijions.

^ par. 17 Pa ntende midjór kuzê ki Bíblia ta fla sobri trabadjus ki ta nvolve organizason relijiozu, odja Perguntas dos Leitores, na Sentinéla di 15 di abril di 1999, na purtugês.

^ par. 83 SPLIKASON DI FOTU: Na un lanxoneti, sta ta dadu un notísia urjenti na tilivizon: “Nasons sta ta aviza pas i suguransa.” Kes algen ki sta la sta dimiradu. Má kel notísia ka ta ngana un kazal di Tistimunhas di Jeová ki sta la duránti un pauza na pregason.