Bai pa asuntu

Bai pa lista di asuntus

 STUDU 4

‘Própi spritu ta da tistimunhu’

‘Própi spritu ta da tistimunhu’

‘Própi spritu ta da tistimunhu ku nos spritu ma anos é fidjus di Deus.’ — ROMANOS 8:16.

KÁNTIKU 25 Un nason spesial

KUZÊ KI NU STA BEN STUDA *

Na Pentikósti, Jeová da se spritu santu pa uns 120 kriston di un manera spetakular (Odja parágrafus 1 i 2.)

1-2. Ki kuza spetakular kontise na dia di Pentikósti di anu 33?

ÉRA dia dumingu di palmanhan na Jiruzalen, na dia di Pentikósti di anu 33. Uns 120 disiplu staba djuntu na un sala na primeru andar di un kaza. (Atos 1:13-15; 2:1 ) Alguns dia antis, Jizus dja flaba es pa es ka saíba di Jiruzalen, pamodi es ta ben resebeba un prezenti spesial. (Atos 1:4, 5 ) Kuzê ki kontise dipôs?

2 ‘Dirapenti, ben un barudju di séu, sima barudju di un béntu fórti’. Kel son toma kónta kaza. Dipôs, ‘uns kuza sima línguas di lumi,’ parse riba kabésa di disiplus i tudu es fika ‘xeiu di spritu santu’. (Atos 2:2-4 ) É di es manera spetakular ki Jeová da kel grupu se spritu santu. (Atos 1:8 ) Es bira kes primeru algen ki skodjedu ku spritu santu * i ki dadu speransa di ba governa ku Jizus na Séu.

KUZÊ KI TA KONTISE ÓRAS KI UN ALGEN SKODJEDU KU SPRITU SANTU?

3. Pamodi ki kes kriston na Pentikósti ka tinha dúvida ma es skodjedu ku spritu santu?

3 Si bo éra un di kes disiplu ki staba na kel sala, bu ka ta skeseba di kel dia nunka más. Un kuza sima un língua di lumi parse riba bu kabésa i bu kumesa ta pâpia na otus língua! (Atos 2:5-12 ) Bu ka ta tinha ninhun dúvida ma bu skodjedu ku spritu santu. Má, tudu kes kriston skodjedu resebe spritu santu di manera spetakular i na  mésmu ténpu? Nau. Modi ki nu sabe kel-li?

4. Tudu kes kriston skodjedu na ténpu di apóstlus resebe spritu santu na mésmu ténpu? Splika.

4 Primeru, nu sta ben odja ki ténpu ki un algen ta resebe spritu santu. É ka sô kel grupu di uns 120 kriston ki skodjedu ku spritu santu na Pentikósti di anu 33. Más tardi na kel dia, uns 3 mil algen tanbê resebe spritu santu. Es skodjedu ku spritu santu kantu es batizadu. (Atos 2:37, 38, 41 ) Má dipôs di anu 33, é ka tudu kristons ki resebe spritu santu na momentu ki es batiza. Pur izénplu, samaritanus resebe spritu santu algun ténpu dipôs ki es batiza. (Atos 8:14-17 ) I na kazu di Kornéliu ku kes algen di se kaza kontise un kuza stranhu. Es skodjedu ku spritu santu mésmu antis di es batizadu. — Atos 10:44-48.

5. Di akordu ku 2 Coríntios 1:21, 22, kuzê ki ta kontise óras ki un algen skodjedu ku spritu santu?

5 Gósi nu sta ben odja kuzê ki ta kontise óras ki un algen skodjedu ku spritu santu. Talvês na komésu, alguns di kes algen ki skodjedu ta atxa difísil seta ma Jeová dja skodje-s. Es pode pergunta: ‘Pamodi ki Deus skodje-m?’ Má otus pode ka reaji di kel manera li. Ka ta nporta modi ki un algen reaji, apóstlu Polu splika kuzê ki ta kontise ku tudu kes ki skodjedu. El fla: ‘Dipôs ki nhos kridita, Deus sela * nhos através di el ku kel spritu santu ki el prometeba, ki é kel garantia di nos eransa’. (Efé. 1:13, 14; nóta di rodapé) Kel-li ta mostra ma Jeová ta uza se spritu santu pa dexa klaru pa kes kriston ma el skodje-s. Pur isu, spritu santu é ‘un garantia’ ki ta pô-s ten sertéza ma na futuru es ka ta ben vive na Téra, má es ta ba vive pa tudu ténpu na Séu. — 2 Coríntios 1:21, 22.

6. Kuzê ki un kriston skodjedu ku spritu santu meste faze pa resebe se rekonpénsa na Séu?

6 Si un kriston skodjedu ku spritu  santu, kel-li krê fla ma se rekonpénsa di bai pa Séu dja sta garantidu? Nau. Kel-li ta da-l sertéza ma el skodjedu pa bai pa Séu. Má, el meste lenbra di kel konsedju li: ‘Irmons, nhos sforsa mutu más inda pa garanti ma nhos txomadu i ma nhos skodjedu, pamodi si nhos kontinua ta faze kes kuza li, nunka más nhos ka ta fadja.’ (2 Ped. 1:10) Pur isu, sikrê un kriston skodjedu ô txomadu pa ba vive na Séu, el ta resebe se rekonpénsa sô si el mante fiel. — Fil. 3:12-14; Heb. 3:1; Apo. 2:10.

MODI KI UN ALGEN TA SABE SI EL SKODJEDU?

7. Modi ki kes skodjedu ku spritu santu ta sabe ma es txomadu pa ba vive na Séu?

7 Má, modi ki un algen ta sabe ma el txomadu pa ba vive na Séu? Nu ta odja respósta klaru na palavras di Polu pa kes kriston na Roma ‘ki txomadu pa es ser santu’. El fla-s: ‘Nhos ka resebe un spritu di skravidon, ki ta poi nhos ku medu otu bês, má nhos resebe un spritu ki ta mostra ma nhos adotadu sima fidjus, i é através di kel spritu li ki nu ta fla altu: “Aba, Pai!” Própi spritu ta da tistimunhu ku nos spritu ma anos é fidjus di Deus.’ (Rom. 1:7; 8:15, 16) Kel-li ta mostra ma Deus ta uza se spritu santu, pa dexa klaru pa kel algen ki skodjedu ma el txomadu pa ba vive na Séu. — 1 Tes. 2:12.

8. Modi ki 1 João 2:20, 27 ta mostra ma kes kriston skodjedu ka meste pa ningen fla-s ma es txomadu pa ba vive na Séu?

8 Jeová ka ta dexa ninhun dúvida na menti i na korason di kes algen ki el ta konvida pa ba vive na Séu. (Lé 1 João 2:20, 27.) É klaru ki kes kriston skodjedu ku spritu santu meste pa Jeová inxina-s através di kongregason, sima el ta faze ku kalker otu algen. Má, es ka meste pa ningen fla-s ma es é skodjedu ku spritu santu. Jeová dja uza se spritu santu, ki é kel forsa más poderozu ki ta izisti, pa dexa klaru ma es txomadu pa ba vive na Séu!

ES ‘NASE OTU BÊS’

9. Di akordu ku Efésios 1:18, ki mudansa ta kontise ku un algen ki skodjedu ku spritu santu?

9 Maioria di sérvus di Jeová oji, ta atxa difísil di ntende kuzê ki ta kontise ku un algen ki Deus skodje ku spritu santu. Kel-li é normal pamodi es ka skodjedu ku spritu santu. Deus ka faze-nu pa nu ba vive pa tudu ténpu na Séu, má na Téra. (Gén. 1:28; Sal. 37:29) Má, Jeová disidi skodje alguns algen pa ba vive na Séu. Pur isu, óras ki el skodje un algen, el ta faze un grandi mudansa na speransa i na manera di pensa di kel algen, asi pa el krê ba vive na Séu. — Efésios 1:18.

10. Kuzê ki siginifika ‘nase otu bês’? (Odja tanbê nóta di rodapé.)

10 Óras ki un kriston ta skodjedu ku spritu santu, el ta ‘nase otu bês’ ô ‘nase di riba’. * Jizus tanbê mostra ma ka ta da pa splika dretu pa un algen ki é ka skodjedu ku spritu santu, modi ki un algen ta xinti óras ki el ‘nase otu bês’ ô óras ki el ‘nase di spritu.’ — João 3:3-8; nóta di rodapé.

11. Splika modi ki un algen ta muda se manera di pensa óras ki el skodjedu ku spritu santu.

11 Modi ki un kriston ta kumesa ta pensa óras ki el skodjedu ku spritu santu? Antis di Jeová skodje kes kriston, es ta  daba valor pa ses speransa di vive pa tudu ténpu na Téra. Es tinha gana pa txigaba dia ki Jeová ta ben kababa ku tudu maldadi i bira Téra un paraízu. Talvês, ti es ta imajinaba ses kabésa ta ben resebeba ses família ô amigus ki dja móre. Má, dipôs ki es skodjedu ku spritu santu, es kumesa ta pensa di un otu manera. Pamodi? É ka pamodi es dexa di da valor pa speransa di vive li na Téra, ô pamodi es xinti dizanimadu ô es staba ta sufri txeu. Tanbê, es ka muda ses manera di pensa di un óra pa kel otu, pamodi es atxa ma es ta ben kansa di vive pa tudu ténpu li na Téra. Má, é Jeová ki uza se spritu santu pa muda ses manera di pensa i muda kel speransa ki es ta gostaba txeu.

12. Di akordu ku 1 Pedro 1:3, 4, modi ki kes kriston skodjedu ku spritu santu ta xinti ku speransa ki es ten?

12 Un algen ki skodjedu ku spritu santu talvês pode xinti ma el ka merese es priviléjiu grandi. Má, el ka ten ninhun dúvida ma Jeová skodje-l. Envês di kel-li, el ta xinti kontenti dimás i xeiu di gratidon óras ki el ta pensa na se speransa di ba vive na Séu. — 1 Pedro 1:3, 4.

13. Kuzê ki kes kriston skodjedu ku spritu santu ta atxa di ses vida li na Téra?

13 Má, kel-li krê fla ma kes kriston skodjedu ku spritu santu krê móre? Apóstlu Polu ta responde kel pergunta li. El konpara ses korpu ku un ténda i el fla: ‘Na verdadi, anos ki sta na es ténda, nu ta jeme frontadu, pamodi nu ka krê duspi di el, má nu krê bisti di kel otu, asi pa vida inguli kel ki ta móre.’ (2 Cor. 5:4) Kes kriston ka perde interesi na vida li na Téra, i nen es ka tene gana móre. Envês di kel-li, es gosta di vive i es krê uza kada dia pa sirbi Jeová djuntu ku ses famílias i amigus. Má, ka ta nporta kuzê ki es sta ta faze, kes kriston sénpri ta lenbra di ses grandi speransa pa futuru. — 1 Cor. 15:53; 2 Ped. 1:4; 1 João 3:2, 3; Apo. 20:6.

JEOVÁ SKODJE-U KU SPRITU SANTU?

14. Kuzê ki ka ta mostra ma un algen skodjedu ku spritu santu?

14 Talvês bu sta ta pergunta si bu skodjedu ku spritu santu. Si bu ta atxa ma sin, pensa na kes pergunta inportanti li: Bu ten un dizeju fórti di faze vontadi di Jeová? Bu ta atxa ma bu ten txeu zelu na pregason? Bu gosta di studa Bíblia i prende ‘kes kuza profundu di Deus’? (1 Cor. 2:10) Bu ta atxa ma Jeová sta ta djuda-u ten bons rezultadu na pregason? Bu ta xinti ma djuda otus prende sobri Jeová é un responsabilidadi grandi? Bu sta ta odja kuzas ki ta mostra ma Jeová djuda-u na bu vida? Si bu responde sin pa tudu kes pergunta li, kel-li ta mostra ma bu txomadu pa bai pa Séu? Nau. Pamodi ki nau? Pamodi tudu sérvus di Jeová pode xinti di kel manera li, ka ta nporta si es é skodjedu ku spritu santu ô nau. I através di spritu santu, Jeová pode da kel mésmu forsa pa kalker un di se sérvus, ka ta nporta kal ki é ses speransa. Na verdadi, si bu sta ta pergunta si bo é un kriston skodjedu ku spritu santu ô nau, kel-li dja ta mostra ma bu ka ta faze párti di kes ki ta bai pa Séu. Kes ki Jeová ta txoma ka ten dúvida si es skodjedu ku spritu santu ô nau. Es ten sertéza!

Jeová uza se spritu santu pa da Abraon, Sara, Davidi i Juan Batista puder pa faze kuzas grandi, má el ka uza kel spritu pa da-s speransa di ba vive na Séu (Odja parágrafus 15 i 16.) *

15. Modi ki nu sabe ma é ka tudu kes ki resebe spritu santu di Deus ki skodjedu pa ba vive na Séu?

15 Na Bíblia, nu ta atxa txeu izénplu di  ómis di fé ki resebe spritu santu. Má simé, es ka tinha speransa di ba vive na Séu. Pur izénplu, Jeová uza se spritu santu pa gia Davidi. (1 Sam. 16:13) Spritu santu djuda-l ntende kes kuza profundu sobri Jeová i tanbê orienta-l pa el skrebe alguns párti di Bíblia. (Mar. 12:36) Má simé, apóstlu Pedru fla ma Davidi “ka subi séu”. (Atus 2:34, Bíblia na Prugrésu di Traduson pa Lingua Kabuverdianu, BPK ) Juan Batista staba “xeiu di Spritu Santu”. (Lúkas 1:13-16, BPK ) Jizus fla ma ka tinha ninhun ómi más inportanti di ki Juan, má tanbê el fla ma Juan ka ta ben fazeba párti di Reinu di Séu. (Mat. 11:10, 11) Jeová uza se spritu santu pa da kes ómi puder pa faze kuzas grandi, má el ka uza kel spritu pa skodje-s pa es ba vive na Séu. Kel-li krê fla ma kes kriston ki skodjedu pa ba vive na Séu é más fiel di ki kes ómi li? Nau. Kel-li krê sô fla ma Jeová ta ben resusita-s pa es ben vive na Paraízu li na Téra. — João 5:28, 29; Atos 24:15.

16. Kal ki é speransa di kuazi tudu sérvus di Jeová oji?

16 Kuazi tudu sérvus di Jeová ki sta na Téra oji, ka ten speransa di ba vive na Séu. Sima Abraon, Sara, Juan Batista i txeu otu ómis ku mudjeris na ténpu ki Bíblia skrebedu, es tene gana di ben vive na Téra óras ki Reinu di Deus ben governa-s. — Heb. 11:10.

17. Ki perguntas nu ta ben responde na kel otu studu?

17 Dja ki alguns kriston skodjedu ku spritu santu inda sta djuntu ku povu di Deus oji, é normal nu ten alguns pergunta. (Apo. 12:17) Pur izénplu, modi ki un kriston skodjedu ku spritu santu, debe pensa sobri se kabésa? Si un algen na bu kongregason kumesa ta kume pon i ta bebe vinhu na Komemorason, modi ki bu debe trata-l? I si kes algen ki ta fla ma es é skodjedu ku spritu santu sta ta bira más txeu? Bu debe fika preokupadu ku kel-li? Na kel otu studu, nu ta ben responde kes pergunta li.

^ par. 5 Désdi Pentikósti di anu 33, Jeová sta ta da alguns kriston un grandi speransa di ba governa ku se Fidju na Séu. Má, modi ki kes kriston ta sabe ma es skodjedu pa es priviléjiu grandi? Kuzê ki ta kontise óras ki un algen konvidadu pa bai pa Séu? Kel studu li, ki fazedu ku bazi na un di kes artigu di Sentinéla di janeru di 2016, ta ben responde kes pergunta inportanti li.

^ par. 2 MÁS SPLIKASON: Kristons skodjedu ku spritu santu: Jeová ta uza se spritu santu pa skodje kes algen ki ta ba governa ku Jizus na Séu. Através di se spritu santu, Deus ta da-s un promésa ô un ‘garantia’ pa futuru. (Efé. 1:13, 14) Kes kriston pode fla ma spritu santu ‘ta da tistimunhu’, ô ta dexa klaru, pa es ma ses rekonpénsa é na Séu. — Rom. 8:16.

^ par. 5 MÁS SPLIKASON: Sélu. Un algen sô ta resebe kel últimu sélu, na algun momentu antis di el móre fiel pa Deus ô na algun momentu antis di kumesa grandi tribulason. — Efé. 4:30; Apo. 7:2-4; odja Matéria pa studa na runion Vida i pregason di abril di 2019, pájinas 7 i 8.

^ par. 10 Pa más splikason sobri kuzê ki siginifika ‘nase otu bês’, odja Sentinéla di 1 di abril di 2009, pájinas 3-4, 5, 5-6, 7-8, 8-9, 10-11, 11-12, na purtugês.

KÁNTIKU 27 Ta ben mostradu fidjus di Deus

^ par. 57 SPLIKASON DI DIZENHU: Ka ta nporta si nu sta prézu pamodi nos fé ô si nu ten liberdadi pa prega i inxina verdadi, nu tene gana di ben vive na Téra óras ki Reinu di Deus ben governa-nu.