Bai pa asuntu

Bai pa lista di asuntus

 STUDU 13

Nhos ama kunpanheru txeu

Nhos ama kunpanheru txeu

‘Nhos ama kunpanheru txeu i di korason.’ — 1 PEDRO 1:22.

KÁNTIKU 109 Nu ama kunpanheru di korason

KUZÊ KI NU STA BEN STUDA *

Na kel últimu noti ki Jizus pasa djuntu ku se apóstlus, el mostra ma amor é rei di inportanti (Odja parágrafus 1 i 2.)

1. Ki órdi klaru Jizus da se disiplus? (Odja dizenhu na kapa.)

NA KEL noti antis di Jizus móre, el da se disiplus un órdi klaru. El fla-s: ‘Sima N ama nhos, tanbê nhos ama kunpanheru.’ Inda el fla: ‘Através di kel-li tudu algen ta fika ta sabe ma nhos é nha disiplus: si nhos ten amor pa kunpanheru.’ — João 13:34, 35.

2. Pamodi ki é inportanti nu ama kunpanheru?

2 Jizus fla ma sô nu ta sérba se disiplus verdaderu si nu mostra kel mésmu amor ki el mostra pa nos. Kes palavra li ka ta sirbiba sô pa kes disiplu di kel ténpu, má es ta sirbi pa nos tanbê. Pur isu, é rei di inportanti nu ama kunpanheru sikrê é difísil!

3. Kuzê ki nu sta ben odja na kel studu li?

3 Anos é inperfetu, pur isu é difísil nu mostra txeu amor pa kunpanheru. Má simé, nu debe sforsa pa nu imita Kristu. Na kel studu li, nu sta ben odja modi ki amor ta djuda-nu npenha pa pas, trata tudu algen igual i resebe otus ku alegria. Sima nu ta ba ta studa kel artigu li, nu debe pergunta nos kabésa: ‘Kuzê ki nu pode prende ku irmons i irmans ki kontinua ta ama kunpanheru mésmu kantu éra difísil fazeba kel-li?’

NPENHA PA PAS

4. Sima Mateus 5:23, 24 ta mostra, pamodi ki nu debe faze pas ku un irmon ki tene algun kuza kóntra nos?

4 Jizus inxina-nu ma si un irmon tene algun kuza kóntra nos, nu debe tenta faze pas ku el. (Lé Mateus  5:23, 24.) El mostra ma nu meste mante bons amizadi ku otus si nu krê agrada Deus. Jeová ta fika kontenti óras ki nu ta faze nos midjór pa sta na pas ku nos irmons. Má, si nu guarda rankor kóntra un irmon i ti nu nega faze pas ku el, Jeová ka ta seta nos adorason. — 1 João 4:20.

5. Pamodi ki foi difísil pa un irmon faze pas?

5 Alvês pode ser difísil faze pas. Pamodi? Odja kuzê ki kontise ku Markus. * Un irmon kritika-l i pâpia mal di el pa otus algen na kongregason. Modi ki Markus reaji? El fla: “N sai di kabésa ku el i N fika uma xatiadu.” Dipôs, Markus rapende di manera ki el konporta. El tenta pidi kel irmon diskulpa i faze pas ku el. Má, kel irmon ka seta i el kontinua maguadu. Na komésu, Markus pensa: ‘Pamodi ki N debe kontinua ta tenta, si é el ki ka krê faze pas?’ Má, enkaregadu di grupu di kongregason insentiva Markus pa ka dizisti. Kuzê ki Markus faze?

6. (a) Modi ki Markus sforsa pa faze pas? (b) Modi ki Markus sigi konsedju ki sta na Colossenses 3:13, 14 ?

6 Kantu Markus analiza se manera di pensa, el da kónta ma el tinha ki sérba más umildi. I el tinha tendénsia di atxaba ma el éra más midjór di ki otus. El odja ma el meste mudaba se manera di pensa. (Col. 3:8, 9, 12) El mostra umildadi kantu el bai pâpia ku kel irmon i el torna pidi-l diskulpa. Markus skrebe-l alguns karta ta fla ma el staba txeu rapendidu i el pidi-l pa es bira amigu otu bês. Markus ti da kel irmon alguns prezenti pikinoti ki el ta atxaba ma kel irmon ta ba gostaba. É tristi di odja ma kel irmon kontinua xatiadu ku el. Má, Markus kontinua ta obi ku órdi di Jizus di ama se irmon i di púrdua sénpri. (Lé Colossenses 3:13, 14.) Sima  kontise ku Markus, pode ser ki un irmon ka ta seta faze pas ku nos sikrê nu sforsa txeu. Má, si nu ta ama otus sima Jizus, nu ta kontinua ta purdua-s i ta faze orason pa nu faze pas otu bês. — Mat. 18:21, 22; Gál. 6:9.

Si un algen tene algun kuza kóntra nos, talvês nu meste tenta txeu bês pa faze pas (Odja parágrafus 7 i 8.) *

7. (a) Kuzê ki Jizus konsedja-nu pa nu faze? (b) Ki situason difísil un irman pasa pa el?

7 Jizus konsedja-nu pa nu kontinua ta trata otus sima nu ta gostaba pa es trata-nu. Tanbê el fla ma nu ka debe ama sô kes ki ta ama-nu. (Luc. 6:31-33) Nbóra nu ka ta spéra pa kel-li kontise, kuzê ki nu ta fazeba si un irmon di kongregason kumesa ta ivita-nu i ka ta krê kunprimenta-nu? É kel-li ki kontise ku un irman ki txoma Lara. El splika: “Un irman fika ka ta liga-m i N ka sabeba pamodi. N fika txeu preokupadu i N ta baba runion tristi.” Na komésu, Lara pensa: ‘Kulpa é ka di meu. I otus irmon na kongregason tanbê ta atxa ma kel irman ten un manera stranhu.’

8. Modi ki Lara sforsa pa faze pas? I kuzê ki nu pode prende ku se spiriénsa?

8 Lara faze alguns kuza pa faze pas. El faze orason pa Jeová i el disidi ba pâpia ku kel irman. Es pâpia di kel prubléma, es brasa kunpanheru i es faze pas. Tudu sta parseba dretu. Má Lara fla: “Un ténpu dipôs, kel irman torna faze-m mésmu kuza. N fika txeu dizanimadu!” Na komésu, Lara ta pensaba ma el ta sérba filís sô si kel otu irman mudaba se manera di ser. Má, el ben ntende ma midjór kuza ki el podia fazeba éra kontinua ta trata kel irman ku amor i ‘purdua-l sénpri’. (Efé. 4:32–5:2) Lara lenbra ma kel amor verdaderu ‘ka ta liga mal ki el fazedu.’ Má, el ‘ta suporta tudu kuza, el ta kridita na tudu kuza, el ta spéra tudu kuza, el ta aguenta firmi na tudu kuza.’ (1 Cor. 13:5, 7) Lara torna xinti pas déntu di el. Ku ténpu, kel irman kumesa ta trata-l más midjór. Óras ki bu ta npenha pa sta na pas ku bus irmon i bu ta  kontinua ta mostra-s amor, bu pode ten sertéza ma ‘kel Deus di amor i di pas ta sta ku bo.’ — 2 Cor. 13:11.

TRATA TUDU ALGEN IGUAL

9. Di akordu ku Atos 10:34, 35, pamodi ki nu meste trata tudu algen igual?

9 Jeová ta trata tudu algen igual. (Lé Atos 10:34, 35.) Óras ki nu ta trata tudu algen igual, nu ta prova ma nos é fidjus di Jeová. Nu ta obi ku órdi di ama kunpanheru sima nu ta ama nos kabésa i nu ta sforsa pa sta na pas ku irmons di kongregason. — Rom. 12:9, 10; Tia. 2:8, 9.

10-11. Kuzê ki djuda un irman muda se manera di pensa?

10 Pa alguns algen, é difísil trata tudu algen igual. Pur izénplu, odja kuzê ki kontise ku un irman ki txoma Ruti. Kantu el éra jóven, un algen di otu país prujudika se família. Modi ki kel-li mexe ku el? El fla: “N bira ta ôdia tudu kuza ki staba ligadu ku kel país. N ta atxaba ma tudu algen di kel lugar éra kel mê, ti mésmu irmons.” Kuzê ki djuda Ruti muda se manera di pensa?

11 Ruti da kónta ma el meste lutaba kóntra se manera di pensa. Nton, el kumesa ta lé spiriénsas na Anuário sobri kel país. El fla: “N sforsa pa N odja algen di kel país di un otu manera. N kumesa ta repara ma kes irmon ku irmans ta sirbiba Jeová di tudu ses korason. Kel-li fika klaru pa mi, ma es tanbê, es ta faze párti di nos família na mundu interu.” Poku-poku, Ruti da kónta ma el meste fazeba más. El splika: “Sénpri ki N nkontraba ku irmons ku irmans di kel país, N ta fazeba un sforsu pa N trataba es dretu. N ta papiaba ku es i N pasa ta konxe-s midjór.” Kal ki foi rezultadu? Ruti fla: “Ku ténpu nhas sentimentu mariadu kaba.”

Si nu ten txeu ‘amor pa nos irmons na mundu interu’, nu ta trata tudu algen igual (Odja parágrafus 12 i 13.) *

12. Ki prubléma un irman ki txoma Sara tinha?

12 Alguns pode ka trata tudu algen igual mésmu sen es da kónta. Pur izénplu, un irman ki txoma Sara ta atxaba ma el ta trataba tudu algen igual, pamodi el ka ta julgaba pesoas pa ses rasa, pa dinheru ô pa responsabilidadi ki es ten na kongregason. Má el fla: “N kumesa ta da kónta ma N ta fazeba diferénsa di algen.” Di ki manera? Sara ben di un família ki ten bon skóla i pur isu el ta gostaba di sta djuntu ku pesoas ki éra sima el. Un bês, Sara ti txiga di fla un amigu: “Ami N ta sta sô djuntu ku irmons ki ten bon skóla. N ta ivita sta djuntu ku kes ki ka ten.” É klaru ki Sara meste mudaba se manera di pensa. Má modi?

13. Kuzê ki nu ta prende di modi ki Sara muda se manera di pensa?

13 Un enkaregadu di grupu di kongregason djuda Sara analiza se manera di pensa. Sara fla: “El ilojia-m pa nha sirvisu fiel, pa nhas bon komentáriu i pa kuzas ki N sabe di Bíblia. Dipôs, el splika ma sima nu ta ba ta ten más konhisimentu nu meste ten kualidadis sima umildadi, mizerikórdia i seta nos limitason.” Sara sigi konsedju ki enkaregadu di grupu da-l. El fla: “N da kónta ma kuza más inportanti ki ten é pa nu mostra amor i bondadi.” Di kel manera li Sara kumesa ta odja irmons di manera diferenti. El splika: “N tenta ntende ki kualidadis ta poba es ten valor pa Jeová.” I nos? Nunka nu ka krê atxa ma nos é más midjór di ki otus pamodi skóla ki nu ten! Si nu ten txeu ‘amor pa nos irmons na mundu interu’ nu ta trata tudu algen igual. — 1 Ped. 2:17.

 RESEBE OTUS KU ALEGRIA

14. Di akordu ku Hebreus 13:16, modi ki Jeová ta xinti óras ki nu ta resebe otus ku alegria?

14 Jeová ta fika kontenti óras ki nu ta resebe otus ku alegria. (Lé Hebreus 13:16.) Pa el, kel-li ta faze párti di nos adorason, inda más óras ki nu ta djuda kes algen ki meste. (Tia. 1:27; 2:14-17) É pur isu ki Bíblia ta fla-nu pa nu resebe otus ku alegria. (Rom. 12:13) Óras ki nu ta faze kel-li, nu ta mostra ma nu gosta di nos irmons, ma nu ta preokupa ku es i ma nu krê ser ses amigu. Jeová ta fika kontenti óras ki nu ta da otus algen algun kuza pa kume, pa bebe ô óras ki nu ta pasa algun ténpu ku es. (1 Ped. 4:8-10) Má, ten alguns kuza ki pode ka dexa-nu resebe otus algen ku alegria.

“Un bês, N ka ta xintiba avontádi pa resebeba otus, má N muda nha manera di pensa i oji ami é más filís” (Odja parágrafu 16.) *

15-16. (a) Pamodi ki alguns ka ta xinti avontádi pa resebe otus? (b) Kuzê ki djuda Edite resebe otus na se kaza?

15 Talvês nu ka ta xinti avontádi pa resebe otus pamodi nos situason. Odja izénplu di un viúva ki txoma Edite. Antis di el bira Tistimunha di Jeová, el ta gostaba di fika na se kantu. El ta atxaba ma otus ta resebeba pesoas mutu más midjór di ki el.

16 Dipôs ki Edite bira Tistimunha di Jeová, el muda se manera di pensa. El faze alguns kuza pa resebe otus na se kaza. El fla: “Kantu nos novu Salon di Reinu staba ta fazedu, un ansion fla-m sobri un kazal ki sta ben djudaba na trabadju i es pergunta-m si N podia resebeba es pa dôs simana. Kel-li pô-m ta lenbra modi ki Jeová abênsua kel viúva di Sarefá.” (1 Reis 17:12-16 ) Edite seta resebe kel kazal. El abensuadu? Edite splika: “Es ka fika sô dôs simana, má es fika dôs mês. Duránti kel ténpu nu bira txeu amigu.” Tanbê, Edite abensuadu ku bons amigu na kongregason. Oji el é pionera i el gosta di konvida kes ki ta sai ku el na pregason pa bai toma un lanxi na se kaza. El fla: “Óras ki N ta da, N ta fika  kontenti! I pa fla verdadi, N ta kaba pa resebe mutu más txeu.” — Heb. 13:1, 2.

17. Di kuzê ki Lúkas ku se mudjer da kónta?

17 Talvês nu ten ábitu di resebe otus, má nu pode midjora? Pur izénplu, Lúkas ku se mudjer gosta txeu di resebe algen na ses kaza. Es tinha ábitu di konvidaba pa ses kaza ses pai ku ses mai, ses família, ses amigu i enkaregadu di grupu di kongregason ku se mudjer. Má Lúkas fla: “Nu da kónta ma nu staba ta konvida sô kes algen ki nos éra más amigu.” Kuzê ki Lúkas ku se mudjer faze pa resebe más algen?

18. Modi ki Lúkas ku se mudjer midjora na resebe otus?

18 Lúkas ku se mudjer prende kuzê ki siginifika resebe otus algen ku alegria kantu es pensa na palavras di Jizus: ‘Si nhos ama kes algen ki ta ama nhos, ki rekonpénsa nhos ta ten?’ (Mat. 5:45-47) Es odja ma es meste imitaba Jeová, ki é un Deus ki gosta di da tudu algen. Nton, es disidi konvida kes irmon ku irmans ki nunka es ka konvidaba antis. Lúkas fla: “Nos tudu nu ta xinti sábi na kes momentu la. Kel-li ta pô-nu ta fika más amigu di kunpanheru i di Jeová.”

19. Modi ki nu ta mostra ma nos é disiplus di Jizus, i kuzê ki bu sta disididu na faze?

19 Na kel studu li nu odja modi ki ama kunpanheru txeu i di korason pode djuda-nu npenha pa pas, trata tudu algen igual i resebe otus ku alegria. Nu meste prende lida ku kalker manera di pensa mariadu i ama nos irmons ku irmans di korason. Si nu faze kel-li, nu ta ser filís i nu ta mostra ma nos é disiplus di Jizus di verdadi. — João 13:17, 35.

KÁNTIKU 88 Djuda-m ntende bus mandamentu

^ par. 5 Jizus fla ma kristons verdaderu ta konxedu pa amor ki es ta mostra pa kunpanheru. É kel amor ki nu ta xinti pa irmons, ki ta pô-nu ta npenha pa pas, ta trata tudu algen igual i ta resebe otus algen ku alegria. Má alvês é ka fásil faze kel-li. Na kel studu li, nu sta ben odja alguns konsedju di modi ki nu pode kontinua ta ama kunpanheru txeu i di korason.

^ par. 5 Mudadu alguns nómi na es artigu.

^ par. 57 SPLIKASONS DI FOTU: Un irman ta tenta rezolve un prubléma ku otu irman. Na kel primeru bês el ka konsigi, má el ka dizisti. El kontinua ta sforsa pa mostra amor, i na fin el konsigi.

^ par. 59 SPLIKASON DI FOTU: Un irmon ki dja sta grandi sta xinti ma otus irmon di kongregason ka sta liga-l.

^ par. 61 SPLIKASON DI FOTU: Un irman ki antis ka ta xintiba avontádi pa resebe otus na se kaza, muda se manera di pensa i gósi el é más filís.