Bai pa asuntu

Bai pa lista di asuntus

 STUDU 41

Kontinua lial duránti ‘grandi tribulason’

Kontinua lial duránti ‘grandi tribulason’

‘Nhos ama Jeová, tudu nhos ki é lial! Jeová ta proteje kes fiel’. — SALMO 31:23.

KÁNTIKU 129 Nu kontinua ta aguenta firmi

KUZÊ KI NU STA BEN STUDA *

1-2. (a) Ka ta dura, ki avizu govérnus di mundu ta ben faze? (b) Ki perguntas meste respósta?

IMAJINA ma govérnus di mundu kaba di faze kel avizu di ‘pas i suguransa’ ki dja ten txeu ténpu ta speradu. Talvês es ta fla ku orgulhu ma dja es konsigi poi pas na mundu interu. I es ta ba krê pa tudu algen pensa ma dja es rezolve prublémas na mundu. Má es ka ta pode kontrola kuzas ki ta ben kontise dipôs. Pamodi? Di akordu ku profesia di Bíblia, ‘distruison ta ben riba di es dirapenti, i di ninhun manera es ka ta skapa.’ — 1 Tes. 5:3.

2 Li sta alguns pergunta inportanti ki meste respósta: Kuzê ki ta ben kontise duránti ‘grandi tribulason’? Kuzê ki Jeová ta spéra di nos duránti kel ténpu? I modi ki nu pode pripara gósi pa nu kontinua fiel duránti grandi tribulason? — Mat. 24:21.

KUZÊ KI TA BEN KONTISE DURÁNTI ‘GRANDI TRIBULASON’?

3. Di akordu ku Apocalipse 17:5, 15-18, modi ki Deus ta ben distrui ‘Babilónia, kel Grandi’?

3 Apocalipse 17:5, 15-18. ‘Babilónia, kel Grandi’ ta ben ser distruídu! Sima dja fladu antis, govérnus di mundu ka ta pode kontrola kuzas ki ta ben kontise na  kel ténpu. Pamodi? Pamodi ‘Deus ta ben pô-s na korason kel dizeju di faze kel ki sta na se pensamentu’. Ki pensamentu? Di kaba ku tudu relijion falsu, i tanbê kes relijion ki ta fla ma es é kriston má ki ka ta inxina pesoas adorason ki ta agrada Jeová. Deus ta ben poi se pensamentu na korason di kes ‘10 txifri’ di ‘féra kor burmedju’. Kel ‘féra’ ta reprizenta Nasons Unidu, i kes 10 txifri ta reprizenta tudu kes govérnu ki ta apoia-l. (Apo. 17:3, 11-13; 18:8) Óras ki govérnus pulítiku bira kóntra relijion falsu, nton nu ta sabe ma grandi tribulason dja kumesa. Ta ba ser un ténpu difísil dimás ki ta afeta tudu algen na mundu.

4. (a) Kuzê ki ta ben poi govérnus ta ataka Babilónia, kel Grandi? (b) Kuzê ki kes algen ki éra ménbru di kes relijion ta ben faze?

4 Nu ka sabe kuzê ki ta ben poi govérnus ta ataka Babilónia, kel Grandi. Talvês es ta fla ma relijions sta ta inpidi pas na mundu i ma sénpri es sta mete na pulítika. Ô pode ser ki es ta fla ma relijions djunta un monti rikéza i propriadadis. (Apo. 18:3, 7) Ta parse ma ataki kóntra Babilónia, kel Grandi, ka krê fla ma tudu ménbrus di relijion falsu ta ben ser distruídu. Má talvês, kes govérnu di mundu ta ben kaba ku organizasons relijiozu. Óras ki tudu kes organizason distruídu, kes ki éra ses ménbru ta ben da kónta ma ses xéfi di relijion fadja ku es. Nton talvês es ta fla ma es ka ten nada aver ku kes relijion.

5. Kuzê ki Jeová promete sobri grandi tribulason, i pamodi?

5 Bíblia ka ta fla kantu ténpu ki ta ben dura distruison di Babilónia, kel Grandi. Má kuzê ki nu sabe é ma ta ben ser poku ténpu. (Apo. 18:10, 21) Jeová promete ma el ta bira kes dia di tribulason ‘más poku’, asi pa ‘kes skodjedu’ i relijion verdaderu salva. (Mar. 13:19, 20) Má kuzê ki Jeová ta spéra pa nu ben faze entri komésu di grandi tribulason i géra di Armajedon?

 KONTINUA TA APOIA ADORASON PURU

6. Pamodi ki sô sipara di relijion falsu ka ta txiga?

6 Sima nu odja na kel otu studu, Jeová ta spéra pa se adoradoris sipara di Babilónia, kel Grandi. Má, faze kel-li é mutu más di ki sipara di relijion falsu. Nu debe sta disididu na kontinua ta apoia relijion verdaderu ô adorason puru di Jeová. Nu ben odja dôs manera di faze kel-la.

Nunka nu ka debe para di sta djuntu na runion, sikrê na ténpus difísil (Odja parágrafu 7.) *

7. (a) Modi ki nu pode kontinua firmi ta apoia leis di Jeová sobri konportamentu? (b) Di akordu ku Hebreus 10:24, 25, pamodi ki é inportanti sta na runions inda más gósi?

7 Primeru, nu meste mante firmi di akordu ku leis di Jeová sobri konportamentu. Nu ka pode seta konportamentu mariadu di kel mundu li. Pur izénplu, nu ka ta seta ninhun tipu di konportamentu seksual mariadu, ki ta inklui kazamentu entri pesoas di mésmu séksu, i kalker otu tipu di konportamentu omoseksual. (Mat. 19:4, 5; Rom. 1:26, 27) Sugundu, nu debe kontinua ta adora Jeová djuntu ku nos irmons kriston. Nu ta faze kel-li sénpri ki nu pode, na Salon di Reinu ô si meste, na kaza di irmons ô ti mésmu na algun lugar sukundidu. Ka ta nporta kuzê ki kontise, nu ka pode para di adora Jeová djuntu ku nos irmon. Na verdadi, nu meste sta djuntu ‘inda más gósi ki nu sta ta odja kel dia ta txiga.’ — Hebreus 10:24, 25.

8. Modi ki nos mensaji talvês ta ben muda na futuru?

8 Duránti grandi tribulason, kel mensaji ki nu ta prega talvês ta ben muda. Gósi, nu sta prega notísias sábi di Reinu i nu ta sforsa pa faze disiplus. Má na grandi tribulason, mensaji ki nu ta prega pode fika más fórti, sima pédras di granizu pizadu. (Apo. 16:21) Nu pode ben prega ma, ka ta dura, mundu di Satanás ta ben ser distruídu. Óras ki txiga kel ténpu, nu ta sabe dretu kal ki ta ser kel mensaji i modi ki nu ta prega-l. Nu ta ben uza kes mésmu manera pa nu prega i inxina sima nu sta ta uza dja ten más di 100 anu? Ô nu ta ben uza otus manera di prega? Nu ten ki spéra pa nu odja. Di kalker manera, ta parse ma nu ta ten priviléjiu di aviza ku koraji mensaji di julgamentu di Jeová! — Eze. 2:3-5.

9. Modi ki nasons ta ben reaji ku nos mensaji, má di kuzê ki nu pode ten sertéza?

9 Talvês nos mensaji ta ben dexa nasons xatiadu i es ta ben tenta pô-nu ta para nos trabadju di pregason. Sima nu ta kunfia na Jeová gósi pa djuda-nu ku nos trabadju di pregason, nu meste kunfia na ajuda ki el ta ben da-nu. Nu pode ten sertéza ma na futuru Jeová ta da-nu puder pa nu faze se vontadi. — Miq. 3:8.

STA PRIPARADU PA ATAKI KÓNTRA POVU DI DEUS

10. Di akordu ku Lucas 21:25-28, modi ki txeu algen ta ben reaji duránti grandi tribulason?

10 Lucas 21:25-28. Duránti grandi tribulason pesoas ta ben fika spantadu óras ki es odja ma tudu kuza ki es ta pensaba ma ta duraba pa tudu ténpu, ta kumesa ta distruídu. Es ta fika ku ‘disgostu’, ku medu di perde ses vida duránti kel ténpu más sukuru di stória di ómi. (Sof. 1:14, 15) Na kel ténpu, talvês vida ta ben bira más difísil, ti mésmu pa povu di Jeová. Dja ki nu ka ta faze párti di mundu, nu pode pasa pa alguns  difikuldadi. Talvês nu pode fika sen alguns kuza ki más nu meste.

11. (a) Pamodi ki nasons ta ben konsentra na Tistimunhas di Jeová? (b) Pamodi ki nu ka meste xinti medu duránti grandi tribulason?

11 Ta ben txiga un ténpu, ki pesoas ki antis éra di algun relijion falsu ta da kónta ma relijion di Tistimunhas di Jeová ka distruídu. Pesoas pode ben fika xatiadu. Nu pode imajina konfuzon ki kel-li ta ben da, ti mésmu na internet. Nasons ku ses governanti, Satanás, ta ben odia-nu pamodi nu ta ser úniku relijion ki ta sta na Téra. Es ta odja ma es ka konsigi ses obijetivu di kaba ku tudu relijion na Téra. Nton, es ta ben konsentra na nos. É na kel momentu li ki nasons ta bira Gogi di Magogi. * Es ta ben djunta pa ataka povu di Jeová ku tudu ses puder. (Eze. 38:2, 14-16) Talvês nu pode fika preokupadu, inda más pamodi nu ka sabe tudu kes kuza ki ta ben kontise duránti grandi tribulason. Má nu pode ten sertéza di un kuza: Nu ka meste ten medu duránti grandi tribulason. Jeová ta ben da-nu orientason ki ta salva nos vida. (Sal. 34:19) Nu ta pode ‘fika sakédu i labanta kabésa’, pamodi nos ‘salvason sta kuazi ta txiga.’ *

12. Modi ki ‘skravu fiel i prudenti’ sta ta pripara-nu pa kuzas ki sta ben kontise na futuru?

12 Dja ten txeu ténpu ki ‘skravu fiel i prudenti’ sta ta pripara-nu pa nu kontinua fiel duránti grandi tribulason. (Mat. 24:45) El sta ta faze kel-li di txeu manera, má odja un izénplu di kes kongrésu di anus di 2016 ti 2018. Prugrama di kes kongrésu nkoraja-nu pa nu bira más fórti kes kualidadi ki nu meste pa nu skapa na dia di Jeová. Nu ben odja alguns di kes kualidadi.

KONTINUA TA BIRA MÁS FÓRTI BU LIALDADI, BU KAPASIDADI DI AGUENTA I BU KORAJI

Pripara gósi pa bu salva na ‘grandi tribulason’ (Odja parágrafus 13 ti 16.) *

13. Modi ki nu pode bira nos lialdadi pa Jeová más fórti, i pamodi ki nu meste faze kel-li gósi?

13 Lialdadi: Téma di kongrésu di 2016 éra “Kontínua ta ser lial pa Jeová!” Kel prugrama inxina-nu ma pa nu ser lial pa Jeová, nu ten ki ten un amizadi fórti ku el. Kes diskursu mostra ma nu pode bira nos amizadi ku Jeová más fórti, óras ki nu ta faze orason di korason i faze un bon studu di Bíblia. Faze kel-li ta da-nu forsa ki nu meste pa nu aguenta kes prubléma más difísil. Sima kel mundu li di Satanás sta ta txiga fin, nu pode spéra ma nu ta ben pasa pa prublémas mutu más difísil ki ta prova nos lialdadi pa Jeová i pa se Reinu. Talvês, pesoas ta kontinua ta faze-nu trósa. (2 Ped. 3:3, 4) Kel-li pode ben kontise pamodi nu ka ta apoia ninhun párti di mundu di Satanás. Nu meste kontinua ta bira nos lialdadi más fórti gósi, pa nu pode mante nos lialdadi duránti grandi tribulason.

14. (a) Ki mudansa ta ben kontise ku kes irmon ki ta toma kónta di povu di Jeová na Téra? (b) Pamodi ki nu meste ser lial na kel ténpu?

14 Duránti grandi tribulason, ta ben ten un mudansa na kes irmon ki ta toma kónta di povu di Jeová na Téra. Na algun momentu, kes skodjedu ku spritu  santu ki inda ta sta li na Téra, ta ser djuntadu na Séu pa partisipa na géra di Armajedon. (Mat. 24:31; Apo. 2:26, 27) Kel-li krê fla ma Grupu Enkaregadu di Óbra ka ta sta más ku nos li na Téra. Má simé, kel monti di algen ta kontinua organizadu. Kes irmon ki ten más spiriénsa, ki ta faze párti di kes otu ovelha ta ben kuida di povu di Deus. Óras ki kel-li kontise, nu ta meste mostra nos lialdadi. Nu ten ki apoia kes irmon i sigi kes orientason ki es ta ben resebe di Deus. Si nu krê skapa, nu ten ki sigi ses orientason!

15. Kuzê ki ta ben djuda-nu bira nos kapasidadi di aguenta firmi más fórti, i pamodi ki nu ten ki faze kel-li gósi?

15 Aguenta firmi: Téma di kongrésu di 2017 éra “Ka bu dizisti!”. Kel prugrama djuda-nu bira nos kapasidadi di aguenta prublémas más fórti. Nu prende ma aguenta firmi ka ta dipende sô óras ki kuzas sta dretu. Nu pode bira más fórti nos kapasidadi di aguenta óras ki nu ta kunfia na Jeová. (Rom. 12:12) Nunka nu ka debe skese di kuzê ki Jizus promete: ‘Kenha ki aguenta ti fin ta salva.’ (Mat. 24:13, nóta di rodapé) Kel promésa li krê fla ma nu meste mante fiel, ka ta nporta ki prublémas ki nu sta pasa pa el. Si nu aguenta tudu prublémas ki nu ten gósi, nu pode bira más fórti antis di txiga grandi tribulason.

16. Kuzê ki ta da-nu koraji, i modi ki nu pode bira nos koraji más fórti gósi?

16 Koraji: Téma di kongrésu di 2018 éra: ‘Ten koraji’! Kel prugrama djuda-nu lenbra ma é ka kapasidadi ki nu ten ki ta pô-nu ta ten koraji. Sima nu meste kunfia na Jeová pa nu aguenta firmi, tanbê nu meste kunfia na Jeová pa nu ten koraji di verdadi. Modi ki nu pode kunfia más txeu na Jeová? Nu ten ki lé Bíblia tudu dia i pensa txeu na modi ki Jeová salva se povu na pasadu. (Sal. 68:20; 2 Ped. 2:9) Óras ki nasons ataka-nu duránti grandi tribulason, nu meste ten koraji i kunfia na Jeová más di ki nunka. (Sal. 112:7, 8; Heb. 13:6) Si nu kunfia na Jeová gósi, nu ta ten koraji óras ki Gogi ataka-nu. *

 SPÉRA PA BU SALVASON

Ka ta dura, Jizus ku se trópas na Séu ta ben na ses kabalu na géra di Armajedon pa kaba ku kes inimigu di Deus! (Odja parágrafu 17.)

17. Pamodi ki nu ka meste ten medu di Armajedon? (Odja dizenhu na kapa.)

17 Sima nu odja na kel otu studu, maioria di nos sénpri vive duránti ténpu di fin. Má tanbê nu ten speransa di pasa ku vida na grandi tribulason. Géra di Armajedon ta ben kaba ku kel sistéma li. Má, nu ka meste ten medu. Pamodi? Pamodi kel-li ta ben ser géra di Deus. (Pro. 1:33; Eze. 38:18-20; Zac. 14:3) Óras ki Jeová da kel órdi, Jizus Kristu ta lidera kes trópa di Deus pa kel géra li. Djuntu ku el ta sta kes skodjedu ku spritu santu ki resusitadu i tanbê milhons di anju. Es ta ben luta kóntra Satanás, se dimónis i se trópas na Téra. — Dan. 12:1; Apo. 6:2; 17:14.

18. (a) Kuzê ki Jeová promete-nu? (b) Modi ki Apocalipse 7:9, 13-17, ta djuda-u ten sertéza ma bu ta ben salva na futuru?

18 Jeová promete-nu: ‘Ka ten ninhun arma ki fazedu kóntra bo ki ta ten bon rezultadu.’ (Isa. 54:17) ‘Un monti di algen’ di kes fiel ki ta adora Jeová, ta ‘sai di grandi tribulason’ ku vida! I tudu es ta ben kontinua ta sirbi Jeová. (Lé Apocalipse 7:9, 13-17.) Bíblia ta da-nu sertéza ma nu ta ben salva na futuru! Nu sabe ma ‘Jeová ta proteje kes fiel’. (Sal. 31:23) Tudu kes ki ta ama i lova Jeová ta ben xinti txeu alegria di odja ma se nómi fika linpu di tudu mintiras. — Eze. 38:23.

19. Ki speransa rei di sábi nu ten pa futuru?

19 Pensa na modi ki ta sérba kes palavra ki sta na 2 Timóteo 3:2-5 si el staba ta pâpia di mundu novu, undi pesoas ka ta ben ser influensiadu pa Satanás. (Odja kuadru “ Modi ki pesoas ta ben ser na Paraízu”.) Irmon George Gangas, * ki ta fazeba párti di Grupu Enkaregadu di Óbra, fla: “Mundu ta ben ser un lugar rei di sábi óras ki tudu algen adora Jeová! Ka ta dura, bu ta ben ten priviléjiu di vive na mundu novu. Bu ta ben vive timenti Jeová vive. Nu ta ben vive pa tudu ténpu.” Kel-li é un speransa rei di sábi!

KÁNTIKU 122 Nu mante firmi!

^ par. 5 Nu sabe ma ka ta dura tudu algen ta ben pasa pa un ‘grandi tribulason’. Kuzê ki kel-li ta siginifika pa nos? Kuzê ki ta ben kontise ku sérvus di Jeová duránti kel ténpu? Kuzê ki Jeová ta spéra pa nu faze? Ki kualidadis nu meste ten pa nu mante fiel duránti grandi tribulason? É kel-li ki nu sta ben odja na es studu.

^ par. 11 MÁS SPLIKASON: Palavras Gogi di Magogi (ô Gogi) siginifika un grupu di nasons ki ta ben djunta pa ataka povu di Jeová duránti grandi tribulason.

^ par. 11 Pa sabe más sobri kes kuza ki ta ben kontise ti txiga géra di Armajedon, djobe livru O Reino de Deus já Governa!, kapítlu 21, na purtugês. Pa más informason sobri ataki di Gogi di Magogi i sobri modi ki Jeová ta ben difende se povu duránti Armajedon, djobe livru A Adoração Pura de Jeová É Restaurada!, kapítlus 17 i 18, na purtugês.

^ par. 16 Prugrama di kongrésu di 2019, ku téma ‘Amor nunka ka ta kaba’!, ta mostra-nu ma nu pode xinti inda más suguru ku proteson di Jeová, ki ta ama-nu txeu. — 1 Cor. 13:8.

^ par. 19 Odja artigu “Suas obras o seguirão”, na Sentinéla di 1 di dizénbru di 1994, na purtugês.

^ par. 64 SPLIKASON DI FOTU: Duránti grandi tribulason, un grupu pikinoti di Tistimunhas di Jeová, ku koraji, ta djunta na un florésta pa faze runion.

^ par. 66 SPLIKASON DI DIZENHU: Un monti di algen fiel ta ben sai di grandi tribulason, ku vida i filís!